2013 Article - salvationist a chhuah te


PAWN LAM AI AH CHHUNG LAM INCHEINA
- Ema Ralte

“In incheina chu pawn lam incheina – sam phiar te, rangkachak thi awrh te, silhfena inthuam te chu – ni lovin, thinlunga mihring thuruk chu, rilru thuhnuairawlh leh nunnem, silhfen chhe thei lova inthuam ni zawk rawh se, chu chu Pathian mithmuhin a hlu em em a ni.” (I Petera 3:3-4)

    Kan chenna khawvel a changkang zel a, khawthlang leh khawchhak lama an technology leh incheina te chu rei lote ah kan ramah pawh a rawn thleng zung zung tawh a, khawvel thiamna hmangin gadgets (mobile phone, tablet, computer etc.) leh fashion changkang tak tak kan hma lawkah lei theih maiin alo awm a, thalai tam tak ten kan thiante neih ang neih kan duh ve a, neilo chung chunga thiante neih avanga lei ve ta mai te pawh kan awm in a rinawm.

    Hetianga lang thei a pawnlam incheina hi a tha a, kan nei tur a ni a, nalh tak tak te pawhin kan inthuam tur a ni. Mahse, kan pawnlam landan atangin kan mihring pui te chuan min teh maithei, chutihrual chuan Pathian erawh chuan kan chhunglam - kan rilru lam a teh daih thung si a! Thawmhnaw branded, changkang tak tak leh class sang tak tak te, nalh em em ai te inbelin, make up changkang tak tak leh manto tak tak te hmang mah ila kan chhunglam, kan ‘Pathian In’ ber a thianghlim loh chuan Pathian tan chuan mithianghlim a chhiar kan ni thei dawn em mi?

    Pawnlam incheina kan uluk lovin kan nalhlo tur ka tihna a ni lo. Fai tak leh nalh takin kan pawnlam lan dan tur pawh kan ulukin kan duang fel thlap tur a ni. Mi zahawm ni tur leh mi te bula kan inthlahrung lohna tur chuan kan pawnlam lan dan kan uluk tur a ni a, fai tak leh nalh taka inchei leh inthuam hi kan tum tur a ni. Chutihrual chuan kan pawnlam lan dan ringawt-ah buaiin kan chhunglam - kan rilru leh thlarau te hi kan theihnghilh thak ang tih hi thil hlauhawm tak a ni.

    Mi incheng vawng fai, fel leh nalh tak tak zingah hian chhunglam kha tlat te hi thil awm thei tak a ni a, thiante leh thenawm khawveng te pawhin “Ani chu a smart a, a fai bawk a, a incheina te a nalh theiin a class bawk a... Mahse.....” tia ‘MAHSE’ in a chhunzawm hi thil hlauhawm tak a ni. Incheina nalh leh tha nei zo lo, kan lo nuih ruk zingah hian Pathianin an thinlung leh rilru put hmang a lawm em em te pawh an awm nawk maithei. Han ngaihtuah ve mai mai chhin teh.

    Pawnlama kan incheina te hi chuan hun rei tak a daih lova, chhe thei leh thing thei te an ni vek a, kumina nalh kan tih em em te hi nakum alo thlen chuan a ‘class lo’ kan ti leh tawh thin, mahse chhunglam incheina tha ber rilru thianghlim tak, zaidam, nunnem, inngaitlawm leh Pathian tihna erawh hi chu engtik lai mahin a hlui thei lova, a ‘class’ em em reng mai a ni tih hi hria ila, engtik lai mah hlui leh thing ve ngailo ‘thinglung thianghlim’ a i inchei anih phawt chuan chunglam mithmuhah chuan i hlu em em reng mai dawn a ni.


“PALM SUNDAY”
(Tumkau kenga chawimawina Chawlhni)
Major Sangzuala


Chang thlan    :    Mathaia 21:9
    “Tin, mipui a hmaa kal te leh a zirtir te chuan “Davida Fapa hnenah Hosanna! Lalpa hming a lo kal chu fakin awm rawh se. Chungnung berah khian Hosanna!” tiin an auva.”

    ‘PALM’ tih hi English tawnga thumal pakhat a ni a. Mizo tawng chuan Kutphah, tum leh meihle lam chi reng, khuva te, Thangtungte lamin a huam thei awm e. Verb = thiltih lamah an hmanna ah chuan Hnehna lam ah Chawimawi tihte pawh a ni thei a. Chuvangin ISUA KRISTA chungchang thu ah an hman danah chuan Tumkau henga Chawimawina a tan an hmang a ni.

    Lal Isua Krista chu kan sualna avangin, Pathian chuan a fapa mal neihchhun chu kan sual tlan turin a rawn tir a. Mihring angin alo piang a, Bethlehem ranin ranthlengah a zal a. Heroda ral hlauin Aigupta ramlam ah tlanbo pui a n i a, kum 33 anih thlengin lawm leh chawimawi a dawn chhun chu Palm Sunday a mipui a hma a kal te leh a zirtirte chuan an chawimawi ta a ni. Chumi ni atanga ni reilote ah kan zavaia (mi zawng zawng) sual tlan nan Kross ah khenbeh in a tuar ta a!

    Mi Sabengtung No tuma la chuanna ngai loh chu hawhin a chungah chuangin Jerusalem ah a lut a, mipuite chuan chhawl satin (Tumkau) kengin a kalna tur ah an lo phah a, chumai ni lovin an puan te phah zelin kan changthlan tak khi hmanga au rualin Jerusalem khawp ah chuan an lut ta a ni. Heng Bible te hi chhiar ngei ngei ang che u. (Matha 21:1-11, Marka 11:1-11, Luka 19:28-40, Johana 12:12-19).

    Hei hi chhinchhiah reng bawk ila. Isua chuanna Sabengtung No khan mipui tan hlutna reng a nei lo. LAL ISUA KRISTA a chunga a chuan avangin mipuite chuan Tumkau an kuta kengin kawng sira chhawlte satin an puante nen lam a kalna turah an lo phah a ni. Engvangin nge kha Sabengtung No rah mai mai tura an lo pha? i ti maw? Achhan chu Isua Krista chu a chungah a chuan vang a ni. Chuvangin keini misualte pawh hi A thisen avangin Pathian fa roluahtu kan lo ni ta a ni. ‘Hosanna Lalpa hminga lo kal chu, Hosanna!’ kan ti ve dawn lawm mi? Amah avang chauha chawimawi in kan la awm ve dawn si.

LALPA CHU FAKIN AWM RAWH SE.
------------------------------

KROSS KAWNG
- Maj. Lalthansanga
   
    “Jerusalem nute u, mi tah suh u. Nangmahni leh in fate tan tap zawk rawh u.”

Bible chang chhiar tur: Johana 18:12-14, Luka 23:28-34, Rom 5:9-11

    Rom sorkar danah chuan thiamloh chang, thi tlaka an ngaihte chu a na thei ang berin an chungthu an rel thin a. Lal Isua chu rorelna hmaah an hruai a, thiamthu sawi tur a neilo. A chunga thil lo thleng tur chu Isaia chuan hetiang hian a lo sawi tawh - “Ani chu hnechhiahin a awm a, nimahsela a inngaitlâwm a, a ka pawh a ang lo: berâm no talh tûra an hruaia ang leh, berâm a hmul mettu hmaa a ngawi renga awm ang maiin; a ni, a ka a ang lo.” (Isaia 53:7)

1. Jerusalem chhe tur a hriatin vawihnih a tah chhan anih kha. Chutiang deuh chuan Jerusalem nute hian Isua tuarna an hmuhin an tap a. Lal Isuan an hnenah, “Nangmahni leh in fate tan tap zawk rawh u,” a ti. Hun rapthlak lo thleng tur thu a sawi.

2. Bacilide-a zirtirna: Hetih hunlai hian Bacilide-a zirtirna a darh nasa em em a. “Isua chu a thi lo. Kross putpuitu Simona kha an khengbet zawk a ni,” tiin. Amaherawhchu chanchintha ziaktu Johana chuan Johana 19:18-20 ah chiang takin min hrilh a ni.

Tunlai hun: Lal Isua khenbeha a awm ang khan, kan tun hun pawh hi min ngaihtuah tir a. Zirtirna diklo leh thahnemngaihna thianghlimlo chuan min tuam vel mek a ni. Heng thil avang hian kohhranah pawh buaina tam tak a awm thei niin a lang a, thil tul lovah kan buai a, chu chu Setana hnahthawh lo lang chu a ni fo thin.

3. Khawngaihna: Kross atangin hmangaihtu hmel alo lang a. Lal Isua khaikana a awm khan tihelna authawm chuan, “Pathian fapa i nih chuan intidam la, kan ring ang che,” an ti a. Amaherawhchu Pathian chuan a mite chhandamna tura a hnathawh a ni tlat si. Lal Isua erawh chuan, “Ka pa anni hi ngaidam rawh, an thiltihsual hi an hrelo a ni,” tiin ngaihdam ala dilsak a ni.
    Lal Isua’n Kross atangin hmangaihtu hmel a hmu a. A nu leh zirtir a hmangaih te kha a hmu a, a nu hnenah, “Hmeichhia en teh i fapa kha,” tiin a zirtir hnenah “En teh i nu kha” a ti.
    Aw le, tunah hian Krista Kross chu i han thlir teh ang. Mi zawng zawng tana min petu chu hmangaihtu hmelin kan hmu thei ngei ang.

Aw ka thlarau, chu tlangah chuan va kal la,
I Lalpa Kross lera awm chu
Nungin i va hmu ang a,
Kalvari tlang chanchin a lo hrilh ang che.

    Nangmahah khan a thihna hriatpuitu niin a hmu che in i in hria em? Han ngaihtuah teh? Krista thihna awmzia hriatpuitute lo chuan a hmel an hmu theilo. Krista hmel hmutu Paula chuan hetiangin a au chhuahpui, “Krista hmangaihna chuan min tir lui a ni; heti hian kan ngaihtuah: Mi zawng zawng thih aiin mi pakhat a thi a,” (II Korinth 5:14).

4. Krista thihna leh thawhlena kan zirturte:
(i) Isua phuartute chu sakhaw hruaitute an ni.
(ii) Isua phuartute chu sualin a phuar.

    Isua chu tunah kan hnenah thlarauin a awm a, amah mantirtu kha nangmahah a awm a, Thlarau Thianghlim chu hnathawk theilo a siam tumin sual chu i hnenah a awm reng a ni tih hria la, chu chu thlemtu hnathawh a ni.

    Keimahniah hian chaklohna te kan nei a, chuvang chuan kan theih ang ang a Krista min tlanna thute hril tur kan ni. Timothea chuan hetiang hian a sawi a -

“Thu chu hril rawh; a hunah te, a hun lovah te pawh bei zel rawh; dawh thei taka zirtir chungin an thiam loh hriattir la, zilh la, fuih rawh.” (II Timothea 4:2)
------------------------------


    LITERATURE
- F.Lalrinliana, CLS
    Thu leh hla awm ze nei a phuah emaw, ziak emaw hi Literature chu a ni. Chuti  nih chuan thu awmze nei a phuah leh ziak hian tangkaina a nei a nih chuan RINGTU te hian kan ti thei vek a ni. Mizoram hi Literacy ah hian India ram pumah pahnihna/pathumna kan ni a, Literature ah hian kan sang kan ti em le? Thenkhat chuan ziak kher lo pawh, kan pi leh pu ten nundan phung emaw kalphung an lo siam te pawh hi a huam tel ani an ti bawk. A enga pawh chu ni se literature Sipai pawlin a hman chhan hi kan chian zawk a pawimawh

    Chhandamna Sipai Pawl chuan ziaka rawngbawlna hi a ngai pawimawh em em a. Hei hian rawngbawlna ah nasa takin hna a thawk tih a hre chiang a. Mizoram bikah chuan Sipai te hian ziak a rawngbawlna hi a pawimawhna kan hre tam lo deuh em aw!! Testimony emaw, Sermon emaw, rawngbawlna tur atan a tangkai tak kan ziak hmangin rawng kan bawl thei tih kan hriat nawn a tha khawp mai. Mizoramah hian Sipai Pawl hian ziak a rawngbawlna hi kum 1934 atang khan a lo kalpui tawh a, Thlarau malsawmna mi tam tak ten an hmuh phah a ni. Sipai Pawl chhuah chanchinbute hi kan chhiar ngai lo a nih chuan tuna tang chuan chhiar i ching tawh ila. Kan chanchinbute hi chhungkaw tin ten lak vek tum ta bawk i la, Local Officer leh Pulpit chuangkai thei chin phei chuan lak ngei ngei tum ang u. Tin, kan sawi thiam lo a nih pawhin ziakin rawngbawlna kalpui hi kan ti thei vek tih kan hriat thar a tul khawp mai. Ziak a rawngbawlna hmang hian kan thlen phak lohna ah pawh rawng kan bawl thei a ni. Sipai Pawl hian kum 1878, January atang khan ziak a rawngbawlna hi a lo kalpui tawh a, East London Evangelist hi Salvation Army ten ziak a rawngbawlna kan neih hmasak ber a ni. Tin, kum 1881 khan War Cry ti a thlak a ni ta a, Editor hmasa ber chu C.P Erswhile a ni.

    A tum ber chu Sipai Pawl chanchin, misual piangthar/chhandam chanchin chhuahna a ni a, mi tam tak ten chhandamna an lo hmuh phah a ni. Ziak a rawngbawlna hi ngawireng a rawngbawlna hlawhtling ti te pawhin sawi thin a ni.

    Mizoramah pawh ziak a rawngbawlna hi hun rei tawh tak kum 1934 atang khan kalpui a lo ni tawh a. Hei hian rahtha tak mai chhuahin chhandamna pawh mi tam tak ten an lo hmuh phah tawh a ni. Tunah hian Mizo tawngin ziak a rawngbawlna hi kalpui mek zel a ni a, Sipai Tlangau, Raldona, Chunnun Par, War Cry leh a dangte kalpui mek a ni a, Tin Corps tinah Thalai chanchinbu hi kan nei deuh vek bawk.

    Communist ramah chuan ziak a rawngbawlna hi a pawimawh em em a. A lang a  pau a thuhrilh te hi a harsa in a theih ve loh avangin ziakin thuhril hna hi kalpui a ngai ani. India ramah chuan Sakhaw zalenna kan neih a vangin heng harsatna tam tak hi kan tawk lo deuh a, mahse chuti chung chuan hmun tam takah chuan Kristiante nek chepna a nasa ve tawh hle. Martar pawh tam tak an awm  tawh a ni. Chuvang chuan Bible Society of India pawh in tan nasa tak mai la in sum tak tak sengin, hnam hrang hrang tawngin Bible an let a, chungte chu a thlawn ten sem ani a, Tin keimahni ngei pawhin tlawm zawkin kan lo lei theih phah bawk a ni. Heng Bible Society a Member kan lo nih ve avang hian mi tam tak hnenah ziak in rawng kan bawl tihna a lo nih chu!

    Literature pawimawhna kan hriat chian a pawimawh hle mai. Hei hian kan thawhhhonaah tan tlanna min pe in, Pawl thuikhawmtu pawimawh tak mai a nih mai bakah chhungkuaah tan hona min pe a ni. Sipai Pawl chu chhungkaw lianpui kan nih kha hre thar leh bawk ila. Tin, Kan chanchinbute hi kan chhiar ngun a pawimawh khawp mai. Sipai Pawl rawngbawlna hrang hrangte tarlanna a nih mai bakah, Kan thlarau nun thleng a min chawm liantu a ni thei a ni. Kan Testimony emaw, Sermon  emaw kan ziah thinna khan kan nunah leh midangte thinlungah thlarau Thianghlim in hna a thawk thei a ni tih kan hriat ngun a pawimawh. Thusawi mi i ni lo mai thei, mahse ziak mi i ni thei, I thu ziah a vang khan Thlaraubo tam tak Isua ke bulah i hruai thei.
   
    Bible chhiar tam a pawimawh khawp mai, Pathian thu hi Thlarau ngunhnam, kan raldona hmanrua a ni. Heng bakah hian Kan Thurin leh kan Thlarau nun atana pawimawh lehkhabu te kan chhiar tam a ngai. Lehkhabu chhiar zau chu an an fing nge nge thin. Tin, Kan chanchinbu man te hi a tlawm a, midangte tan pawh laksak hi rawngbawlna pakhat a ni thei tih kan hriat nawn a tha khawp mai. Kan theih phei chuan Home leh Centre kan neihte tan pawh laksak thei ila chu hmasawnna rah tha tak a ni ang. Tin Kohhran dang a mite pawh a la tur hian ti thei phei ila chu a duhawm ngawt ang.

    Corps tinte kan tanna tur pakhat leh chu a man thu ah hian a ni. A man tha tak a kan pek hian kan chanchinbute tluang tak in a chhuah theih phah a, a hun takah Corps  tin ten chanchinbu man hi theh luh tum vek bawk ila a tha ang. Kan chanchinbu te hi sponsor theih a nih hi hre reng bawk ila chu chu Divisional Hqrs ah report theih reng a ni bawk.

    Ziak a rawngbawlna hian Pathian ram zauhna kawng ah hma nasa takin a la tih kan hriat nawn a tha a, Kan thlen phak lohna ah pawh rawng kan bawl thei. Chuvang chuan ziak a rawngbawlna hi nasa leh zual a kalpui theuh turin Sipai tinte kan in ngen a, Ziak a rawng i bawlna khan misual thi tur tam tak chhandamna an chan phah thei a ni tih hria a, nasa leh zual a tan la turin Lalpan min duh a ni.

    Chuvangin misual thi mai tur chhanchhuahna kawngah ringtu ten tih tur kan nei vek. Lal Isua chuan kan zavai a hnenah a tirhkohte hmangin hetiang hian thu min chah a ni – “An rin lohva chu engtin nge an lam theih ang a, a thu an hriat lohva chu eng tin nge an rin theih ang a, Thuhriltu awm lovin engtin nge an rin ang a, Tirh an nih loh chuan engtin nge thu an hril ang” tiin. Kan theihna zawng zawng nen sual a tlu mekte zawng a chhanchhuak turin min ti a nih chu. Kan tih theih a in ang vek lo mai thei, mahse engemaw tih theih erawh chu kan nei vek. Pathian Thlarau Thianghlim i dawn kha midangte tan pawh a ni tih kan hriat thar theuh a pawimawh. Chuvang chuan hriatchianna chuan Isua Krista rinna min neih tir a, Krista thu avang chuan hriatna a lo awm bawk tih kan hmu ani. “Nang malsawmna ni ang che” a tih ang in, midangte tana malsawmna ni thei vek turin theihtawp i chhuah theuh ang u.
----------------------------

PATHIAN THILTUM BULPUI BER PAHNIHTE
Major Sangzuala

1. MISUALTE CHHANDAM TURIN A LO KAL:
    Johana 3:16-17 “.... Amah chu tupawh a ring apiang an boral lohva, chatuana nun an neih theih nan....”

    (a) Chuvangin Lal Isua Krista chu, BC - 4 or 6 lai vel khan a lo pianga, kum 331/2 anihin Kross ah tuarin a thi a, a thisenin chatuan nunna kawng min hawn sak a. Vawiin thleng hian, chu chhandamna chu kawng hawn ala ni reng a. He hun lawmawm hi,“ Mithianghlim lawr (Rapture) in a tawp anga, Daniela Hapta 70-na in a chhunzawm nghal ang.

    (b) Chhandamna chu, rinna a lak tur a ni a. Kan taksa damlai ngeia, chhandamna neih in hriat tur a ni. (Rom 8:16 en ang che).

    (c) Chhandamnih kan inhriat chian hian, Isua Krista chuan, kan Thlarau, Rilru leh Taksa minti thianghlim nghal a ni, Pathian Fa, Aroluahtu kan lo ni ta a ni. (I Thess. 5:23 en rawh)

2. SUAL LAKA MITHIANGHLIMTE CHAUH A RAWN HRUAI ANG :

    I Thess. 5:23. “ Tin, remna Pathian ngei chuan in pumin ti thianghlim che u rawh se....”

    (a) Heihi hriatreng nise : Kan pianthar chiah khan, Pathian Fa, Roluahtu tur kan ni a. Amaherawhchu, Pathian chuan kan lakah phut anei ve nghal chiah bawk a, chu chu : Thianghlima, Thianghlim zel turin min chhandam a ni. Pathian chuan, chawhpawlh nun a duhlo a, A Kohhran, A Mithianghlimte kan nihna chu vawnghim zel turin, he kan taksa hlumbel ah hian min vawn that tir a ni. (Math. 7:21-23, Rome 12:18, Heb 12:14-16, II Korinth 4:7, Chhiar ang che)

    (b) Mihringte pawhin kan Fate chu sual turin kan duhlova, thianghlim leh mitha ni turin kan duh avangin, an chungah kan thikthu a chhia in, A Fa Roluahtu tur te chungah chuan a thikthu a chhia a ni. I Kor. 3:16-17, “Pathian In innih leh Pathian thlarau nangmahni ah a awm reng tih in hrelo em ni le? Tu pawhin Pathian In chu a tihkhawloh chuan, chumi ngei chu Pathian in a ti khawlo ang, Pathian in chu a thianghlim si a chu In chu nangmahni in ni e” a tih ang hian, chuvangin, Thuthlungthar punpui hian, kan taksa damchhung zawng chu thianghlim ngei turin min zirtir a ni. Mithianghlim te chauh Lalpa Pathian chuan a rawn hruai dawn ani tih pawh min zirtir a. Amaherawhchu, hmangaihna a dawhtheihna chuan ala nghak reng che.

    (c) Pathian Hmangaihna leh Dawhtheihna chuan ala nghak reng ache Inpeih rawh Aw inpeih rawh, Isuan a koh lai che hianin inpeih rawh.

    (i) Setana leh Thlarau sualho te chuan, hun tlemte chauh an neih tawh avangin tan anla nasa em em a, Setana pathian anga be tute (Setanic) te chu Mizoramah hian anlo awmve ta hial a, sawi tam ngailovah dah ila, Pathian fa, A roluahtu tura tih thianghlim tawh te hi, sual bawihah tan tir leh tumin a bei nasa zuala, sual pawisaklohna pawh a hluar sawt hle a ni tih kan hria e.

    (ii) Ringtu, Piangthar ngei te chungah hian, sualna tinreng a hluar hle mai a. Hmeichhiat Mipatna, Ruihhlo chi tin reng, Sum lah pai Chiah puam te leh Thinlung lamah khakna zung tinreng te, heng sualna kan sawi bak te pawh ani ang, heng te hmang hian, min run nasa ta hle mai.

    (iii) Ringtu ten engtin nge kan chhanchhuah theih ang? Pathian hmangaihna thinlung pu in, hmangaihna leh duhsakna in, hetiang hian kan chhanchhuak thei ang. An taksa boral hma ngeiin, an mahni hmangaihin, an hnenah kal in chhanchhuah i tum ang u. Entirnan.... 1955, Cachar Dist. a ka awm laiin Nu Pakhat chuan thihna hlimkawr a kai dawn laiin, Awi, ka hlau, ka kal ngamlo, min chhan ru.... tiin a tap nasa mai a. Lalpa hnenah hun tlemte dilin kan tawngtai a, Lalpan min chhanga Counselling an neih hnu chuan, a kalna tur chu ava engin ava nuam em! tiin thlamuang takin a liam ta a ni. Lalpa chu fakin awm rawh se.
---------------------------------------


KRISTA AVANGA MI Â
- Ema Ralte

    Khawvel mit atanga thlir a mi ropui ni lova Van atanga thlira mi ropui nih tluk hi a awm dawn emaw ni le? Mi tam tak chuan Pathian rawng kan bawl dawn hian kan kalsan tur te kan ngaihtuah a, kan ui ngawih ngawih thin. Kan sual tlan tura he khawvela tihduhdahna tinreng tuara min rawn tlantu Isua Krista khan min tlanna tura a kalsan zawng zawngte kha han ngaihtuah ila, keinin kalsan kan hreh em em te hi chu a nep thin hle awm e.

    Isua Krista hnung kan zuina kawngah hian thenkhat tan chuan kan zirlai te, kan degree hrawl pui pui te leh kan hna tha tak tak te chu kalsan a ngai thin a, mi tam tak - kan thiante leh keimahni chhungte ngei pawhin ‘A â anih hi’ tih te hial pawha min sawi hun leh min nuihsawh hun ala awm ang. Chung hunah chuan ‘Pathian avanga mi â’ nih hi i zak angem? Nge an nuih leh an kawh avang che in Pathian rawngbawl aiin i kalsan tak i ui ngawih ngawih te hnenah khan i kir leh dawn? Chutiang ang dinhmunah i ding anih chuan Isua’n vanram i luh ve theih nana a kalsan kha ngaihtuah let ang che.

    Pathian tana mi inpe leh hun pum Pathian hnena hlan a ‘Pathian avanga â’ tam tak te hi mi tlawm te te te an ni hlawm a, lehkhathiamna lamah pawh mi zirsang tak tak an ni lem lo. Mahse Pathian hian ama tana mi â te hi an retheih leh an hrehawm a phal lova, Pathian rawngbawltu tak tak tlachham leh chawkhawn an awm in ka ringlo. Mi tam tak chuan Pathian rawngbawl hi ‘channa’ leh ‘hlohna’ tih te in an sawi fo thin a, a dikna lai che chu a awm maithei, amaherawhchu Pathian tana thahnemngai taka rawngbawltute hian ‘chan’ aiin ‘hlawkna’ tam tak an hmu thin a, malsawmna tam tak an dawng thin bawk a ni.

    Pathianin rawngbawl tura min koh hian kan ‘degree’ a en lova, kan ‘inpekna’ a en zawk a ni. Kohna i dawng anih chuan ‘Heta hi Lalpa ka awm e’ tia kohna i chhan ngamna atang chiahin Pathian ropuina nangmahah a langchhuak dawn a ni. ‘Lalpa kei chu ka tlinglo’ tiin Pathian kohna kan chhang thin a ni maithei a, mahse Pathian hian mi tling te a ko lova, a koh a te a ti tling zawk thin a ni.

    Pathian rawng i bawl avanga miten an nuih rual che khan Van lamah pawh A tana i rinawm tlat avangin Pathian hi alo nui ve ngei ang.
Krista vanga tuar ngam,
Krista vanga chan ngam;
Krista vanga rethei ngam,
Krista vanga mualphona zawng zawng
I phur ngam dawn em le?
------------------------------------------

MIHRING HMUH THEIHLOH PATHIAN
- Major Lalthansanga

Bible chan chhiar tur te: I Korinth 2:9-10, Jeremia 10:10

1. Hmuh theihloh Pathian chu: Pathian chu, Thlarau a nia, hmuhtheihloh a chu, thilsiam ah te leh thilmak ti te in, a Pathian nihna chu a in lan thin. Beram vengtu Mosian beram a ven laiin, Pathian chu thingbukah meialh angin a inlan a. Chu thil mak tak chu Mosia’n en chian tuma a va hnaih chuan Aw chuan, “Mosi, i dinna kha hmun thianghlim a ni e, i pheikhawk kha phelh rawh,” a ti a. Chumi hnu chuan Aw chuan a hnenah thu a sawi a, “Aigupta rama ka mi Israel te an hreawm zia ka hria, Aigupta ram ah kal la, Aigupta Lal Pharoa hnenah kal la, anni chu an saltanna ata hruaichhuak ang che.” tiin.

2. Mihring rilru a lut ngailo: Mosia hnena Pathian in thu a sawi hma chuan Pathian hriatna emaw, ngaihtuahna a la awmlo niin a lang. Amaherawhchu, chu chu a ni tih chiang taka sawina awmlo mahse, Jeremia chuan, “Lalpa chu, Pathian tak a ni a, Pathian nung chatuan Lal a ni e...” tih thu a lo sawi tawh a ni (Jeremia 10:10) .

    Hmuh theihloh Pathian chu mihring hnenah thu leh thiltihin a inlar a, a mi hmante hnenah hriattirna a puang chhuak a, chung mi te chu, “Pathian Zawlnei” tiin kan sawi.

    Mihring rilru a lut ngailo leh ngaihtuah phakloh chu, chhuina leh ngaihtuahna a awm ngailo ni in a lang. Amaherawhchu, kan Pathian nung chu a hun takah mihring te hnenah a inpuang chhuak thin.

3. Mihring zingah: Mosia hnena Pathian in thu a sawi hnu chuan, amah hmangaihtute tana Ram a buatsaih chu thinlung lamah tihlan in a awm a. Hetiang in tirhkoh chuan a sawichhuak a, “Thuruk inthup kan ropuina tur chu” tiin. Chu chu Pathian hmangaih tute chanvo an luah tur chu a ni.

    Joba pawhin hetiang hian a sawi. “Ka tlantu chu a nung tih ka hre si a, Nakinah chuan leiah hian a lo la ding ang. Ka vun hi tihchhiata a awm hnuin, Ka tisain Pathian ka la hmu ang. Keima tan ngei ka la hmu ang a, Ka mitin a la thlir ang a, mi dang ni lovin,” a ti (Joba 19:25-27).

4. Nunna: Hei tak hi Korin mite hnena Tirhkoh Paula’n sawilan a tum chu a ni. Hei hi hrelo tute tan chuan thuruk anih avangin nunna thuruk chu an hre theilo. Thlarau mit chauha hmuhtheih a nih avangin chatuan atan Pathianin a buatsaih chu mihring mihrinna chuan a hmu in a chhui pha lo.

    Paula chuan a au chhuahpui a, “Hria sela ropuina Lal hi an khengbet lovang,” a lo ti a ni. Chu chu Pathian in amah hmangaih tute tan a a ruat a nih avangin.

    Pathianin lei vaivut chu mihring ni turin a siam a, chu mihring chu Pathian lim leh Pathian anga siam a ni, ama nunna ngei a tih nun a ni. Chu minung chu Eden huanah chuan engkim chunga thunei tura a ruat a ni a, thuneihna a pek chu minung chu a hmingah Adama a sa a. Eden hunah chuan a dah a, mihring amah chauh a awm chu a rem lova a ti a. Adama chu tui takin a muthilh tir a, chutihlai chuan Adama nakruh pakhat a la a, mihring ah a siam a, chu chu hmeichhia a ti a. A hmingah Euvi a sa a. Chutichuan minung a lo ni ta a, chu chu Adama hnenah a pe a.


5. Chhia leh tha hriatna: Pathianin Evi leh Adama chu an awm dan tur engkim a relfel hnu chuan an hnenah, “Engkimah thuneihna in nei ang a, thingrah te hi in ei thei ang a, amaherawhchu, Chhia leh Tha hriatna erawh hi chu in ei tur a ni lo. In ei chuan in ei ni la la in in thi ang,” a ti a.

    Chutia hlim taka an awm lai chuan Rul a lo kal a, Rul hnenah chuan Pathianin an hnena a thupek te chu an lo hrilh a. Amaherawh chu, Chhia leh Tha hriatna thing rah erawh hi chu, “In ei tur a ni lo, in ei chuan in ei ni la la in in thi ang.” min ti, tiin Rul hnenah chuan an lo hrilh a.

    Rul chuan, “Thi teh suh e, in ei chuan amah angin in lo fing ang a, chhia leh tha in hria ang a amah ang in awm a hlau a nih chu,” a ti a. Rul in a kalsan hnu chuan Evi chuan Thing rah chu a en reng a, Evi chuan a lova, a ei ta a. Adama pawh chu a pe a, a ei ve ta a. Chuta tang chuan thihna chu alo awm ta a.

    Evi leh Adama chuan chuta tang chuan saruaka awm an nih chu an lo in hre ta a. An saruak khuh nan theipui hnah chu puanfenah an siam a, an feng ta a. Pathianin an hnenah, “Tun atang chuan, nangmahni in ei in zawng tawh ang” a ti a. Huan atang chuan an chhuak a. Rul hnenah chuan Pathian chuan, “Nangpawh tun atang chuan, bawkvakin leiah i tleng ang a, vaivut i ei tawh ang.” a ti bawk a. Evi leh Adama bawhchhiatna avang chuan mihring chungah thihna a lo awm ta a ni.

    Thihna lo awm tak avang chuan, nun nei leh tur chuan thihna bawk chu a tul dawn tih Pathian chuan a hria. Duh taka a siam mihring te nun leh na tur chuan remruat a lo ngai ta. Isaia chuan hetiangin a sawi a, “Mi bawlhhlawh angin kan lo awm ta vek si a, kan felna zawng zawngte pawh silhfen bawlhhlawh ang a ni a: kan zain hnah angin kan vuai thin a; kan khawlohnate hian thli angin min leh bo thin.” (Isaia 64:6)

6.    Beng hriat ngailoh: Pathian thuruk chu, mihringte hnenah thu a puanchhuah ni lovin, mitin hnena hriattirna chu thinlung leh tihtakzeta amah zawng tute hnena pek a ni. Beng hriata sawi nilovin, thinlung lamah hriattir an ni zawk. Hetiang hian kan hmu, “In hmaah nunna leh thihna, malsawmna leh ânchhia ka dah tih tunah hian in chungchang thua hretu atan lei leh van ka ko a ni; chutichuan nunna chu thlang rawh u, in nun theih nan, nangni leh inthlahte nen” tiin (Deuteronomy 30:19).

    He nunna thu, Bible chang ka han rarlan tak hi mahni theuhah chu thuruk chu kan hriattheihna tur chuan tihtakzet a Pathian chu thinlung lama kan dawn theihna turin Pathianin amah hmangaihtute chu an thinlung ah thu chu a hriattir ta zawk thin a, chu tak chu a ni beng a hriat ngailoh chu. Tihtakzet a amah zawngtute lo chuan an hmuin an hrethiam theilo. Thinlung entu Pathian a ni si a.

7.    Ram buatsaih chu: Ringtute tan a chatuan atana Ram luahtur chatuan nun nei tute chan tur ram chu Pathianin amah hmangaihtute tana a buatsaih Ram a cheng tur chuan amah hmangaihtute tan chauh a buatsaih chu a ni.

    “Chatuana nunna in nei tih in inhriat theih nan nangni Pathian Fapa hming ringtute hnenah heng thu hi ka ziak a ni.”
(I Johana 5:13)
-----------------------------------------

INKHAWM HI.....
- Ema Ralte

    Mi nunah hmuh tur leh zir tur i hmuh loh avangin i inkhawm loh phah thin em? Inkhawm thinte nunah engmah hmuh tur nei lova i inhriat avangin Biak In i thlenglo thin em? Ngatinge midangte nun avangin Biak In i thlen loh thin? Anni te chuan a lemin Pathian rawng an lo bawl pawh a ni thei, khawvel thil nen an kalpui kawp pawh a ni thei, Pathianin an chungah ro a rel dawn tih hi i hria a ni lawm mi? Chutiang anih chuan engvangin nge Pathian Biakbuk hi i thlen loh thin le?

    Inkhawm lovin inah Bible kan chhiar a, kan tawngtai pawh a ni maithei. “Inkhawm ang tho alawm ka nih” pawh kan lo ti thin maithei, mahse a ‘ang’ ringawt hi Pathian hian a pawm angem? Damlohna avang leh rokhawlhna lian tak avang tein Pathian Biakbuk kan thleng theilo chu thuhran ni ta se la, dam reng si a Pathianni em pawh inkhawm lova kan awm hi Pathian hian engtin nge a ngaih thin ang aw.....?

    Inkhawm thinte nunah engmah i hmulo pawh a ni maithei, mahse Pathian chuan inkhawm loh aiin inkhawm turin a duh zawk thin che in ka ring. Pathian biak buk thlen hrim hrim hian kan hriat loh hian malsawmna leh hlawkna hi kan hawn fo thin a ni. A ni serh ni a thawhlawm iva thlak a, Pathian fak hla a Biakbukah ngei iva sak khan Pathian hi a lawm loh aiin a lawm a rinawm zawk a, nangmah pawh i hlim ngei ang.

    Mi tute pawh hi kan thlarau chan a inchen lova, thenkhat kan hlima kan lam durh durh lai hian thenkhat erawh chu ngawi rengin kut pawh beng hran chuang lovin Pathian fak hla te pawh kan sa thin. Midangte chetzia leh an awmdan avanga Pathian fak i theilo leh Pathian Biakbuk i thleng theilo anih chuan midangte ni lovin nangmah i in enfiah a tul zawk a rinawm. Hla hriltu in i nin viau tawh laia alo lak nawn avanga a lehpek inkhawmlo anih chuan ‘Setana tactic’ hi a hlawhtling viau maithei a ni.

    “Inkhawm hi a ni berlo” ilo ti a ni maithei, mahse a ‘ber’ a zawng chuan Inkhawmloh pawh hi a ni ber chuanglo. Inkhawm pawh a nih ber loh phei chuan inkhawmloh chu a ni berlo lehzual maithei a ni. “Thinlung a pawimawh zawk” ilo ti pawh a ni maithei, mahse dam reng chung si a Pathian Biakbuk em pawh thleng peihlo ‘thinlung’ pu chungah hian Pathian hi a lawm dawn bik em ni?

    ‘Inkhawm hi a tha ber e, a dik ber e, a pawimawh ber e’ ka ti hauhlo, amaherawhchu Pathian Biakina kan Inkhawm avanga malsawmna keimahni a rawn thleng tam tak te hi kan chhiar thiamlo fo thin. Pathian faka kan aw kan hman a, kan kut kan ben a, Pathian Biakbuk lam pana kan ke kan pen duhna thinlung hian Pathian hi a ti lawm ngei ngei ang.

    Inkhawm thinte pawh engmah anni biklo ti mai lovin nangmah kha han inkhawm sak la, ‘eng emaw’ han ni keuh teh.... I inkhawm zing tial tial anga, nuam i ti tial tial mai ang. Hun alo kal zel anga inkhawm i chak ngawi ngawih huna i inkhawm theih loh hun alo la thleng dawn ania.
--------------------------------------------------


LAWMMAN TAM BER LALPA TIH


·*    Finna hmu chhuaktu chu a nihlawh a,hriatthiamna hmu chhuaktu pawh. Tangka raw peipun aiin a peipun chu a tha zawk si a, a help pawh rangkachak tha mi aiin. Lunghlu sen mi aiin a hlu a; thil i duhthusam theih ang zawng zawng pawhin a hen lo. A kut ding lamah dam reina a awm a, a kut vei lamah sum leh ropuina. A kawngte chu nun khaw nawmna kawng a ni a, a kawng zawng zawng chu thlamuanna a ni. (Thuf. 3:13–17)

·*    Lalpa tihna chuan nunna a thlen a, a nei apiang chu lungawi takin an awm ang a, thil tha lo tlakbuakin an awm loving. (Thuf. 19:23)

*    Hawh u, naupangte u, ka thu ngaithla rawh u: Lalpa tih dan ka lo zirtir ang che u. Thatna a hmuh theih nana, nunna duha damrei ngaina mi chu tunge ni? I lei chu sual lakah veng tha la, i hmui chu tihderna thu sawi lo turin veng tha rawh. (Sam 34:11-13)   
Ngai rawh, Lalpa tih hi, hei ngei hi finna a ni. (Job. 28:28)

*    Ngai rawh, Lalpa tih hi, hei ngei hi finna a ni. (Job. 28:28)

*    Inngaihtlawmna leh Lalpa tih man chu sum te, chawimawina te, nunnate a ni. (Thuf. 22:4)

*    Lalpa tihna hi finna zirtirtu a ni. (Thuf. 15:33)
-----------------------------------------------------

NGAIHTUAH PEIH TE TAN

#    Mi fel bula awm chu a nuamin a hahdam thlak a, mi fel lutuk bula awm erawh a hahthlak.

#    Midangte tana hnawk leh ngeiawm tawk chiaha fel hi a awm theih a, hetiang mi hian thalai tam tak Kohhran leh Khawtlanga inhmang tur an hnawtdarh thin.

#    Keimahni avangin midangten Inkhawm an chak nge Keimahni avanga Biakin thlen loh phah an awm?

#    Thil kan sawi dawnin midangte tan a pawi thei em tih ngaihtuah hmasak phawt hi thil tha tak a ni a, mi tamna a mei nei deuha mimal taka inkah leh in sawisel hian thil pawi tak a thlen thei a, a tha lam aiin a thalo lam a thlen duh chawk.

#    Mi tam takin Kohhran a inhmang tak tak te bul aia inhmang ngai lo leh rui ve zeuh zeuh thin (ka tawng huatthu suhah) te bula awm nuam an tih fo nachhan hi a kul ataia kohhran leh khawtlanga inhmang te hian in enlet nan hmang thei se a tha hle ang.

#    Keimahni nia kan inhriat dan ang hian kan rawngbawlpui, kan unau leh kan chhungkua ami ten min hmu ve angem?

#    Miin kan chanchin midangte bula an sawiin engtin nge min sawi thin ang? Keimahni kan inhriat dan ai hian kan bul vel ami te hian min hrechiang zawk si a.

#    Kohhrana a kul a taia inhmang em em, mahni eizawnna, hnathawhna leh zirna a titha peih leh silo te hi Pathian in engtin nge a ngaih ang?

#    Kan thalai pui ten an harsatna tak tak te min share ngam nge an harsatna te kan hriat an hlau ngawih ngawih zawk?

#    Khawilo a vahchhuahna neihin bus/motor kan chuanna ah kan member te kan bulah an thu chak nge kan bula thut ai chuan din an duh thin zawk?

#    Miin an sawisel che in “Enge anni pawh an nih bik” tiin an dik lohna leh an fellohna te sawi ve mai lo la, an sawiselna che chu ngun takin ngaihtuah la, insiamthat ngaihna i nei anih chuan ngawih rengin chu an sawiselna che chu insiamthat nan hmang la, a sawiseltu che chuan a ngaisang let daih ang che.
--------------------------------------

SALVATION ARMY THEOLOGY
Major Zothanmawia,
Divisional Commander

    Theology : Theo = Pathian Logy = Thu tihna ani a , chuvangin Pathian chungchang leh Pathian thu zirna emaw pawmdan ti in sawi ila kan thelh lem lo ang chu maw?
    Salvation Army theology kan han tih hian Chhandamna Sipai Pawlin Pathian thu zirdan emaw pawm dan /kalpui dan emaw tiin kan thupui hi dah mai ila kan ti sual hran lo ang chu!

     Hmuchhuaktu William Booth-a chuan (Soup, Soap, Salvation) eitur pe la bualfai la, chhandam rawh tih thupui a hmangin Salvation Army rawngbawlna chu kum 1865 atang tawh khan Pathian in a ruat na avangin a tan a. Hemi chungchang hi kan Lalpa Isua Krista’n he khawvel a rawngbawl na a tan tirh a Zawlnei Isaia lehkhabu ami “Riangvaite hnenah Chanchintha hril tura mi ruat avangin Lalpa Thlarau chu ka chungah a awm;  Ani chuan sal te hnen a chhuahna thu leh, mitdel te hnen a mit var neih lehna thu sawi tur te, tihduhdah tuar te chhuah tir na turte, Lalpa lungawi kum thu sawi tur te in, mi tir a ni,” (Luka  8:18-19) ti a rawngbawlna atan nen hian a in zul hle a ni.

    Tamil Nadu theological seminary a Old Testament Prof. Bas Wallengah (1998 German mi) chuan M.Th. zirlai te zinga SA awm ve hnen ah chuan Salvation Army in Theology ropui leh tha tak mai in nei a i hria em? tiin a zawt a, chu zirlai chuan han chhan ngaihna mai  a hriat loh avangin an class ah chuan hrilh hai takin theology hran SA in a neih a hriat loh thu in a chhang a. Professor chuan hetiang hian SA Theology tha tak chu ‘Three S’ Soup, Soap, Salvation hi ani e tiin a sawi fiah a ni, SA lo pian chhuah dan hi tipalh (accidental) a ni lo Pathian remruat a ni, tiin a sawi , a sawi zel dan chuan “ Khatih hun lai a kohhran te khan  pachhia leh rethei te, riangvai leh hnehchhiah tuar te, hmeithhai leh chhuan chham te a hlam chhiah a an tanna chhanchhuahna rawngbawlna an kalpui loh avangin William Booth-a hmangin he Salvation Army Kohhran hi a lo piang ta a ni “ a ti. Riltam te, saruak te leh hnehchhiahte thlahthlam hi kan Lalpa leh Pathian Mission ani lo reng a, Kohhran ho in heng mite an hlamchhiah thin na hi a hliam  tuar chu a ni (Mathaia 25:44-45).

Sawi dan dang chu :- Transforming lives, caring for the people and reforming society through God’s Power in Christ (Nun ti danglam a,mihring te enkawl a, Krista a Pathian thiltihtheihna hmanga khawtlang nun siam that) tih a ni.

    General John Gowans chuan hetiang hian tawngkam mawi zawkin  a rawn sawi chhuak leh a “Saving Souls> Growing Saints> Serving Suffering Humanity” (Thlarau chhandam a, mi thianghlim ni tura enkawl a, mihhring tuartu te rawngbawl sak /chhawmdawl) tiin.

    Isua Krista ringtu Chhandamna sipai a in siam te hian Pathian thu kan rindan leh kalpui dan hi engtin nge kan nunpui thin?

    Chhandamna Sipai chu- ‘Mihring (Puittling/Naupang) Isua Kriata Chhandamna chang tawh, midangten chhandamna an chan ve theihna tura beitu, chhunglam leh pawnlam thianghlimna nunpui tura chhandamna Sipai pawla member puitling te an ni’. He nihna atrang hian hengte hi thlir i la:-

SAVING SOULS (Salvation): Boralte zawnga chhandam turin mihring fapa hi a lokal a ni (Luka 19:10). Chanchintha avanga chhandamna la changlo ten an chan a, nunthar chhandam hlimna an hmuh theih nan, in hmuam-up leh puithuna atthlak hi William Bootha rawngbawlna kalpui dan ani lova. Thlarau bo leh Krista chhandamna mamawha zawngtute ngam tak leh inthlahrung hauh lova kohhran huang an lo lawi luh a telve theihna tur kawng siamsak hi Pathian leh Lal Isua krista thil tum bul a ni. Sual avanga Pathian hlata awmte sual leh sualna in a sual in a bawih mek avang a Pathian pawh ngam lo leh Pathian Lalram a chanvo nei ve lo ni a in hria te, an sual tih thin avanga hremhmun kawng zawh mek ten engti kawng mah a Pathian ramah chanvo an nei thei tawh lo ni a setana bumna avanga an dam chhung nun hrehawm ti leh sual in  kun tlawk tlawk a, a thunun tlat na atang a chhandamna: Isua Krista Kross a inhlanna avanga lo thleng chuan, sual hrenga an tanna lak a ta chhuah zalen an nih na thu leh Pathian chu an chungah a lungawi a ni tih Isua chanchintha hi tluangtlam leh mi zawng zawng huap zo a puan chhuan na hi Army in rawngbawlna a kalpui dan a ni.

    Chhandamna chungchang thuah hian daidanna bang ‘ruatlok’ tih ang chu te hi a thu kalpui dan leh zirtir dan a ni ngai lo. Kohhran thenkhat Theology zirte chauh in Pathian thu te hi sawitur a ni ti tu te ang lo tak in, ringtu zawn zawngte chu Isua Krista chhandamna chanchintha tlangaupui tu an ni tih hi a pawm dan leh a kalpui dan chu ani (Luka 16:15,23,45) Krista chhandamna pawm a nun pui tu te chu rinna avang a mi tih thianghlim ni in Pathian lak a thiam chang (Tirhkohte Thiltih 13:39a: I Korinth 6:11) an ni.

GROWING SAINTS (Soap): Thianghlimna hi Pathian zia leh nihna a nih avangin leh Pathian hmuhna kawng a nih tlat avang in mi piangthar/ringtute chuan he nun hu an neih ngei hi Pathian duhdan leh phut a nih avangin uar takin a zirtir a ni. Thianghlimna chu sual leh bawlhhlawh kai lo Pathian lawm zawng ani a . Thianghlimna lovin tu man Lalpa kan hmuh theih dawn loh avang in, Pathian anna nun nei a, Amah nen kan inpawl a kan in awm theihna tur in mihring sualna in a tih khawloh mek te leh tih bawlhhlawh mek te chu Krista thisen in tlenfai kan ni a tih thianghlim kan nih tawh thu hmang a, Pathian tan a mi tling leh thianghlim ni tur a chanchintha hmanga lo buatsaih a lo thanglian tur a kawhhmuh leh zirtir te hi kan tum chu a ni.

    Baptisma chungchanga Salvation Army pawm dan: Baptisma tih hi Greek tawng “Hnim phum” tih atang a lo kal ani a, hei hian a kawh chu Kristian hmasate tui a an in hnim thin chu a ni.Tui Baptisma  hi kohhran tamtak chuan - chhunglam thatna pe theilo leh chhandamna thlen theitu ani lo tih hi an pawm dan ani a. Rinna avanga chhandamna chu awm leh neih turah an ngai na chungin tih makmawh an tih loh chuan an ngaih ngamtlat silo an rinna nun bawih tlat tute zinga mi a ni.
   

    Pathian khawngaihna misual kan la nih lai pawh a fapa Isua Krista thihna chuan misualte thiam chantirin chhandamna kawng a rawn hawng a, chatuan nun kan neih leh theihna hi thil tih leh hmanrua, serh leh sang lam nilo in, a thlawnin rinna a dawn leh chan tur a ni(Eph  2:8-9). Pawn lam hmuh theih nilo in Thlalrau Thianghlim a Baptisma hi a pawimawh zawk a chu  a ni,a ti. Lal Isua a lo kal dawn avanga a simna Baptisma lo buatsaihtu Johana khan ngaisang takin Thlalru thianghlim leh mei in a baptist dawn ani tih a thuihruai leh thu ngaithla tute a hriattir ani (Mat 3:11-12). Phat rual loh in Isua pawhin Tui Baptisma  a chan dawn khan Tlarau lam thil nilo, felna dan (Mosia dan) zawm famkim nan chauh a in baptis tir a ni. Amah Isua ngeiin misual te tlanna tur thihna baptisma tak tak chu a hmabak ani tih a sawi (Lk 12:50). Isua chuauh hi kawng leh thutak leh nunna; chhandamna leh chatuan then theihna kawng awm chhun anih zia leh hmanro dang reng reng a aiawh tur awm a ngaih loh zia tih lan nan  (Jh 14:6), kalvari tlanga a bula kross a an khenbehve khan “Rinna avanga khawngaihna a chhandamna” chu a hmu anih kha (Lk 23:42-43). A Baptis tur leh Baptistu tur an khenbeh lai a he  thil lo thleng hian thinlung a Krista rin a pawimawh zia min zirtirin min hmuh chian tir hle ani. Paula khan “Krista chuan baptis tur in min ti silo” a ti ngat ani (I Kor 1:17).
    Isua kan rinna siamtu leh tifamkimtu aia hmanraw dang emaw a thil siam ngaihhlut tir zawkna ni a alan bawk avangin leh Chhandamna atan a thil tul anih bawk loh avangin SA chuan hmanve kher tul ati lo ani (Heb 12:14). Baptisma hi kohhran pawl dangin an lo hmang anih pawhin sawiselna anei lova,ti tawp turin a hneh a tum hran lova; a en hran phah chuanglo ani. Amaherawh chu hriatpuina chiang taka SA in tih lan dan chu Mhringte hi Pathiannin a hmangaih a ni tih lan chhuah tir hi ani. Hei hi Thlarau Thianghlim baptisma dik tak chu ani.
-------------------------------------------------------

HAN NGAIHTUAH HMASA TEH
- Ema Ralte

#    Midang tana thu ngaihthlak nuamlo i sawi hma in hei hi ngaihtuah hmasa teh – Tawngtheilo tam tak an awm tih hi.

#    Thawmhnaw manto tak tak i awta i ngen hma in hei hi ngaihtuah hmasa teh – Kawr hak tur nei lo tam tak an awm tih hi.

#    Nun i nin thu i sawi hma in hei hi ngaihtuah hmasa teh – An tum hma aia thi tam tak an awm tih hi.

#    An sual avanga kutzungchala mi i kawh hma in hei hi ngaihtuah hmasa teh – Tumah sual neilo kan awmlo tih hi.

#    Mi tlin lohna i sawi hma in hei hi ngaihtuah hmasa teh – Tlinlohna nei ve tho i ni tih hi.

#    Midang chanchin a chhe zawnga i sawi hma in hei hi ngaihtuah hmasa teh  - Mi chanchin i sawi ang chiah khan i chanchin miten sawi ve se i duh angem tih hi.

#    Pathian fak nana i kut te, i ke te i ui anih chuan hei hi ngaihtuah teh – Pathian fak nana kut phar chak ngawih ngawih ban phar tur nei lo te, Pathian fak nana lam chak ngawih ngawih ke nei tawhlo tam tak an awm tih hi.

#    Inkhawm huna inkhawm lova kan hun kan khawhral mai mai lai hian hei hi i ngaihtuah ang u – Inkhawm chak em em, natna hrehawm tak takin a man avanga inkhawm theilo tam tak an awm tih hi.

#    Rilru hah avanga I in dawm kum hma in hei hi ngaihtuah teh – I la dam alawm tih hi.

#    I talent dawn te Pathian rawngbawlna atan i ui hma in hei hi ngaihtuah hmasa teh – Pathianin talent a pek che kha a laksak leh thei che tih hi.

“Thil thlawnpek ngun takin chhiar theuh la,
Pathianin mihring a vur thin kha;
Mal in chhiar la nangma chan mai chu,
Mak ti rengin i fak phawt ang a petu.”

    Mi tam tak hian malsawmna kan dawn te hi chhiar lovin midangten malsawmna an dawn te, midangte kuta sahrang lo awm te hi kan hmu lian zawk fo thin a, hei hi thil pawi tak a ni. Pathian hnen atanga malsawmna kan dawn zawng zawngte han ngaihtuah ila, chhiar theih loh khawpa tam hi tute pawh hian kan dawng a ni. Pathianin hriselna min pek ringawt te hi ngaihtuah ila, Pathian hi fak lo thei kan ni lo. Pathian fakin nui ila, thil thalo kan rilru a rawn awm thei te chu paih bovin a awm thei dawn a ni.



PHUNCHIARNA MANGTHA LE

K Lalrosanga
Asst. Games & Sports i/c

    Zing khaw eng mawi tak leh nuam takah i pindan ata chhuakin, boruak thianghlim leh zangkhai tak te dawngin Pathian hnenah a thilsiam ropui takte avangin lawmthu i  sawi thin em? I duh dan dan in khaw awm dan tur i siam thei em?

    Mi tam tak chuan khua alo lumin kan sawisel a, ruah alo sur a kan sawisel leh bawrh bawrh bawk a. Ram thenkhat ah chuan khua a kheng vawng  vawng a, hmun thenkhat-ah erawh chuan tui a lo lian a, heng khawvelin a ken tel thil chi hrang hrang kan chunga lo thleng thei te tuar  lo a kan awm vang te hian Pathian hnena lawmthu sawi mawlh mawlh tur kan ni asin.

    Kan duh duh ei thei a kan awm te hi a man a to asin. Riltam ngawih ngawih eitur nei lo te an tamzia hi! Zing kan thawh veleh-a boruak thiang vawt kak mai kan hip kawk kawk te hi, pawisa a leitur chu nise a va han to dawn em! Chuvang chuan phunnawi  lo in engkim siamtu  kan Pathian hi  i fak mawlh  mawlh ang u.

    Phunchiar hi mi zawng zawngin kan ching a, kan  phunchhiar tih pawh kan in hre hman meuh lo.  Amaherawhchu, phunchiarna hi lawmthu sawi khingpui lehlam chiah a ni tih hi kan hriat reng a pawimawh khawp mai. Kan chhungte’n eitur min siamsak mek laia kan lo sawisel hi in ngaihdam tawn lohna entirtu a ni.

    I phunchiar a, sawisel i chin hian a  nihna takah chuan Pathianin nitin-a i nuna ro a rel dana i sawisel tihna a ni. Lawmna rilru hian Pathian thiltihtheihna chu kan nunah a luan luh tir thin a, phunnawi na hian Pathian thiltheihna a dal thung a ni.

    Kan Bible Thianghlim chuan hetiang hian a sawi a -

“Mipuite chuan Lalpa benghriat ah phunnawi hmang te angin thil thalo tak an sawi thin a, chu chu Lalpan a lo hriat in a thin a alh ta.” (Numbers 11:1)

    Isreal fate chu Mosia’n Aigupta atanga a hruai  chhuah khan Lalpa chuan a awmpui reng a, an duh apiang a pe a. Tui, Manna, Sa (Vahmim) a pe a ni.

    Tuipui Sen a kan pui a, mei alh leh chhum dingin  a veng tlat  a, chuti chung chuan a tui pek te, manna, sa a pek te chu tui lo tiin an sawisel a, Aigupta ram lam te an ngai a, Pathian chuan a thu an  awih dawn lo tih an hre reng chungin a hnam thlan Isreal fate chu a hruai zel a. Pathian dang te siamin milem te an lo bia a ni tih kan hre awm e.

    Pathian chu a thin a ur ta a, a hnam thlan Israel te chu thlaler ah kum 40 lai mai a vahvaih tir ta a. Thlalerah an tlu hlum vek a, ram a lo tiam Kanan ram thleng thei chu mi pahnih (2) chauh an ni tih kan Bible chuan min hrilh a ni.

    Han ngaihtuah la phunnawi lo in amah han fak teh, malsawmna chhiarsen loh in a vur ngei ang che. I nun dan te, i hun hman te chu a lo hlimawm zawk tawh ngei ang. Isua’n Kraws ah kan phunnawi na te chu alo keng tel tawh si a.


LEPROSY SUNDAY

- Nelson Lalthanpuia, Asst. Leader

    Vawiin Leprosy Sundayah hian chanhai riangvai khawngaihthlak awm tak Pharte tan rilru ah a awm a, tanpui an ngaihzia te, an dinhmun hrehawm ziate leh kan tanpui theih dante a tarlan a tha awm e.

    Khawvel a phar hmun thuma thena hmun hnih hi kan chenna ram India ah hian an awm a. The Leprosy Mission hi 1874 ah Irish Missionary Wellesley Corby Baily chuan Punjab State a Ambala khuaah kan ram, India ram ngeiah a rawn din a ni. Pharte hian khawiah mah hmun tha an chang ngai lova, an phar tawh chuan chhungkua atangin hnawhchhuan an ni a, an dam hnuah pawh an chhungte chuan an duh tawh lo a ni.

    Phar naupangte pawh School-ah an admit duhlo a, in hnamhnawihna tur engmah kan Society ah hian an nei lova, engah mah an lenglo a ni. He leiah hrehawm takin an awm a, thi ta se an thlarau chatuan hremhmunah an kal dawn bawk si a. Kan Lal Isua hian hrehawm an tuar na lutuk tur hi a phal lova, a hmangaih em em a, a ti thianghlim a ni.

    Lal Isua hmangaih pharte chuan “In duh chuan min ti thianghlim thei e” tiin min au lawm lawm a, engtin nge kan chhan dawn le?

1) Founder’s Gift    -    Rs. 1,000/-
2) Patron Member    -    Rs. 500/-
3) Life Member    -    Rs. 300/-
4) Memorial Gift    -    Rs. 200/-
5) Anniversary Gift    -    Rs. 200/-
6) Annual Member    -    Rs. 100/-
7) Junior Member    -    Rs. 10/-
8) Donation - Engzat pawh a theih a, tlem lua a awm lo.

    Heng thilpek leh membership hrang hrang hmangte hian pharte hi kan ti thianghlim thei a, kan thilpek te avangin malsawmna tam tak an lo dawn theih phah dawn a ni. I tanpuina chanhai riangvai ten an nghak a ni.




THLARAU MITVAR NEIH A HUN

Major Sangzuala

    Thingrem pakhat ah hian Carpentary hmanrua an dahkhawm rui mai a, Mistiri ni ve lo chuan a hman ngaihna in hre kher lovang. I tana tangkai kher lo ang. Mistiri erawh chuan tangkai takin a hmang thei nghal a, chuvangin Pathian Thlarau hruaina kan mamawh a, a pahnihna atan chuan kan Holy Bible hi kan zir ngun em em a tul a ni. Thupuan bung 2-3 chhung hi ngun takin chhiar tur ani. Bung 3 tawp lam a, Laodikei Kohhran atang in tawite ilo zir lawk ila.

    He Kohhran hi lum silo, vawt silo, Kohhran a ni a. Kum 1900 atanga Mi thianghlim lawr (Rapture) thleng a Kohhran Nungchang chu a ni. Laodikei chu Greek tawng thu pahnih atanga chher chhuah a nia, a hmasa zawk chu, ‘Mipui’ tihna ani a, a thu hnihna chu, ‘Rorelna’ tih na a ni. Chu chu kan lakkhawm  chuan, ‘Mipui rorelna’ emaw ‘Mipui endikna’ a Kohhran inhruaina a entir a. (The people decade) chu. Asia Minor, Phrygea khawpui lian ber a ni. Laodikei chu Kohhran hnuhnung ber a ni a, chuvang chuan tunlai Kohhran Nungchang hi a ni. lum silo, vawt silo, Modernist angin Bible hmang siin, Krista Pathianna chu an ringhlel a, a tak awm lovin tlang bum nan Kohhran an in vuah a, chutiang mi te chu a ka atanga chhakchhuah tlak chauh an ni reng a ni. Kan tunlai hun kan han en pawh hian chutiang hun chu kan tawng ta chiah a ni lawm ni?

    Laodikei Kohhran chu lo chhui sei leh hlek ila, Khawvel lam thil ah chuan a hausa a, a ropui bawk a, Biakin tha ber ber te an neiin, tangka a ngah a, College tha, Damdawiin tha, Zaipawl ropui leh thiam tak tak a nei a. Engmah a tlachham lova, Bank ah tangka  hman sen loh a neiin a dah a.Missionary tam tam tak an tir chhuak a, engmah an tlachham lo, Kohhran ropui leh sakhaw mi takin an lang a. Mahsela an nihna tak hmu tu mit hmuhah erawh chuan Thlarau lam a lumna nei hek lo anih avangin tluksan Kohhran an ni a, Chapovin uangthuang hle mahse, thlarau lama, mi rethei, khawngaihthlak, pachhia, mitdel, saruak chu an lo ni reng a. Krista leh a Felna chu sualna khutu atana an hman loh a vangin, Lalpa enna ah chuan saruak an ni. He Kohhran dinhmun hi tunlai Kohhran tam tak dinhmun anih avangin a va rapthlak em.Chuvang chuan Rangkachak mei a tih thianghlim puan sin turin a tul ta a ni.

    Heng avang te hian Thlarau Mitvar neih a tul ta, chuti a nih loh chuan, tunlaia, Harhna lo thleng leh Lei ah leh Van boruak ah te chhinchhiahna lo thleng avang te hian kan buai loh nan Thlarau Thianghlim thuam kan mamawh ta. chumi a tan chuan, Pathian leh nangma inkar chauh kha en la, Peteran Tui chungah kal Isua  hnen ah a dil a, Isua a en reng lai chuan a kal ve mai a, engmah a hlau lo, mahsela Isua en lova, Tuipui lam an en kha chuan a hlau ta a, a pil dawn ta mai anih kha. Mi nungchang leh awm dan lam ah zir lo va, Bible ah leh Thlarau lam nun ah, nangmah leh Pathian kar ah chauh in enfiah rawh.




MISSIONARY KOHHRAN

- Major Lalthansanga

   
    Missionary Kohhran ni turin engtin nge kan in buatsaih anga, engtin nge tan kan lak ang?

Bible chang chhiar tur:

“Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, hu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang,” a ti a.” (Mathaia 28:19-20)

“Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” a ti a.” (Tirhkohte 1:8)

1.    Zirtir Apostolte Kohhran din hmasatute nun leh an rawngbawlna atang hian tunlai kohhran te pawhin uar leh ngaihsan tur leh uar tur kan nei in a lang. Kohhran hmasate leh an Lal Isua thupek ropui tak - “Ram tinah kal ula, thilsiam zawng zawngte hnenah chanchintha hi hril rawh u,” tih Mathaia 25:19-20 kan hmu a. Tin, Jerusalem atanga Judai ram leh Samari ram te, khawvel ram tin an tlawhchhuah dan Tirhkohte 1:8 ah kan hmu a, Kohhran din chhan ber chu chanchintha hril hi a ni.

2.    Thlarau Thianghlim lo thlen dan tur Lal Isua’n zirtirte a hrilhlawk ang khan a lo thleng ta reng a. Chumi hnua ringtute nun danglam zia leh an hnathawh dan te kan hria. Chu chuan Missionary hna chu a in tan ta a ni. Kohhran pawh tihnghehin a awm zel a, Pathian ram a zau zel ta bawk a ni.

3.    Kohhran hmasate kha rinna leh rawngbawlna atana Pathian din a ni. Kohhran nung leh chak an rinnate, an tuarnate, an inpekna te, Chanchintha Pathian thiltihtheihna an puanna te chu Missionary hna ropui tak a ni.

4.    Piangthar enkawl dan leh chanchintha puandarh tura an inpekna chu Missionary hna ropui tak a ni. Chuta an nun an serh thianghlim dan te, an awmdan ah chuan zir tur tam tak kan nei a ni. Chu chu Missionary hna kohhran din dan chu a ni.

5.    Paula anga in enkawl leh in kaihhruaina te alo tul a, rorel tur leh ngaihtuah tur tam tak a lo piang zel a. Chu chu kohhran lo din tanna chu a lo ni ta a nin. Missionary hna lo lanchhuah theihna chu a ni.

6.    Thuthlung hlui rinna lo vuantute atangin thurin thuah inhnialna a lo awm nghal a. Thuthlung thar vuantute khan Isua lo kal chhan leh a hnathawh an zirtir a, chumi avang leh Thlarau Thianghlim thiltihtheihna nen an thawh theih avangin Kohhran te kha an lo ding chhuak thei a ni. Chungte chu Missionary hna hlawhtlinna lo lang chu a ni. Chuvangin Missionary hna leh Missionary nihna pawimawh tak mai pakhat chu thutak a din a ni.





I UNAU I HMANGAIH EM?



    Khawvel tawp dawna thil thleng tur tam tak Bible in a sawi zingah Unau leh Unau inkara inhuatna te, Pa leh Fa te an indo tur thu te kan hmu a. Bible a Unau kan hmuh hmasak ber Kaina leh Abela te inkarah pawh inthahduhna thinlung hial an lo put avangin tunlaia Unau inngeihlo leh inhaw tak tak an awm hi thil mak a ni lo.

    1 Johana 2:9-11 inkarah khan hetiang hian a sawi a-
“Mahni unau haw si a, “Engah ka awm,” titu chu tun thleng pawhin thimah a la awm reng a ni. Mahni unau hmangaihtu chu engah chuan a awm reng a, amahah chuan tlukna reng a awm lo. Mahni unau hawtu erawh chu thimah a awm a, thimah a vak bawk a ni; thimin a mit a tihdel tawh avangin a kalna pawh a hre thin lo,” tiin.

    Kohhran leh khawtlangah a kul a taiin kan inhmang pawh a ni thei, chanvo pawimawh tak tak kan chelh pawh a ni thei mahse kan unau te kan hmangaih loh chuan ‘THIM AH’ kan lo awm reng a ni tih he Bible chang hian min hrilh chiang hle a ni. Mahni unau te ngeih miah lo leh mil miah lovin Pulpit tlang atangin thu kan sawi a ni thei, keimahni leh keimahni inngaihdanah chuan ‘Piangthar’ pawh kan lo ni thei. Mahse, kan unau te kan hua a, kan ngeihlo anih si chuan ‘ENG AH’ ni lovin ‘THIM AH’ kan la awm a ni.

    ENG AH i awm duh anih chuan I unau i hmangaih hmasak phawt a ngai a ni. I unau i hmangaih em?  Nangmah leh nangmah kha in enfiah ang che. Pathianin kan unaute hmangaih turin min ti a, kan hmangaih lo anih chuan engang chhuanlam pawh nei ila, keimahni thiam loh a ni tawh ang. Tin, Pathian in min duh anga mahni unaute kan hmangaih lo anih chuan Pathianin kan chungah ro ala rel dawn a ni tih hi i hre reng ang u.

    Bible chang lar tak Sam 133 ah chuan hetiang hian kan hmu a -
“Ngai teh, unaute inngeih dial diala awm khawm hi A va thain, a va nuam em! Lua hriak hlu tak, Khabe hmula luang thla, Arona khabe hmul ngeia luang thla a, A kawrfual hmawra luang thla ang kha a ni; Hermon daifim Zion tlangtea tla thin ang hi a ni:  Chutah chuan LALPAN malsawmna thu a pe a, Kumkhuaa nuna tur chu.” tiin. He Bible chang atang ringawt pawh hian unaute hmangaih hi malsawmna dawnna a ni tih chiang takin min hrilh a ni.

    I Johana 5:16 ah, “Tupawhin a unau thihna khawp ni lo sual tiin hmu sela, a dilsak ang a....” tiin kan hmu a. Kan thiamloh leh kan diklohna avang ni miah lova kan unaute nena kan inkarah in hriatthiamlohna a awm dawn anih pawhin thinrim mai lovin Pathian hnenah ngaihdam kan dilsak tur a ni tih he Bible chang hian chiang takin min hrilh bawk a ni.

    I unau i hmangaih em? Han in ngaihtuah teh le.