2011 hmalama Article - salvationist a chhuah te


Chunnu hmangaihna par

- S.Lalrengpuia

“Chunnu lunglawm kim ve nan, ka neih rohlu hmangaihna hlan let ve nang e! Run timawitu Ka Nu kiangah chuan a hrailengten nui hiau par tlanin hlim zai kan vawr thin!”

A ni, a hmangaihna chuan a fate hrui angin min phuar tlat a, a rilru leh suangtuahna chenin min tuam thin. Aw, he ti em a hmangaihna ril hian a ni maw a fate min lo hmangaih le, keizawng sakhming chul lo ka chun-nu nunnemi hriatreng nan nghilh loh par hlan zel ta nge!”

He ni pawimawhna hi sawi teh chiam ngai lova hrethiam mai turah in ngai ila; Hringmi kan chan chhunga kan nun tidanglam theitu leh tikhawlo theitu chu kan nu te hi an ni a. An rilru puthmang a zirin an fanaute kan felin kan sual thei a ni.

Khawvel Missionary ropui leh Communist kulhbang su tlanga Lal Isua chanchintha hriltu pa huaisen leh dik Krista  vanga  Tawrhna(Tortured for Christ)tih lehkhabu ropui ziaktu Rev.Richard Wurmbrand te chuan “Ka nu ang hi khawvela nu zawng zawng te hi ni teh reng se, khawvel hian Tanin(Prison) a mamawh lo tawp ang” a lo ti hial mai a ni.

Tin, Khawvel doctor hmingthang leh lar tak naute phir lu inzawm tlatte (Siamese twins) pawh dam biai a zai damtu, miin Gifted Hand tia an koh hial Dr.Benjamin Carson, MD(Pediatric Neurosurgeon) chuan ‘ka nu hi tuna ka dinhmun min hruaithlengtu a ni a, a mi enkawlna avanga vawiin hi thleng thei chauh ka ni’ a ti. A nu tawngtai sakna leh enkawlnaah lawmthu a sawi bang thei lo.

Heng kan tarlan thenkhatte atang pawh hian pa tel lova Nute thil tih ropui theihzia an tarlang a ni. Keini Zofate zingah pawh Nute pawimawhzia sawi thei kan tam ang a, Nu hmangaihna ropuizia leh rilzia uar taka sawi tur nei kan tam awm e. Hmanlai deuh phei chuan pa berin tapchhak kilah hnang hlai pahin nu ber bai chhuan a vil sak a, nu berin puan a tahsan a, chutihlaiin a bai chhuan a lo phul liam meuh chuan, pa berin, “ekhai! Mama nu i bai chhuan a so liam e, Fate u lawm rawh u khai!” a ti thin.

Bai so liam lo chu bai fuh lo tihna a ni a, nu ber bai a so liam barh barh erawh chuan chhungkaw lawm a kim thin. Pa berin chu chu hriain tapchhak atangin a thai duhlai chu a ko thuai thin reng a ni.

Chhungkaw tihlimtu leh nun tifamkimtu chu Nute hi an ni a. An tel lo chuan hringnun hi a ngui nghiai a, a khawhar thlak ngawih ngawih thin. Chhungkaw hlimna thuruk kawltute an ni a, nu berin inchhungkhur a awp lum thiam dan azirin chhungkaw nuam leh chhungkaw hrehawm a siam thin. Chhungkaw nu ber awplum loh chu a rethei a, dam lai thlanthim ang mai a ni.

Tin, chaw kan ei theih hma atangin chaw min fah thin a, kan tlei loh hlauvin min awi nileng thin. Kan lo seilian a, kan hrisel loh hlauvin kawng engkimah a tha ber min zirtir a duh a, zirna run kan belh chinah phei chuan a rilru zawng zawng mai chu a fate enkawl nan a hmang a, hrehawm tinreng karah a hmangaih a fate tan a theihtawp a chhuah thin. An sual pawh a ngaidam a, thu tha leh zirtirna dik kawhhmuh a ngilneihna tinreng a enkawl thintu an ni a, Sual rawng kan bawlin a muhil ngai lo va, a rilruah a fate a ngaihtuah reng thin.

A ni, Nu te hma-ngaihna chuan a fate a tuam tlat a, a endawng ngai lo. Heti khawpa hmangaihna nena min enkawl thintu kan nute hi kan chawimawi ngai em? Kan tana an thinlung petute hi kan hmangaih let  meuh em? hma-ngaihna chuan hma-ngaihna vek a phutlet tlat asin.

Kan hmangaih ten min hmangaih let si loh chuan kan rilru a na a, kan nun a hlim thei lo. Nute chawimawia hma-ngaih let nachang hre lo khawpa kan bo a nih chuan inenfiah kan mamawh tihna a ni. Hmangaihna nena min chawmliana min enkawl-tu kan nute hian hmangaih let an va phu em! Khawvel ram tam zawkten NU te tana NI an siam hi a ropui a, keini pawhin thinlung leh tih tak zetin kan nu te kan hmangaih let ve zia kan tilang ve dawn lom ni? Ka nu ka hmangaih che a sin, I mi enkawlna avangin ka lawm e! kan ti ve ngai em? Zofate hian zirtur kan la nei tam awm e.

Kan nu te hi chawimawi a, duat taka enkawltu ni ve turin kan thinlungte i sawiharh thar leh ang u.

Hla thu chuan; “Ka chunnu kiangah ka lunglawm a kim, Ka rilru hahin min chhawka, ka tana a rilru min pekna te, min tawngtai sakna te kha a va hlu em! A hmangaihna chuan a hraite min tuam lum tlat a, suahsual rawng kan bawlsanin hlim ni reng a nei ngai lo. Heti ema hmangaihna nena min chawiliantu ka chunnu tan, enge tihsak ve theih ka neih aw! Thil ropui tak tihsak thei lo mah ila, ka tih theih awmchhun a hmangaihna chhanlet chu ka bat a ni zawk e” tiin





LALPA NEN CHUAN ENGKIM HI A TIH THEI A NI.

- Ellen Lalengzuali,
SAY Secretary

Pathian ropui nan leh midang ten malsawmna a lo nih theih nan thiam lo tak leh kim lo takin “Mihringin a tihtheihloh/nghei theih loh hi Pathian nen chuan a theih a ni” tih hi kumin kan thupui “ Inti thianghlim rawh u” denchhen hian tarlan ve ka duh a .......

Salvation  Army-ah Officer fa ka ni a, mi ngaihah chuan zuk leh hmuamah insum kim tura ngaih kan ni leh zual, ka naupan lai chuan ruitheih thil engmah ka khawih ngai lo a, mahse, kan lo puitling tana engtiklai atangin nge Cigarette  zuk ka chin leh Zarda ei ka chin tan chiah hi ka hre chiah lova. Mahse ka lo addict hman daih tawh mai a, Sipai puitling ni a, Pathian leh Sipaite hmaah ruihtheih thil reng reng ti lo turin ka lo intiam tawhna pawh hlen thei lovin hun rei tak ka awm a, SAY-ah te kan inhmang a, Council Member-te hial  ka ni a, mahse, heng ka Cigarette  zuk thin te hi ka sim chuang lo. Mahse, hei hian min tibuai em em, ka rawngbawlpui ten min hmu ang a, tih hlauhna te leh khawi kal ni khua te hian ‘khawi ah nge ka zuk ruk ang a, khawilai hmun nge remchang ang’ tih ngaihtuah reng rengin, ka mihringpui te bum tumin ka buai thei hle mai thin. Chumai bakah, in lamah ka chhungte hlauhna a nasa bawk si, R.M. Hall hnuai dawr Mangshu-a dawrah hian chaw ei kham veleh zingah leh tlaiah ka kal thin a, ka chhungten a rim an hriat ka hlau leh a, a rim rehna tur Zarda ei a lo ngai leh thin. Chutiang chuan ka hun leh pawisa bakah ka rilru pawh ka seng nasa thei hle thin. Thil pawimawh tak , mite hnenah  ruitheihthil a that lohna pawh sawi thei dinhmunah pawh ka ding lo, kan thalaite hnenah pawh meizial zuk that lohzia pawh ka sawi ngam lo. Meizial ka zuk thin chuan min tihbuai em avangin sim ka duh a, Meizial ka zukin buaina leh harsatna min thlen hi sawisen pawh a ni lo.  Pathian hnenah pawh vawi tam tak ka sim theih nan ka dil thin. Nghei ngei ka duh, keima chakna chuan ka sim/nghei thei tawh lo.

2001 a Nl. T.Lalhma-chhuani(Mimi)  rawng-bawlna ropui tak a neih tan chhoh khan, Serchhip-ah Crusade a neihnaah kal ve turin min sawm a, ka peih lo khawp mai a, chak vak lo chung chuan ka kal ve ta a, Pathian malsawmna ka dawng ang tih ngaihtuahna pawh ka nei lo, ka thiannu zah vang chauha kal ka ni. Motor lah chu ka rui nasa khawp mai a Serchhip Bazar hmunah Crusade chu neih a ni a, mi pawh an thahnem hle a ni. Dt.5th August, 2001 Sunday chawhnu inkhawm tan a ni a, mahse  ruah a sur nasat avangin thu pawh a sawi thei lova, Bible chhiarna a nei a, Sam 19 hi a rawn chhiar a, chutah chang 12 na “Tuin nge mahni tihsualte hre thei ang? Sual inthupte lakah hian mi tifihlim ang che” tih a rawn chhiar chuan, Pathianin ka hnenah nasa takin thu a sawi a, ka tap a, keimaha sual inthup, hnawk ka tih em em, rawngbawlna kawngah pawh min tibuai em emtu  meizial a ruka ka zuk thin hi a ni tih Lalpan min rawn hriattir a, ka thawveng huai hian ka hria a. Lalpa hnenah ngaihdam dil chungin lawmthu ka sawi nghal a. chumi zanah chuan Mimi hnenah “thil pawimawh tak hrilh tur che ka nei” ka ti a “Ka meizial zuk  ka nghei, Pathian in ka hnenah thu a sawi” ka ti a. Serchhip khawlaiah chuan ka lu chungah kut nghatin tawngtaina a nei a, hemi ni atang hian meizial zuk chakna pawh ka nei tawh lo. Pathian thu hian thil a va’n ti thei tak em!! Lalpa chu fakin awm rawhse.

Tichuan, Serchhip atanga kan haw hnuah Pathian hnathawh ropui tak mai ka chunga thleng chu  kan  Corps-ah  sawina hun remchang tak mai ka nei a. Maj. S.T. Dula kan C.O. a nih lai khan Aizawl Bazar C.O. Bial tan R.M. Hall-ah  Crusade neih a ni a, inkhawm hruaina hun ka chang hlauh mai a, ka lawm hle mai a. Mahse, ka thilsawi tur chu Setana chuan a duh lo hle a ni ang, tlai atang chuan ka luhai a, ka pum a na bawk a ka mu ta reng mai a, chaw pawh ka ei peih lo a. Ka nu chuan “inkhawm chu i hruai thei lo mai ang a” a ti a. Ka tawngtai a, “Lalpa min tidam rawh, ka chunga i thiltih ropui tak hi sawichhuah a ngai a ni” ka ti a. Ka rilruah  kan Biak In (R.M. Hall) platform chuan hnuai zawk ka rah chiah atang in ka  dam dawn hian ka in hre tlat mai a. Tichuan, inkhawm tur chuan ka kal ta a,  Ka dam a, inkhawm pawh tha takin ka hruai a, chu ka chung a Lalpa thiltih chu ka sawi ta a. Chanmari West Corps atanga lo kal mipa 2 chuan hlawkna an lo chang nghal der mai alo ni. Lalpa chu fakin awm rawh se.

Tichuan meizial chu ka nghei ta a, Zarda kha ka la nghei thei lo, ka nghei theih nan pawh ka tawngtai thin, Zarda chuan ka pumte a tina thin a, chaw pawh ka ei tlem thin, pawisa pawh ka seng hnem, nghei ka duh a, ka chakna chuan ka thei lo. Kum 2003 April thla atanga chuan enge ka natna ber tih pawh hriatloh chuan ka na ta vak mai a, Doctor chi  hrang hrang hnen ah kan kal a, ka dam thei silo. Pathian hnen ah ka vui a, ka tapa, ka mangang hle thin. Kum 2003-ah hian Central Division SAY Council-ah Executive Council Member, Aizawl Bazar C.O. Bial SAY Council-ah Treasurer leh Bazar Corps SAY-ah Asst Secretary ka ni bawk a, chanvo pawimawh tak tak Lalpan min pe a. Mahse, heng chanvote hi ruihtheithil tih nen chuan Lalpan ka thawh a lo phal lova, min tihthianghlim a duh a ni tih 2003 October atang chauhin ka hrechhuak ta a. October thla atang chuan ka hriselna pawh Pathianin a ti tha a, a rawngbawlna tur a hna min pek te pawh ka thawk chhunzawm thei ani. tichuan ka Zarda ei thinte pawh Pathian thiltihtheihna chuan ka sim leh ta a ni. Lalpa chu fakin awm rawh se.

Pathian nen chuan nghei theih loh hi awm lo, tih hi ka han tarlang a ni e.





IN ENG CHU MI MITHMUHIN ENG RAWH SE
-  Vanlaldiki Sailo

 
Kan hnathawhna hmun hi kan in tih lohah chuan kan chen tamna hmun ber a ni a, kan hnathawhna hmunah kan eng kan tilang chhuak tur a ni.

 Naupang leh tleirawl hnathawh la nei lo te pawh kan school kalna leh kan college kalna te hi kan hnathawhna hmun ang a ni a. Kan thiante zingah kan eng kan tilang tur a ni.

Kan hnathawhpuite tan a ninawm leh an awm tinuam lotu Kristian kan ni ang tih a hlauhawm hle mai. Hnathawhnaa kal tlai, haw hma leh tum si Sipai kan lo ni em? Ngun takin inbihchiang ila. Kan hnathawhpuite lakah kan engchhuak tur a ni.

 Kan Corps- ah kan eng tur a ni.

Sipaite hian Sipai Pawlin a min phutte leh min mamawhnate kan hre tawk loin kan tihtur kan tih lohte pawh a awm fo thin. Sipaiten kan tihtur pawimawh tak te chu – Inkhawmte, rawngbawlna kawng hrang hranga inhman leh tel te, Pathian malsawmna kan dawn atanga thawh-lawm thawhte a ni. Rawngbawlna a kan theihtawpa kan inhman a, Pathian rawn chung a, kan mawhphurnate kan hriat a, kan tihturte kan tih chuan kan Corps-ah kan eng a lo lang chhuak ang a, chu chuan Sipaite leh Corps tan malsawmna a thlen thei dawn a ni.

 Piangthar lote hnenah kan eng tur a ni.

Sipai Pawl dinchhan chu mirethei te leh misual te, Biak Ina inkhawm ve ngam lote tan a ni. Kan dinchhan hi mi tam tak chuan kan hre tawh lo hial mai thei a ni. Lamlianah leh daiahte kalin, Biak In thleng phak ve lote hnen ah kan eng i lanchhuah tir ang u.

 Ruihhlo ngai leh misual kan tihhote hian keini ringtu intiteah hian eng an hmu em? Biak Ina kan kal lai chauha eng lovin kan eng hi ruihhlo ngai te leh misual kan tih ho te lakah hian lantir ang u. Kan eng chu miten an hmuh avangin chawi-mawina dawng tur kan ni lova. Eng chu Pathian a ni a, enna min pe tu a ni. Amah KAN PA, kan PTHIAN ngei chu chawimawi tur a ni.

 Ringtute eng chu miten an hmuh a, an thiltihthatte an hmuh chuan Vana mi PA, PATHIAN chu chawi-mawiin a awm dawn a ni.

In eng chu mi mithmuhin eng rawh se, chutichuan in pa vana mi in chawimawi thei ang. (Mathaia 5:16)

 Lal Isua chuan amah ringtu leh amah zuitute chu eng turin min duh a ni. Mi mithmuha kan en chhuah loh chuan eng kan nei lova, keimahni ngei pawh tihen kan ngai thin.Tlang chunga khaw awm chu thuhruk theih ani lova, miten an hmu thin. Chutiang bawkin nunna eng kan neih chuan a thuhruk theih loh va, a eng chhuak a, miten a eng chu an hmu thin.

 Ringtu inti tamtakte hi kan eng a lang chhuak thin lova, Biak Ina kan kal a, kan inkhawm lai chauhte hian kan eng thin a, hei hi a dik lo a ni. Kan eng chu engtiklai pawhin kan chhi tur a ni.

 Kan eng chu khawi hmunah nge kan tih en ang?

 Kan inchhungah kan eng tur a ni.

Kristian tam tak chu midangte zingah, hmun dangah kan eng thin. Kan chhungte hnenah leh kan inchhungah kan eng hmuh tur a awm thin lo. Midangte zingah leh hmun danga eng thin chu kan inchhungah pawh kan eng tur a ni.

 Midangte leh thiante zingah kawm nuam tak leh tawngduh tak, mahni chhungte zinga tumbur a, tawng duh lo te kan awm thin. Nu leh pa te pawh midangte zinga nelawm tak, rualkawm thiam tak, mahni inchhunga vin tak kan awm thin. Chhung-kua hi a pawimawha, kan chenpuite hnenah kan eng chhuak tur ani.

 Kan hnathawhnaah kan eng tur a ni.
Hmanlaiin Juda mite chu tunlai angin Electric-te a la awm ve loh avangin an inchhung a thim hle thin a, chhunah pawh khawnvar chhit reng a ngai thin. Chu eng chu an dah chhuak a, in chhung thim a tieng thin.

 Kan eng chu mi mithmuhin eng rawh se.



Thlarau thianghlim nihna Pakhat - Creative

-David C Lalmuanpuia

Thlarau thianghlim mize pakhat chu a Creative na hi a ni. Chumi awmzia ber chu thil duang thiam, thil siam thiam, thil chi hrang hrang ti thin leh designing thiam te pawh a tih theih ang chu.Thlarau thianghlim chu Pathian a minung pathum zinga pakhat anih avangin Pathian tiin ka rawn dah tawh mai ang a.

Pathian thil siam chi hrang hrangte atang pawh hian chiang tak in kan hmu thei a ni. Ramsa chi hrang hrang te mizia chi hrang hrang leh duh zawng chi hrang hrang a siam te hian Pathian Creative zia a lan tir ani. Ransa, thlai leh thei chi hrang hrang inang lo tak tak kan hmuh te hian Pathian Creative zia a ti lang chiang hle ani. Heng atang ringawt pawh hian kan Pathian hi a Creative a ni tih hmuhchhuah na tham tak tak a lo ni.

Tin tun a kan han tarlan ang chiah tho khan mihringte atang pawh hian Pathian creative zia chu kan hmu thei awm e.Mize chi hrang hrang, Personality hrang hrang te talent chi hrang hrrang te hnathawh duh zawng chi hrang hrang te, rawng ngainat zawng chi hrang hrang te leh tui tihzawng chi hrang hrang kan neih a tang hian mihring te ah pawh hian Pathian Creative na hi kan hmu thei bawk ani

Kan hnathawh duh zawng ah ringawt pawh hian mitin hian in an loh na lai kan la nei zel leh nghal a,a then in sumdawn nuam an ti a,a then in sorkar hnathawh, a then in mahnia sum haichhuahna dang neih te nuam an ti a, a then chuan fulltime a missionary a thawh te an duh bawk a Heng chi hrang hrang te a tang hian kan Pathian hi a Creative a Thlarau thianghlim hi a Creative ani tih kan hre thei awm e

Tin, Pathian hian mihring te hnen ah hian kan thawmhnaw duh zawng leh ngainat zawng te pawh hi in ang lo theuh in min siama nimahsela, mihring te hian kan lo in thliar in kan lo in judge thin a, hei hi a pawi hle ani. Pathian mizia kan hriat chian loh thin vang ani.Mathaia:7:1 ah chuan Isua ngei in"Do not Judge?" a ti a. Chumi awmzia nia ka hriat chu ‘mite an in thuam dan emaw, an mizia emaw, an personality emaw, keimahni thinlung mil zan lo nimahse lo ngaih theih loh ringawt a, endiktu a lo tana, an tlin leh tlin loh lo fiahtu nih loh tur’ a tih na a ni.

Kan Pathian hi a creative ani tih kan hriat thin loh avang hian rilru tereuhte, rilru zimte hi kan pu thin a.Vawiin ah hian kan Pathian hian engtiang a in thuam hi nge a pawm ber i rin? Nangma ngaihtuah dan ringawt kha chu a lo ni lo mai thei a ni. Mite box te reuhte a i dah ang ngawt khan kan Pathian hi chuan box te reuhte ah a dah ve lo a. Kan Pathian hian eng sam rawng ber te hi a pawm in i rin,sam dum a pawm in i ring ani thei a, sam sen chu tlem in a pawm thiam leh deuh i lo ring leh ani thei a.Tin, sam hring leh sam pawl te hi chu a pawm chiah tawh lo in i lo ring a ni thei e,chu tiang ang rilru i lo pu anih chuan nangmah zawk kha i box te reuh te a midang te i judge thin na atang khan lo chhuak la, kan creative Pathian rawng dum te, rawng sen te, rawng hring te, apawl te leh rawng chi hrang hrang siam tu hian a dum a pawm chuan a sen pawh a pawm anga, a hring pawm chuan a pawl te pawh a pawm ang tih kha i lo hre dawn nia

Chutiang anga mi in thuam na ah emaw an sam rawng te chi hrang pawh lo ni mahse nangmah lampang kha lo in enfiah la. Bible chuan midang te lo en dik tu,an lan dan lo ngaitheilo tu an fin leh finlo lo ngaithei lo tu ah tang suh a ti ani. Chuvang chuan chutiang mite an lan dan mai ah i lo judge thin anih chuan nangmah zawk kha i in en fiah a tul hle ani.Isua thupek ang in i awm tawh lo tih na zawk ang.

Tin,Pathian hian mihringte min kaihhruai dan thleng pawh hian tumah in ang kan awm lo ang. Biblea Nova te, Abrahama te, Mosia te a kaihhruai dan te pawh a in ang lo vek ani. Chung te pawh chuan kan Pathian creative zia a lantir bawk a ni.Nimahsela, mihring te baw k hi kan lo in judge leh thin ani.

 Tin, Pathian fak a zai leh lam thleng pawh in Bible hian a sawi nasa em em a. Sam 105: 3-6 a kan hmuh ang hian music chi hrang hrang a Pathian fak tur a ni. Heng hun lai hian tunlai a music tha tak tak te hi an la hmu lo ngei anga chutiang chuan kan Pathian pawh hi music chi hrang hrang in kan fak tur ani.Chungte chuan kan Pathian creative zia a lan tir bawk ani

 Tin, lam chungchang ah pawh hian zo hnahthlak te tih loh hi chuan Pathian fak a lam kual hi an ti ngai lova, nimahsela, Mizo te hian kan lam thiam dan ber ani si a. Kan thiamdan ang ber chuan Pathian chu fak mai tur a ni. Kan thiam dan ang ber a thinlung taka Pathian kan fak khan Pathian pawh a lawm em em ani. Lal Davida lam chu a thiam lo ve hle nge, a uar lutuk zawk nge, a thiam dan ang ber in Pathian hmaah a lam zawk kan hre ve chiah tawh lo. A nupui Mikali chuan lal Davida lam chu a lo hmusit a, a lo judge tihna a nih chu. Hemi tum hian Lal Davida uar tak mai leh a thiam dan ang ang a Pathian hma a lam chu a nupui Mikali chuan a lo judge avang in Pathian in Mikali chu a chhul a pin sak a. A dam chhung in nau a pai thei ta lo ani tih kan hmu.Chu vang chuan Pathian thlarau hnathawh chu a creative a, chuvang chuan mite lo hmusit a lo judge tu nih pawh a hlauhawm hle.

Chuvang chuan a tawp ber ah chuan tumah in judge lo ila. KanPathian hi a creative ani tih hria ila, mi awm dan leh lan dan mai mai ah i buai tawh lo ang u.IIKorinth 3:17 ah chuan Lalpa thlarau awmna apiang ah chuan zalen na a awm thin a ti a. I Korinth 6:19 ah chuan kan taksa chu Thlarau thianghlim In ani tih kan hmu bawk a. Chuvang chuan kan taksa ah chuan zalenna kan nei tihna anih chu,chumi awmzia chu zu te emaw drugs te emaw kan va ti ang tih na ni loin kan inthuam dan ah te leh Pathian kan fakna a tan te chuan zalenna na sa tak kan nei ani kan Pathian chu creative Pathian anih avang in zalenna nasa tak kan nei a nimahsea chu zalenna mi zing ah te lo dal thin tu chu farisai thinlung tak a kan lo in judge thin na hi ani

Tun ah khan box te reuh te a nangma ngaihtuah ang anga mi te i lo khung thin na a ta kha lo chhuak rawh le .





SAY Sunday thuchah

"INTHAT LAI HUN A REI DAWN LO"

Capt Saitluanga DYS

Mi thahnemngaite avangin kan Territory-a thalaite rawngbawlna pawhin hma a sawn zel kan ti thei ang. Tunah chuan kan din tan hun pawh mumal taka hriat theih a lo ni ta a. Tuna kan hming invuah hi pu nghal chiah lo mah ila, Salvation Army huang-chhunga thalaite chet-velna vek a nih avangin a thuhmun vek a ni. Kan Rising Day 8th October, 1954 atanga chhutin kum 54 zet chu rawngbawlna kan lo kalpui daih tawh a, hemi chhung hian thil thleng tam tak a awm a. A chhe lam atha lam in, hunin a her liam pui ta hlawm a nih kha.

Tunah chuan Corps/Society mal rawngbawlna bakah Bial, Division leh Territory huapin inrelbawlna leh kaihhruaina mumal tak neiin rawng kan bawl mek a. Heng zawng zawngah hian Rote kawla sepa ang maia awm lovin, kan in kaihhruaina dante kan ngaihpawimawh zel pawh a tul khawp mai. Paulan ‘...dan anga a beih loh chuan khum tirin a awm ngailo’ tia a lo sawi kha i hre reng thin ang u.Tisa thil anga kan ngaih tam tak hi Thlarau Thianghlim hnathawh lo lanna bul ani fo si a.

Kan din chhan leh kan thil tumte hi vawng reng ila, tihlawhtlingtu ni turin, tha thlah lovin theih tawp i chhuah zel teh ang u. Thi mai tur leh thah mai turte chhan-chhuaktu tur kan nihzia hre lovin kan lo awm palh thei a, midangte damna tura hnathawktu tur kan ni tih hre lek lovin, tina zualtu kan lo ni hlauh dah ang e.

Kan thil tum pasarih kha by heart satliah mai a tawk lova, a ziak chhiar ve lote pawhin kan nunah tal an chhiar theih tura lantir a tul takzet.

Kan dan buin a tarlan ang khan, SAY member ni tur chuan kum 14 - 40 inkar min phalsak a. Heti anih chuan kum 26 chhung vel hi thalai rawng-bawlnaah kan in hmang thei tihna a ni ang. Kan dam chhung kum hi Bible sawi angin kum 80-ah khaikhawm ta ila. Kan damchhung kum, hmun thuma thena hmun khat chauh hi thatlai/vanglai hun tihna a ni thei a ni. Hei hi uiin, kan rilru lamin, hmun thuma thena hmun hnih chin tal hi ka hauh tlat dawn ti ngial mahse, kan taksa hian a um pha tak tak thei tawh chuang lo. Hlaphuah thiam ten vanglai nun leh thatlai hunte ngaiin uiin,hla mawi tak takin an au lawm lawm thin na a, chungte chu lunglen tizualtu mai an lo chang leh thin. Then-khat tan lah inchhirna tahkhua tiseitu mai alo ni rawl nen.

Hetiang mai hi kan nih dan a nih avangin kan thatlai hun reilote tha taka hman hi nakina kan lawmna tur ani tih i hre thar leh ang u.Hun tha reilote kan neih chhung hian kan thu tiamah ding nghet ila, kan thil tum tihlawh-tling hman ngei turin tunah bul tan a hun e. In Thatlai Hun A Rei Dawn Si lova.



Youth and Social life

- Major Sangzuala

SAY member zawng zawngte nunah hian heng thil pali te hi an innghat a

1) Mental life;   2) Physical life;  3) Social life;  4) Spiritual life

 Lal Isua Krista thalai lo ni ve tawh chuan heng nihna innghahna (dimension) pali te hi kan nundan tur atan min hnutchhiah a ni.

 Pakhatna leh pahnihna te hi lo sawi hmasa ta ila.

 Pathian thu chuan Tin, Isua chu a fing deuh deuh a, a lo lian telh telh a, tiin Luka 2:52 ah kan hmu.

 He Pathian thu ang hian keini pawh hi kan taksa leh rilru lamah kan thanglian zel tur a ni a. Taksa leh rilru lama kan thanlen theih loh chuan thil eng emaw dik lohna kan taksa ah hian a awm a ni ngei ang. Doctor tu emaw kan rawn a tul mai thei. Taksa lam thanga rilru lam thang si lo te, rilru lam thanga taksa lam thang silo te a awm theih a, chuvang chuan sipai pawl chhungkaw zingah emaw, kan vengte zingah emaw heng mite an awm chuan SAY te hian tanpui dan kawng kan zawng dawn lawm ni? i in buatsaih nghal angu.

 Social life:- Nitina vantlang mipuite nena kan nundan ah hian heng thil pathum te hi kan hmu thei ang

1.Friendship;  2.Relationship;  3.Attitude te hi.

 Inthianthatna (Friendship) hi lo en hmasa ta ila, Pathian thu chuan hetiang hian min hrilh a Thian chuan englai pawhin a hmangaih renga, manganni atan unaua piang an ni  a ti(Thufingte 17:17)

 Kan physical life hian thian a mamawhin thian chu kan nei theuh ngei anga, a changin thian rinawm tak kan nei a, a chang chuan thian rinawm lemlo pawh kan nei thin awm e. Bible in min hrilh ang hian thiantha te chu Manganni atan unaua piang a ni ti a a sawi hi a dik a ni.

 Amaherawhchu, kan thian rinawm ber chu Lal Isua Krista a ni.Hla siamtu chuan Lal Isua kan thian tha berin kan mangan laiin min lawm a ti.

 Pathian thu chuan Bawih ka ti leh tawh lo ang che u, a pu thiltih bawihin a hre si lova, thian ka ti zawk ang che u.(Luka 15:15)

 I thian chuan nangmahah enge a beisei thin le? Kan thiante chuan kan lakah hmangaihna te, ngilneihna te leh tanpuina te an beisei thin. Lal Isua Krista kan thiantha ber chuan Amah chu Lal leh chhandamtu a pawm ngei turin min beisei si a. Midangte pawh a ke bula rawn hruailut ngei turin min beisei a, Amah chu hmangaih turin leh A rawng bawl zel turin min duh a., vawiin ah hian i chhang dawn em le?

 Relationship Inlaichinna, inchhungkhatna hi thil chhia leh tha ah mi pahnih te inkara thil awm thin hi a ni a. I u emaw, nau emaw, i nu leh i pa te nena in inkar thu ah inlaichinna tha i nei em le? Chutiang zelin mi tu emaw i hmangaih khan SAY member dangte nena in inkar te, thenrual dangte nena in inkar thu te enfiah la, vawiinah hian mahni in exam in han in review la, insiamthatna ni ah vawiin hi i hmang ang u.

 Attitude Kan in ngaihdan, kan awmdan, mite min endan ah hian le!

 Pathian thu chuan A tawp berah chuan rilru hmun khatin lo awm ula, in lainat tawn ula, unau angin in hmangaih tawn ula,thuhnuairawlh in awm rawh u. Sual sualin thungrul hek suh ula, hauna hauna in thungrul hek suh ula, malsawm hlauh rawh u a ti.(I Petera 3:8,9)

 Hnam dang leh tawng dang leh mi zawng zawng, kohhran dang te nen pawh unau anga awm tur kan ni.

 Lal Isua kan thian rinawm ber chuan In eng chu mi mithmuhah eng rawh se,Chutichuan in thiltha tihte an hmu anga, in Pa vana mi in chawimawi thei ang a ti. (Matthaia 5:13-16)

 Spiritual life Kan Thlarau lam nun thu ah kan thu te kan tih tawp nan lo en leh ila, I naupanna tumahin ngainep suh se, thusawi kawngah te, chetze kawngah te, rinna leh thianghlimna kawngah te ringtu te tihhmuhtu ni zawk ang che...chungah chuan inhmang zo rawh (I Tim. 4:12-15)

 He thu in min zirtir ang hian kan zamin kan hlau tur a ni lo. Heng a hnuaia thu pathum te hian mahni i in enfiah theuh teh ang u

1. Self respect;  2. Self discipline;  3. Self sacrifice

  Mahni in rintawkna hi a pawimawh khawp mai. Tirhkohvin Min tichaktu ah chuan engkim ka tithei a ni a tih angin, mi tihtheih ang chu ti ve thei ngei turah kan in ngai tur a ni. Mi zawng zawngte hi kan zawl pui ang chauha en theih vek hi a pawimawh khawp mai.

 Mahni kan inthunun zo tur a ni. Kan zirtirna te kan umphak zel tur a ni a, thu tha tak kan sawi ang zel hian a taka nunpui hi kan tum tur a ni.

 Rorel taima bawk, a bawhzui taima bawk SAY kan nih a va pawimawh tak em!

 Tunlai hian Cable Television  te a lo awm tak hnu ah hian a bula thut tam lutuk a hlauhawm hle.  Inkhawm hun dawn hnaiah film hmuhnawmtak a lo chhuak anga, inkhawm chak loh phahna te a lo chhuak thin ang. Chutih hunah pawh chuan mahni in thunun la, thawhsan thuai la, Biakin lam pan thuai thin ang che.

 Mahni ngei hi Lalpa hnenah kan inhlanin kan intulut fo tur a ni. Chutichuan unaute u, Pathian khawngaihna avang hian inthawina nung leh thianghlim leh Pathian lawmtlak ni turin in taksa chu inhlanah ka ngen a che u. Chu chu in rawngbawlna awm reng pawh a ni (Rom 12:1)

 Kan thlarau lam nuna kan lo chak zel theih nann mahni inringtawka, mahni inthunun chung zelin i inhlan thar fo ang u. Chutichuan SAY tha tak kan lo ni thei ang.



Sakhuana Thlarau Sual
(Religious Spirit)
(Mathaia 23, Johana7:24)

-David C Lalmuanpuia

Sakhuana thlarau sual paitu hi ringtu te leh ringlotute zingah pawh tam tak an awm a ni. Hindu, Muslim, Pharisai hote leh sakhaw hrang hrang betute pawh hi.

Nimahsela, Kristian te kan danglam bikna chu he sakhuana thlarau hmanga vanram kai tum leh rawngbawl ve lovin, Pathian Thlarau Thianghlim nena inzawmna (not religion, but relationship) thuk tak atanga rawngbawl tur zawk kan nihna te hi a ni. Mahse, tuna kan Zoram dihmunah hi chuan Pathian kaihhruaia rawngbawltu aiin, sakhaw rawngbawltu kan tam zawk niin ka hria.

Khawvel Kristian huam hrang hrangte kan han en hian Mizoram ringtu inti te zingah hian he sakhuana thlarau hi a nasatna ber pawl niin ka hre bawk. Chuvang chuan, hemi chungchang ziah hi  a tul hlein ka hria a.

God Channel kan en chuan International Speaker tha tak tak ten an sawi hnem ber pakhat chu he sakhuana thlarau sual chungchang hi a ni. Tuna Florida revival thleng meka an Speaker leh Speaker dang te pawhin an sawi  zin em em a ni bawk a. Tin, God Channel a International speaker, ‘Joyce Meyer’ pawh hian a sawi zing hle a, ani phei chuan lehkhabu hemi chungchang ah hian a siam hial a, ‘ Sakhuana hi ka hua a ni’ (I hate Religious) a ti tawp mai bawk a ni. Tin, International Speaker lar lutuk bawk Jill Austin chuan mipuite chu hrilhin ‘Sakhuana thlarau hi in lo pai ang e’ tiin a hrilh a ni. Tin, Benny Hinn leh Speaker dang dangte pawh hian an sawi lang bawk.

Tin, Isua hun lai pawh khan heng Sakhuana thlarau sualte hian Pharisai hote, dan zirtirtute, puithiam hote leh puithiam Lalber thleng pawh khan a bawhbuai nasa a.Tin, Isua man tute pawh kha sakhuana thlarau in a tihbuai te an ni a, a thilmak tihte leh a rawngbawlna te reng reng lo sawiseltute pawh sakhuana thlarau pai Pharisaite, dan zirtirtute leh Puithiamte kha an ni zel a ni.

Tin, Chanchintha bu paliah te hian heng sakhuana thlarau sual chanchin hi a tam hle a. Tun tumah chuan a tlangpui chauh kan tarlang dawn a ni.
Sakhuana Thlarau sual lan chhuahna thenkhat te:

(1)Tihdan phung pangngai leh dan anga rawngbawlnate chu Pathian Thlarau hruaia rawngbawlna aiin an ngai pawimawh zawk thin a ni.  (Marka 7:6 - 9, Galatia 5:18)

(2) Mite pawnlam landanah an lo buai ve em em mai thin a ni. Coat suit, kamis, T Shirt, Jeans tih velah hian an buai tawkna a lo tling thin. Chuvang chuan Isua ngei pawhin sakhuana thlarau sual paite hnenah “Mite an pawnlam lan dan ringawtah lo fiah suh, an inthuam dan mai maiah  te, an mizia ah te, nangma ngaihdan lo siam ve ringawt suh” a tihna a ni(Johana 7:24). Chuvang chuan  mite Pathian nen an inzawmna hre si lova, an pawnlam landan atanga ngaihdan lo siam hi Isua chuan a phal lo a, thupek min pe hial a ni. He thil hi sakhuana thlarau sualin min tihbuai chuan hmuhfuh a har hle thin bawk a ni. Sakhuana thlarau chuan mite hi box te reuh teah a dah thin a ni. (1 Samuel 16, Matt 23:4)





Fimkhur rawh u

- Major Lalthansanga

( I Petera 5:8,9)

Petera’n he thu a sawi hi han ngaihtuah ila, Pathian kan rinna kawngah hian a kalsual theihzia a lang chiang hle.

Mi a lo pianthar hma chuan fimkhur ngaihna a hre chuang lo. Krista chu a ring apiangte Chhandamtu a ni tih a hriat veleh ama nun kha a hmu chianga, Pathian chu mi thianghlim a nihzia a hre chiang nghal a. Ama nuna thil dik lo kalsan turte chu a hre nghal. "Mi rethei ka va han ni tehlul em! He thihna taksa atang hian tuin nge min chhanchhuak ang? Isua Krista kan Lalpa avangin, Pathian hnenah lawmthu ka sawi a ni." (Rom 7:24,25)He thu hian a nun chu a luahkhat nghal a, Pathian laka bo leh theih a nihzia hriain fimkhur a pawimawh-zia chu a hrechiang a,

Krista tlanna hi awm mahse, miin rinna a neih loh chuan chhandam a ni mai lo. "Rinna hi thil beiseite awm ngeia hriatna, thil hmuh lohte hriatfiahna a ni." (Hebrai 11:1)Miin Pathian tanpuina avangin a nun chu a lo danglam a, sual laka a fimkhur thin. Hetiangin zirtirna kan hmu "Thlemnaa in luh loh nan inring rengin tawngtai rawh u; thlarau zawngin a peih a, tisa erawh chu a chak lo a ni,"(Matt. 26:41)

Heng thu hian ringtute chu an bo leh thei tih chiang takin min hrilh. Chuvangin, beiseinain ram chu kan la ang a. Beiseina nung nen ram chu kan pan ang a, chu chu kan nunna tur chu a ni. "Nimahsela ka mi fel chu Rinnain a nung ang:A hnungtawlh erawh chuan,Ka rilruin amahah chuan lawmna reng a nei lo vang." (Hebrai 10:38)

Pathian hna kan thawk tur a ni kan ti thin a, eng anga thawk tur nge kan ni tih chu han tarlang leh ila– rinna kawngah hian mahni ngaihdana kal a awl hle thin. Pathian thu chuan hetiangin min hrilh "Pathian ring tawhte chuan thil tha ti zel turin ngaihtuah rawh se,"tih thu hi a rinawm a ni, chung thu chanchin chu huai taka i hrilh tlat ka duh a ni. Chung thu chu mihringte tan a thain a sawt a ni" (Tita 3:8)¶

"Ngaihven ula, fimkhur rawh u, in khingpui Diabola chu sakeibaknei rum thin angin a ei theih tur zawngin a phi ruai thin"







ZU THAT LOHNA

- Dr. K. Lalhruaitluanga

1. Zu hian mipatna a tichhia. Fa neih theih lohna, chingna(Sterility & impotency) a thlen.

 2. Thin hnathawh a tichak lo a, a tichhia. Zu in vanga thin natna hrang hrang a siam a, Thin sawng te, Cardiomyopathy te, Hmeichhia ah Type 2 Diabetes te , Thin Cancer te, Pumpui chhunga Thisen sang (Portal Hypertension) a siam thei bawk.

3. Zu hian Thisen a tibana, a ti hlawm khawm a, Thisena Oxygen kal a timuang. Thi var (White blood) te hnathawh a timuang.

4. Zu hian pemhliam a ti dam har.

 5. Pumpui lawng, pumpui pan, Pumpui cancer a thlen awlsam hle.

 6. Zu hian taksa mamawh chaw tha tlakchhamna a siam hma.

7. Zu in mi, zuk leh hmuam ti nasa leh hurna lama inhmang nasa te chuan Cancer tihbaiawm tak tak an nei hma hle a ni tih hmuhchhuah a ni.

8. Zu in mi zingah rilru buai an tam.

9. Nu emaw, pa emaw ten zu an in chuan Nau piansualna leh Naupang lung tha lo an tam bik.

 10. Mit khawhmuh tifiah lo tu a ni.

 11. Rilru ngaihtuahna fim a siam thei lo, thluak hnathawh a tih thuanawp avangin.


A nghawng tha lo dang

Zu avang hian pawngsual, dan kalha chetna, Motor accident, tualthahna a thleng nasa hle. Mahni intihlum te a thleng nasa hle. Harhfima rilru hman theihna a tihtlem avangin sual buru pui pui tih a awlsam phah. Zu avanga dam lohna leh buaina hrang hrang atana kan sum senral hi a va han ui awm tak em!

 Cancer te, Malaria te, TB te hi natna a ni a, Zu ngawl vei erawh hi chu natna a ni ve lo. Miin cancer a neih avangin vanram a lut lovang tih thu Bible-ah kan hmu ve lo. Amaherawh chu, I Kor 6:10 ah chuan zu ruih hmang mi chu vanramah a lut lovang tih kan hmu a ni.

 
Zu laka invenna
Miin zu an in chhan hi ngun taka han ngaihtuah chian chuan rilru lam nen a inkaihhnawih thuk em em in a hriat. Chhungkua atanga insiamthat a tul a, sikul atanga in zirtir a tul bawk a.

Rilru tihthawvenna hmun, infiamna hmunhma tha leh intawllenna hmun tha (chhungkuaa kal theihna) neih a tul bawk a.

Pathian thu hmanga zu inmite chhanchhuak tura beih hi kawng tha ber a ni hial ang.

Heng thil chi hrang hrang te hi a mala tang lovin, tanho thiam a tul a. Hetih lai hian a ngawlvei tawhte enkawl that a tul hle bawk, an sim theihna turin mipui te kan tanrual pawh a tul hle a ni.

Kan naupang te kan ven that a tul a.
A chhiat tawh hnua simtir leh tum ai chuan lo invenlawk thiam a tul hle a ni.¶