The Salvation Army Kum 2016 India Eastern Territory Thupui : “ I duhzawng tih mi zirtir ang che; ka Pathian i ni si a” - Sam 143:10 =============================================="One Army, One Mission, One Message" =============================== Advertisement support website a ni a, advertisement hi chu a awm lo thei lo a, hriatthiamna kan ngen e. Tin, Advertisement (phek chung ami leh phek dinglam ami) te hian Bazar Corps nen inkaihhnawihna an nei lo a, webhost tu, own-free-website.com te dah a ni e. Mawh kan phur lo.

 
WEB-PAGE LIST
Home
Guestbook
News
Corps news
Salvationist Poll
Forum
Contact us
About us
ve lawks
Ka lo tawn ve
Ka hla duh leh a chhan
Editorial
=> Editorial 2013
=> Editorial 2012 hmalam
=> Editorial hlui 2010 hmalam
Article lawrkhawm
website newsletter
Gallery
SAY Sub-Committees
YP Corps
Home League
League of Mercy
Bible Society
SA News tawi
SA SocialServices news
Poem and poetry
Downloads
Website Statistics
SA website dangte
Kan Dopuite
Thurin
SA Story
Corps area map
Bazar Corps Location
 

All rights may be reserved by S.A.Y. Bazar Corps, Aizawl, Mizoram. Copyright © 2016. ================== "One Army, One Mission, One Message" ================== MISSION STATEMENT ---------------------------- Chhandamna Sipai Pawl chu, khawvel pum huap pawl, Kristian kohhran te zinga pakhat Chinchin Tha hril lam thawktu a ni a. A thuchah chu Bible-ah a innghat a, A rawngbawlna chu Pathian hmangaihnain a tinung a, A thil tum leh a hnathawh ber chu chu Isua Krista chanchin Tha puandarh leh inthliarhranna awm lova mite mamawh phuhruk hi a ni. ================== MISSION STATEMENT The Salvation Army, an international movement, is an evangelical part of the universal Christian Church. Its message is based on the Bible. Its ministry is motivated by the love of God. Its mission is to preach the gospel of Jesus Christ and to meet human needs in his name without discrimination. ==================

Editorial 2012 hmalam


2012 hmalam ami editorial collection

Krismas & Kumthar Thilpek.......

Hun leh ni te a liam zel a, Pathian kaihhruaina azarah kum tawp lam te kan lo thleng leh ta der mai a, Kristian ten kan kutpui ber Krismas pawh thla khat chauhin min dang ta!

Krismas kan lo hnaih leh ta hle mai a, Krismas leh Kumthar ah te ruai kan theh leh duh ngei in a rinawm a. Heng kan kutpui lo thleng tur atan hian Thawhlawm te kan thawh tha em? tih hi han in ngaihtuah lawk teh ang.

Krismas leh Kumthar lawm nan te a ruai buatsaih hi a hautak dan chu kan hre vekin a rinawm a, tun atanga sum leh pai hmanga theihtawp kan lo chhuah ve loh chuan a buaipuitu Festival Committee te tan pawh luhaina tham chu a tling ve a ni.

Thla khat chauhin min dang tawh pawh a ni thei a, Silaimu Ip a Krismas leh Kumthar thawhlawm/column ah hian thahnem ngai taka a hma ai pawha tam zawk kan thlak a hun tawh khawp mai.

Thahnemngai taka tun atanga kan thlak chuan Krismas leh Kumthar ruai leh thingpui vela hman tur kan lo ngah dawn tihna a ni a, hun tlemte kan neih tawh avang hian thahnemngai taka thlak a hun tawh takzet a ni.

Tunah hian Krismas & Kumthar puala lut ala tam tawk lo hle mai a, nasa lehzualin Corps chhunga Sipai chhungkaw tin te i han tang lehzual ang u. Hlim leh nuam taka Krismas kan hman tlan theihna a ni tih hriaiin he thilpek rawngbawlna peng pakhatah hian thahnemngai takin i pe ang u.

“Pe rawh u, chutichuan pekin in awm ang,” tia Luka 6:38 a Isua’n thu min tiam hi i hre reng ang u.



Thih thlengin aw.....

Pathian hmangaihna, rilru reng reng a kan hriat sen loh leh kan chhui chhuah zawh loh chu kan chungah, kan Corps chung ngeiah tunah hian lantirin a awm a, Camping chhawng 3-na leh a tawp ber ni tawh tur pawh tluang tak leh hlawhtling takin kan hmang zo leh ta a, Pathian chu fakin awm rawh se! Halleluiah!

Camping ah mi inang lo tak tak te kan lut khawm a, a then chu Corps a mi hlun tak tak, Local Officer leh thalai ah pawh hruai lo ni tawh te, ni mek te leh Pathian ngaihsak vak lo leh ruihtheihthil chi hrang hrang in a tihbuai te kan ni hlawm a. Heng mi chi hrang hrang te hi Pathianin min hmangaih dan a inang reng a, hmangaih bik a nei lo tih kan hre vek awm e.

Pathian khawngaihna kan chang a, kan hlim in Pathian ah lawmna thar nasa tak nen Camping te kan chhuahsan a, hetiang anih mek lai hian kan sawi fo tawh angin Camping atanga kan chhuah phat atangin Setana chuan a tih tur a ti nghal a, Thiante emaw, unaute emaw, chhungte emaw hmangin nasa takin fiahin kan la awm dawn a ni.

“Thih thlengin rinawmin lo awm rawh, tichuan nunna lallukhum ka pe ang che,” tiin Thupuan 2:10 chuan a sawi a. He Bible chang hi mi tu a te pawh hian kan theihnghilh loh a tha khawp mai.

Pathianin a hmangaih em em mihring siamte tan Vanram a siam a, chuta kal tur leh chawl tur te tan erawh chuan Isua Krista tana thih thleng a rinawm a ngai a ni. Chutihrual chuan Amah vahbosana, Amah phatsantu te tan pawh Hremhmun leh Meidil a buatsaih sak tih kan hre vek awm e.

He kan hlimna leh lawmna kan chan te hi thil ho te, Setana hmanrua hnenah i hralh lul lovang u! Pathian in min hmangaihna a nasat zia kan hre vek a, mahse Ama thu zawm duhlo te erawh chu Ani pawhin an chunga rorel dan tur a buatsaih vek tih pawh kan hria. Chuvangin THIH THLENG in ISUA KRISTA tan hian i RINAWM tlat ang u.


Nghet takin aw.......


Pathian awmpuina leh kaihhruaina azarah Camping hlawhtling tak mai kan nei a, a chhawng hnihna pawh hei kan zo chu a ni leh dawn ta reng mai a, Pathian in Bazar Corps Sipai te min awmpuina leh kaihhruaina zawng zawng te hi a ropui hle a ni.

Camping vawikhatna a lut zing ami tam tak te chu Pathian thu ngaihthlak belh leh duhin a chhawng hnihna ah te lut leh te kan awm lehzel hian Pathian in ami te min hmangaihzia hi a tilang hle a, Pathian mamawhna thinlung tak tak a, Pathian thu duhna thinlung tak tak nena nu leh pa, thalai te mi heti zawng mai Camping a kan han lut hi Pathian chu fakin awm mawlh rawh se!

Camping te zovin follow-up programme in a zui leh mai dawn a, thalai tam tak, nu leh pa te pawh a ni ang; Camping atanga kan chhuah veleh Setana hi a che vat thin tih kan hre vek awm e.

Camping atanga kan chhuah hian sermon a kan ngaithlak tawh angin ‘fiahna’ leh ‘thlemna’ tam tak kan hmachhawnin kan tawng dawn a, heng hunah tak hian NGHET taka din hi a pawimawh em em a ni.

Hlim taka kan haw hi Setana hian kan chhungte hmangin emaw, kan unaute hmangin emaw, kan thiante hmangin emaw min bei thei a ni tih kan ngaithla tawh a, hei hi a taka rawn thleng ngei ngei tur a ni.

Thlemna leh Fiahna tam tak (a tam zawk pawh a niang chu) hi kan thiante laka kan tawn a ni duh em em a. Kan thian tha ngawih ngawih nia kan hriat te hian a chang chuan hlim taka Camping atanga kan chhuak te hi min lo lawmpui a hnekin min nuihsawh tu ah te, min lo diriam tu ah te an tang let daih thei a ni.

He Setana hmanrua hi thalai tam tak ten tluk leh phah nana kan hman nasat ber te zing ami a niin a rinawm a. Thiante kawm loh hlauhna te, thiante nuihsawh hlauhna ringawt avang te in kan Kross put chu kan thlauh leh mai thin a, hei hi a pawi hle a ni.

Pathian thu chuan thlemna kan do zawhna tur chuan kan tawngtai reng a ngaih thu min hrilh a, hei hi kan Kristianna nunah leh Piangthar kan ni a, ringtu dik tak nun kawng kan zawh chhohna kawngah hian a pawimawh em em a ni.

NGHET tak leh CHHEL taka thlemna leh fiahna tam tak karah pawha a Kross put dah duh lova pu ngat ngat chuan Lallukhum chhe thei lo, Pa Pathian hnen atangin kan dawng dawn a ni tih hria in, he khawvel a ringtute kan chatuan hmun tur pana kan kal mek naah hian Isua Krista chu i vuan tlat ang u.


Engvangin nge kan tluk thin?

Camping hlawhtling tak mai leh hlawkthlak tak mai kan hmang zova, follow up programme te kan hmang chho leh zel dawn a, heng Camping boruak te hi a zawhfel hunah hian Pathian thlarau thinghlim awmpuina leh chenchilhna te hi kan chang chhunzawm reng angem?

Mizo te hi Camping emaw Crusade, intuaitharna nei nasa em em mai leh hetiang lam kan awn tum a thle dual dual a, a reh hnu a reh ve leh mai thin kan ni a. Kan society kalphung hetiang anih avang leh kan hnam naupana avanga kan mize ngheh loh avang hian tei rei peihna hi kan tlachham em em a ni.

Crusade emaw Camping boruak nuam tak hnuaiah kan hlim in kan lawm a, Pathian faka zai a nuam kan tiin kan lam mup mup a, mahse Team ten min han kalsan hnu ah a reh leh mai thin hi keimahni mimal theuh hi in ngaihtuah chian theuh a pawimawh khawp mai.

Thalai tam tak te Camping kan luh hian enge kan luh nachhan? Eng vanga lut nge kan nih? Pianthar duh tak tak thinlung pu in nge kan luh a chhungte turna avang leh thianten luh an tih vang? tih hi inzawh a pawimawh khawp mai.

Lam leh hlim taka Pathian fak hi a pawimawh khawp mai, mahse chutihrual chuan hetiang maiah hian kan inhmang ralin kan hlimna kan hmang zo ang tih a hlauhawm khawp mai.

Engvangin nge kan Camping chhuak te hi kan tluk leh mai thin? tih te pawh hi keimahni theuh kan in ngaihtuah a ngai khawp mai. Pathian thu duhna tak tak thinlung pu leh Pathian a piantharna tak tak kan chang anih chuan he ‘tlukna’ lakah hian kan inthiar fihlim thei a ni.

Setana chuan kawng hrang hrangin nasa takin kan hlim vanglai takin min bei thin a, Pathian phatsan tur leh ‘tlukna sual’ a lut leh tur te pawhin min bei thin. Mahse heng zawng zawng hi Pathian chakna nen a hneh vek theih a, Pathianin min hnehsak vek thei a ni.


In tuai thar ang aw......


Kan hma lawkah Corps pum huap in Gospel Camping neih kan han tum a ni a, he Camping lo awm turah hian naupang, thalai leh Corps chhunga nu leh pa te luh vek tum ila a tha awm e.

He khawvela kan awm chhung zawng hian mihring tumah hi ‘famkim’ kan awm lova, tlin lohna leh fel lohna nei vek kan ni a, chutiang chiah chuan tumah in tuai thar ngai lo kan awm lova, in tuai thar a, in siamthar ngai vek kan ni.

He Camping lo awm turah pawh hian midang lut tura phut buai lovin keimahni theuh luh tum ila, chhungkua leh mahni eizawnna emaw kan hna lama rokhawlhna lian tham tak kan nei te anih loh chuan kan zavaiin luh vek i tum ang u.

Pathian hnam thlan Israel fate chanchin kan hria a, Pathian in a venhim zia leh a kaihhruai nasat zia kan hria. Israel fate hian kum tin vawi thum inhmukhawm in Pathian tan an hun an hmang thin a, hei tak hi an chak nachhan bulpui ber pakhat chu a ni.

Mi fel, piangthar tha tak leh Pathian mi hman em em lai te pawh hian intuai thar hi an mamawh ve reng a, kal dan phung pangai ngawr ngawr leh mahni tha tih ang ngawr ngawr a kal reng hian hmasawnna ai in hnungtawlhna a thlen chawk thin a ni.

Karleh Ningani zan atanga Camping neih tan turah hian Tisa leh Thlarau a malsawmna tam tak dawn tumin lut theuh ila, kan thinlung te, kan ngaihtuahna te a fai emaw a bawlhhlawh emaw Pathian tan he Camping lo awm tur atan hian i hawng ang u.


Thlarau a zovin.......

Rawngbawlna chungchang hi vawi tam tak kan ngaithla tawh a, kan ziak tawh bawk a. Mahse, sawi zawh vek sen anih loh avang hian i han sawi belh leh teh ang.

Kristian kan nihna anga kan tihtur pawimawh tak chu Pathian rawngbawlna hi a ni a, kan tihtur satliah pawh ni lovin kan tih ngei ngei tur a ni. Chutihrual chuan heng rawngbawlna hrang hrang a kan tha leh zung kan sen thinna zawng zawng te hi ‘Krista’ vang a ni em tih hi ngaihtuah a ngai khawp mai.

Hla pakhat chuan... “Thlarauva bul tan, Tisa a zovin Lal rawng i bawl thin em?
I kalthui zel a i thiltih hmangin chhandam i intum a,
I hriatna, thiamna zawng te hmachhuanin Lal rawng i bawl thin em?
I mualphona zawkah Lal alo mawi ang.”
tiin a sawi a. Ngun taka ngaihtuah chuan ‘Thlarauva bul tan, Tisa a zo’ a rawngbawlna hi tun laia rawngbawlna peng hrang hrang te han en hian a tam tawh hle in a rinawm.

Kan thiamna, kan thiamna hmangin mawi loh hlau in rawng kan bawl a, kan rawngbawl chhan Pathian ai in kan chanvo leh kan rawngbawlna te pawh hi kan dah pawimawh mah thin a, hei hi a pawi em em a ni.

Rawngbawlna-a kan inhmanna te, activities hrang hranga a kul a taia kan inhmanna te, nihna leh chanvo hrang hrang kan chelhna ringawt te hi kan lo hmachhuan ang tih a hlauhawm a. Thlarauva bul tana tisa a zo ni lovin, Thlarau a bul tan Thlarau tho a zo a rawng kan bawl theihna turin Krista hi vuan tlat ila, Ama tan chauh i bei ang u.


Krista-a piang.......

Mizoram hi Kristian za-a-za inti thin ram kan ni a, kan Kristianna kalpui dan pawh a takin a Kristian ngawih ngawih bik a hriatna pawh kan nei thin. Mahse he rilru hmana kan put thin kha tunah hian Mizo mipui te hian kan la pu reng angem aw?

Mizo te hi kan Kristianna la reilo hle mahse Kristianna la run leh la thutak em em mai hnam kan ni a, pian hlim atanga Kristian (Born-Christian / Christian by-birth) kan ni a. Kan piantirh atangin Kristian sakhua vuanin Kristian kalphung in engkim mai kan kalchhoh pui nghal vek thin a ni.

Hetiang khawpa Kristian Sakhua kalpui nasa ni si hi engatinge heti em em a kan ram hi a chhiat mai tih hi kan ngaihtuah ve ngai em? India ramah chuan Kristian State a chhiar theih tlemte zing ami kan ni a, mahse kan Kristianna nen a kan ram han en chuan zahthlak khawpin kan Kristianna hi a dal leh lawi si a.

Tunlaia thalai tam tak zingah hian Kristianna a chiang lo leh Kristian sakhua ngainep leh hnawl tan hi he kan ramah ngei pawh hian an awm ta nual mai! Hei hi engtia han tihreh a, heng kawng bo mek te hi engtia han hruai let leh tur nge ni ta ang le?

Kristian a piang ni satliah mai lova Kristian Krista-a piang nih hi tunah chuan a hunin a tul tawh takzet a ni. Krista-a piang chu a nundan a danglam a, mite pawhin amah ei tur leh zir tur an hmu thin a ni. Kristianna ringawt a duhtawk mai lo hian Krista-a pian nawn hi kan mamawh em em a ni.




Isua Krista i pan thin em?

 

Pathian thu mihringin a awih loh avanga Eden huan atanga hnawhchhuaha kan awm hnu ah Pathian vekin mihring sualna te thupha chawina turin a fapa mal neihchhun chu he khawvelah tawrhna nasa tinreng tuar turin leh mihring Amah Pathian thinlunga thi tawh te A thinlunga an lo nun leh theihna tur leh an sual te A ngaihdam theihna turin Kross ah sual reng reng neilo chu mihring suala awm mek tlannan a rawn pe a, Pathian lak atanga mihrang lo ni tawh mihring te chuan Pathian angchhunga luh leh theihna hun siamsak in kan awm leh tih kan hre vek awm e.

Mihring te famkim lova siam kan nih avang hian mitha, fel, piangthar te pawh hian famkim lohna leh that lohna lai te, chak loh lai te an nei ve reng thin a. Heng chak loh chang kan neih hian Isua Krista hi kan pan vat thin em tih hi in ngaihtuah chian a ngai khawp mai.

Mihring mihrinna in kan harsatna te hi han sutkian han tum thin mah ila, rei a daih thei lo a ni. Pathian kan han belh chiah erawh chuan engkim mai hi a kaw duak duak mai thin a, rilru leh tih takzet a Pathian dawr hlawk zia chu keimahni ah ngei tihlan in alo awm leh thin a ni.

Bible ah hian Isua Krista chu harsatna leh manganna kan tawh chang ni pawha kan harsatna te min sutkiansak tu leh Pathian hnena kan harsatna te min sawipui thei tu ani tih a inziak a, heng te hi hre reng ila, mimal leh chhungkua a harsatna kan tawh hian Isua Krista i pan thin ang u.

 

 

Outreach Mission....

 

Pathian awmpuina leh kaihhruaina azarah Outreach Mission Sunday kan lo thleng leh ta der mai a, Outreach lam rawngbawlna pawimawh zia leh tul zia hi Sipai te hian hre thar leh ila a tha khawp mai.

Mizoram hian missionary/outreach worker hi mi 2300 chuang lai mai a tirchhuak a, he hi state population atanga teh chuan   khawvel pumah pawh a tirchhuak tam ber zing ami kan ni a. India Eastern Territory pawh hian Kross Sipai leh Evangelist Teacher tam tak Mizoram chhung leh pawnah a tirchhuak a, hmanni lawkah pawh Centreal North Division Missionary Convention hlawhtling tak mai kha kan nei a, kan missionary te an rawngbawlna benglut tak tak leh harsatna an tawh te pawh kan hria in a rinawm.

Thenkhat chuan ‘Tirhchhuah kher a ngai lo, tirchhuak lovin helaiah Chanchintha hrilh tur leh la piangtharlo an tam lutuk’ tiin an sawi thin a. Hei hi a dik nalai chen a awm. Mahse, he kan ram Kristian ramah hian thusawi leh Pathian thu hi vawi tam tak kan lo ngaithla  tawh thin a, rilru tak tak a lo tuh tum leh a duh te chuan an lo senglut mai a. A duhlo leh engah mah ngai lo chuan an senglut lo mai a. Heng te hi engah pawh in hrilh in ngaihven mah ila, an thinlung hneh hi a har em em thin a ni. Ramthim leh ringlo mite awmna hmuna chhuah a, chanchintha hril hi kan tih tur pawimawh tak a ni a, ‘Thilsiam zawng zawng te hnehah Chanchintha hi hril rawh u,’ tiin kan hmu a, hei hi kan tihtur a ni bawk a ni.

 

 

Hringnun ah.........

 

Kan dam chhung khawsak nun ah Sum leh pai, silh leh fen hi kan mamawh, a tel lo in tumah kan awm thei lo, chumi rual in Hriselna hian thuk takin kan hringnun ah zung a kai nget tlat bawk. He hriselna hian  sum leh pai ai mah hian hmun a chang pawimawh zawk te pawh a tih theih awm e. Mi a hriselna a lo tlak hniam hian rilru leh taksa ah lo langin rilru ngaihtuahna a lo buai zo a, chumi rual chiahin kan hnathawhna leh kan thil tih ah a rawn lang chhuak ta thin a ni.

Heng hriselnana hian rilru leh taksa piah lam ram a kan thlarau nun lamah pawh nasa takin nghawng a lo nei thei bawkin, thlarau nun a chaklo thin. Heng rilru   taksa leh thlarau a chak lohna te hian Ringtute Nunah Krista hmel a hliah fo thin reng a ni. Chung hrarsatna kan tawh chang chuan Rinhlehna sual ten rilruah hmun rawn luahin, Krista leh a thiltihtheihna kan ringhlel fo thin. Nimahse hei hi hre reng ang u kan hnen a awm thin leh kan rin Krista hi a pangngai reng a, a danglam ve ngai lo, kei mahni hi kan danglam thin a ni zawk.

“ Lei taksa chak loh vangin thlarau nun a chau thei, hringnun buaina vangin Krista hmel a fiah reng thei lo fo, chu hun i lo thleng palh anih pawhin i hnen a Pathian awm thin kha a la danglam lo, nangmah i danglam a ni tih hrechhuak thin zawk ang che. I hringnun hman mek pawh Ama duan a sin.”

 

 

Simna Tel lo Piantharna

 

Hmuchhuaktu William Booth khan Kum Zabi Sawmhnihna a thil lo thleng tur paruk (6) a sawi a, khang a sawi te kha tunah chuan mit ngei a hmuh tur leh beng a hriat tur in kan hma zawn maiah a rawn thleng dik tawh a nih hi.

 

Hmuchhuaktu William Booth-a sawi zing ami ‘Simna Tello Piantharna’ tih hi tunlai kan Zoram dinhmun leh kan Kristianna nen a tehkhin hian a dik hle a, Corps/Kohhran ah ngei hian ala thleng dik zel dawn niin a lang bawk.

 

Corps/Kohhran a inhmang tak tak zingah hian ‘Simna Tello Piantharna’ nena rawngbawl hi kan awm ang tih a hlauhawm khawp mai. Mihring mihrinna angin kan rawngbawlna te hlawhtling angin leh vul angin langchhuak mahsela  ngun takin han bihchiang ila chuan heng simna tel tak tak lova Pathian rawng bawltute sulhnu leh rawng an lo bawl tawhna hi a buaiin emaw siamthat ngai a tam hle in a rinawm a ni.

 

Zuk leh hmuam ti lo, ruihtheihthil a insum kim thap, inkhawm taima em em leh Kohhran a a kul a tai a inhmang zingah pawh hian ‘Simna Tello Piantharna’ nena rawngbawlna hi a kalpui theih hle a, mahse Thlarau Thianghlim hnathawh an chungah a kaltlang thei miah bawk si lo. Midang/Thalai Member pui te tana nelawm loh leh hnawk nihna te a thlen thei zawk hial a ni.

 

Midangte Biak Ina inkhawm tichaktu nge kan nih a Keimahni avangin midang inkhawm duhlo? tih hi in ngaihtuah chiang ila, ‘Simna Tello Piantharna’ ni lovin ‘Thlarau Thianghlim nen a Piantharna’ nen rawng i bawl ang u.

 

 

I hun tu tan nge i hman??

 

Khawvelah hian mi tluklehdingawn sarih (7) vel awm angin mithiam te chuan an chhut a, heng zawng zawng mihring te hi Pathianin nikhatah darkar 24 theuh min pe a, heng darkar 24 Pathianin min pek hi kan hman dan a inanglo hlawm hle in a rinawm a, engtiang chiahin nge kan hman le?

 

Nikhata darkar 24 kan neih ah hian Pathian biaknan/tawngtainan darkar engzat nge kan hman tih hi kan in ngaihtuah ngai em? Mihringte mahni ei leh bar theuh intodelh in kan buai hle a, buai hle mah ila hunawl chu kan insiam thiam hle thin bawk a. Heng hunawl kan neih ‘tlemte’ te hi eng tih nan nge kan hman thin le?

 

Pathian kan biakna dal thei tu thil chi hrang hrang a tam tawh hle a, khawvel a changkan zawh poh leh a tam belh zel dawn niin a lang bawk a. Heng thil chi hrang hrang te hian Pathian kan biakna a dal thin em? tih hi inzawt ila a tha khawp mai.

 

Mi tute pawh vawikhat chiah kan piang dawn a, vawikhat chiah vanglai kan nei dawn a, vawikhat chiah kan thi dawn bawk a; he ‘Nunna’ hlu tak vawikhat chiah kan hman theih tur hi Pathian duhzawngin kan hmang em tih hi i inen thin ang u.

 

Kan hna/zirlai chhuanlam in Corps/SAY thiltihah kan tel lo thin em? Isua’n engtin nge a ngaih ang. Activities nuam  ah chauh tel duh a a nuamlo chin a kan tel leh si hian Isua’n engtin nge a ngaih ang. Corps a inhmang tak chunga ‘lang lova sual’ kan lo tih hian kan rawngbawlpuite bum mah ila Isua’n engtin nge a ngaih ang. TUNA I CHHUANLAM TE HI NAKINAH ISUA’N A PAWMSAK CHE ANGEM?

 

 

Ro hlu ber........

 

He kan chenna khawvel ah hian ‘Enge hlu ber?’ tiin han inzawt ta hlawm ila, hlu ber nia kan hriat chu a inang lo ngawt hlawmin a rinawm a. Thenkhat tan chuan kan ro emaw, kan sum leh pai, kan bungrua/tlereuh emaw, kan in leh lo te pawh a ni maithei.

 

Thil hlu tehna khawl hi awm ta se, keimahni ina hlu kan tih em em, kan roh em em te hi han teh ta ila, engtia hlu te nge ni hlawm ang aw?!

 

He kan khawvel a kan neih hlu ber ber, kan roh em em te hi lo thihsan ta ila engtiang chiah in nge a hlut ang tih hi kan ngaihtuah ve fo in ka ring a. Kan taksa tawihral mai tur bulah phumtel in lo awm ta se chu a hlutna chuan awmzia a nei tawh in a rinawm loh a ni.

 

Mi tute pawh kan damlai chuan damchhung khawsakna te ngaihtuah a ngai a, ei leh in tur, silh leh fen te kan ngaihtuah ve a ngai a. Hetianga buai taka kan nitin hun kan hman lai mek hian ‘Enge kan ro hlu ber ni ang?’ tih hi kan ngaihtuah ngai em le?

 

He leia kan neih hlu tak tak nia kan hriat, kan roh em em te hi kan thih hunah kan chhawm theilo tih chu kan hre vek a, ro hlu tak kan chhawm theih awmchhun chu eng thil nge ni ta ang le?

 

Thih hnu pawh a chhawm theih, damchhung khawsak rel lai pawha neih reng theih, he khawvel sum leh pai leh hausakna zawng zawng te ai pawh a hlu zawk ‘RO HLU ISUA’ hi kan nei tawh em tih hi i inchhut ang u.

 

RO HLU ISUA hi thih hnu pawhin a hlutna a tlahniam lova, a hlu telh telh zawk a. Khawvela kan awm lai pawha hlu em em mai hi kan ‘Vanram Ticket’ hlu tak leh hlu ber alo ni e.


Pathian faknan i taksa i phal em?


Kan Bible Thianghlim chhungah hian vawi tam tak min siamtu Pathian hian Amah Amah faka zai a, kan taksa te Amah chawimawinan a hmang tur in min ti a. Pathian in min phut ang ngei hian kan taksa hi Ama tan kan phal em tih hi in ngaihtuah a ngai khawp mai.
Pathian hmangaihna hi keimahni mihringa a rawn lanchhuah rual rual hian kan rilru, kan taksa leh kan thlarau te hi khawih chet in a awm thin a. Heng Pathianin min khawih chang te hian Pathian faka kut han ben te, ban han phar te leh Amah faka lam te keimahni ah a rawn thawh chang a awm thin a. Heng ‘khawihna’ leh ‘thlarau lam hnathawh’ keimahni a a rawn lan te hian kan upbo mai thin nge kan lanchhuah tir thin?
Mihring te hi kan hlim leh kan lawm kan lantir nan a changin kan nui a, kan au a, kut kan beng a, a changin ban kan phar thin a. Inkhel kan en a, kan tan lamin an pet goal chuan kan lawmin a chang phei chuan kan lam fo thin ang.
Hetiang chiah hian Pathian hnathawh keimahni a a rawn awm hian lanchhuah tir a, tihtakzeta kan taksa a kan fak hi a pawimawh hle a ni. Keimahni ah zahna leh miten min nuih ang tih rilru te pawh a rawn awm thei, mahse heng zawng zawng ah hian Pathian tan a zah leh nuih te pawh chu kan inhuam tur a ni.
Mihring hma-a zai, lam, banphar leh kutbeng te kan ni lova, Pathian hma-a ti kan ni tih hi kan inhriat a pawimawh khawp mai.
“Mahni ta pawh in ni lo va, Mana lei in ni tawh asin, chuvangin in taksaah chuan Pathian chawimawi rawh u.” tia I Korinth 6:19-20 a a sawi angin Isua Krista thisen a lei kan ni tawh a, kan taksa, kan aw leh kan theihna zawng zawng hian Pathian hi i fakin i chawimawi ang u.



Financial Campaign......

    Naktuk Pathianni Thianghlimna Inkhawmah hian Corps leh Society hrang hrangah Financial Campaign nei turin Territorial Headquarters chuan Local Officer hrang hrang te mahni Corps chhuahsan in a tir leh dawn a ni a, he Financial Campaign hi rah tha a chhuah theihna tur chuan Sipai te hi kan pawimawh hle a ni.
    India Eastern Territory a Chhandamna Sipai Pawl hi Self-Support Territory anih avangin sum leh pai lamah hian intihchak a, infuih thar hi kan mamawh thin hle a. Territory chak leh hmasawn kan nih theihna tur chuan ‘Financial’ bik ah hian tan kan lak a pawimawh hle a ni.
    Local Officers Campaign tura chhuak te pawhin a an hriat tur pawimawh tak pakhat chu he campaign ah hian ‘Financial’ mai ni lovin ‘Sipai Nihna Tuhnghehna’ Campaign ah te hman tangkai a tul in a pawimawh khawp mai.
    Thlarau lam indona nasa tak he kan Territory a thleng mek hi ‘Malsawmna’ ah a chan let zawk theihna turin he ‘Financial Campaign’ hian nghawng tha tak nei thei se a duhawm khawp mai.
    Kohhran emaw Pawl pawh chak taka kal leh hmalak anih dawn chuan ‘Inlungrualna’ a ngai a, tin, ‘Financial’ ah pawh kan that a ngai a. He ‘inlungrualna’ leh ‘Financial’ hi kalkawp tur a ni a, a kalkawp lo anih erawh chuan Kohhran chhiatna leh hnungtawlhna nasa tak a thlen thei zawk a ni. Kohhran hmasawn, thangduang tak mai kan nih theihna tur atan chuan inlungrual tak in awm ila, sum leh pai ah hma kan sawn theihna turin nasa takin hma i la in i tang ang u.


Inkhawm hi......

    He kan Zoram Kristian te mai nilo, khawvel hmun hrang hrang a ringtute zingah hian Pathian Biak In inkhawm a kal kher tul ti lo tam tak an awm a. Chung mi te chuan ‘Biak Inah chauh Pathian a awm hleinem’ ‘Inkhawm ho nunah engmah hmuh tur a awm chuang lo’ ti tein leh thildang hrang hrang hmang ten ‘Inkhawm’ chu a tul lemlo ah an ngai a ni.
    Zawhna lian tak pakhat lo awm thei ta chu ‘Kristian te hi inkhawm ngai lovin leh Pathian Biak In te neilo ta ila, kan Kristianna leh kan rinna kawngah hian enge kan an ang?’ tih hi a ni. Kan Kristianna keng nung tu leh Pathian atanga chakna kan dawnna tam tak hi inpawlhona, Inkhawmna avang ani tiin sawi ila kan sawisual tamin a rinawm loh.
    America a Psychiatrist lar tak pakhat Dr. James C. Patterson II chuan, “Mi, Biak In a inkhawm a Pathian fakna te a neih hian ina a awm ringawt ai in a hriselna in hma a sawn a, Biak Ina kal hi tisa tak pawhin hriselna a ni,” tiin a sawi a. Tin, tunlaia lar tak leh kan buaipui tak ‘Depression’ kan tih vei zinga a tam ber chu ‘Inkhawm ngailo’ leh ‘Sakhuana la runlo’ niin a sawi bawk.
    Mi thenkhat in Inkhawm tullohna tam tak sawi tur an neih lai hian milar leh Pathian thuhriltu tam tak chuan Biak Ina ‘Muthlu’ tura kal ringawt pawh inkhawm loh ai chuan a tha zawk tiin an sawi thin a. Mahse mutthluk tur tihna ni lovin Pathian Biak In kan ngainatna hrim hrim kha a tha tih an sawina a ni. Karkhatah hian kan mamawh tihnan a hun kan hman leh Pathian tana hun kan pek zat hi chhut ta ila, kan hun hman danah Pathian hi a lungawi chiah angem?


League of Mercy.....

    Chhandamna Sipai Pawl rawngbawlna peng pakhat pawimawh tak mai leh Kohhran tihbik awm lova Kohhran unau te nena rawng kan bawl ho theihna League of Mercy (LOM) rawngbawlna hi a ropuiin midangte tana malsawmna tam tak thlentu a ni tih chu kan hre theuh awm e.
    LOM rawngbawlna hi 1892 daih tawh khan Canada lamah bul an lo tan tawh a. Chu rawngbawlnaah chuan kum bithliah awm lovin mite tana rawngbawlna, vantlang tana rawngbawlna chu an kalpui a ni.
    LOM rawngbawlna in a tum ber chu thlarau lam leh tisa lama mi tanpui ngai te tanpui te, an tisa mamawh phuhruk sak mai bakah an thlarau Krista hnena hruai thlen hi a ni a. Kohhran inthliarna a awmloh avang hian LOM Member ah pawh Kohhran dang te an awm nual thin a, hei hian rawngbawlna hi a tichak in a ti hmasawn hle thin a ni.
    Kan Corps a LOM te pawhin nasa takin rawngbawlna hi an kalpui a. Damlo tanpui te, mi harsa tanpui te in hun tam tak an hmang thin a, anmahni avangin mi tam tak chuan Pathian malsawmna an dawng a ni.
    Chhandamna Sipai Pawl rawngbawlna tak tak kengkawh tute an nihna avang hian an rawngbawlna hi ngaihhlut nachang leh puih nachang hria ila, Sipai Pawl hmel lanna lian tak pakhat an nih avang hian an rawngbawlna atan pawh i tawngtaipui thin ang u.
    ‘Tih tak meuhvin ka hrilh a che u, Heng ka unau te berte zinga mi pakhat chunga in tih chu ka chunga ti in ni.”

----------------------------------------

Pate Ni..........

    Chhandamna Sipai Pawl te hian Kohhran dang ten an hman ngai loh Mother’s Day leh Father’s Day te kan nei a, Mother’s Day chu kan lo hmang tawh a, naktuk ah Pate Ni (Father’s Day) kan han hmang leh dawn ta a, hei hi Chhandamna Sipai Pawl te kan vanneihna em em pakhat chu a ni.
    Pate Ni kan hmanna hi la reilo hle mahse kum tin hian Pate Ni hlutna hi kan hre tial tial niin a lang a, thenkhat te tan chuan Nute Ni ang bawkin kan Pa te ropuina rama kal tawhte kan ngaih thar leh na ni leh mittui kan senna ni te pawh a ni thei. Mahse, Pate hlutzia hriatchhuahna ni ah leh chatuan ram pan tawh te pawh anmahni zah tharna leh chawimawi na ni ah hmang thei ila a duhawm khawp mai.
    Naupang te atanga puitling nih hnu thleng pawh hian Pa te hlutna leh pa te ropuina hi hriat a har thin khawp mai a. Awmdan tur leh mawi te min zirtir a, mite kan an theihna turin thahnem ngai takin lehkha te min zirtir in min fuih thin a. Heng min fuihna te, min hauhna te hi a hunlai chuan hriatthiam a har fo thin a, mahse hun a kal a, alo liam meuh chuan an thu min hrilh leh min fuihna te chu a dik zia kan hrechhuak leh thin.
    Pate Ni ah hian kan pa te hlutzia leh chawimawi tlak an nih zia kan pa te theuh hnenah lantir thei ila, thil ropui tak kan tihsak theilo anih pawhin thil eng emaw tal kan pa te kan ngaihlu a, kan ngaisang ani tih lantir nan hlan theuh i tum ang u.



Chhandamna Sipai Pawl kum 147

    Pathian in min kaihhruaina azarah Salvation Army chuan kum 147 kan lo tling dawn ta reng mai a, Pathian min kaihhruaina a ropuiin min lo hruai tawhna zawng zawngah Pathian hnenah lawmthu awm rawh se.
    Tlawm taka rawngbawlna tanin William Booth te chhungkua chuan chhel takin an mei ti mit lovin tuarna nasa tak paltlangin Salvation Army din zel nan leh kal zel nan an thawk a, tun dinhmun hi kan thleng thei ta anih hi.
    Mizoramah pawh Lt.Col. Kawlkhuma te, Sr. Capt. Lalkaithanga ten hrehawm tam tak turin bul an lo tan a, chhel takin an kalpui zel a, Kohhran dangte nekna leh hmuhsitna pawh pawisa lovin leh Headquarters in an zawmna an tihchah meuh hnu ah pawh thahnem ngai tak leh tuar chung zelin Salvation Army tlu mai tur chu an tungding hram hram a, heng kan mihuai kal ta te avang hian he kan ram Mizoramah ngei pawh Kohhran lian te zinga chhiar theih kan lo nih phah ta a ni.
    Salvation Army dincham kum 147na alo thlen dawn hian Sipai zawng zawng ten infuihtharna ni ah hmang ila. Sipai a nghet tur leh Sipai zia leh kalphung te tun aia nasa zawka kan vawn a, kan kalpui theih dan tur te sawi hova, ngaihtuah ho leh bawhzuina ni ah hmang ila a duhawm hle a ni. Ram 124 laiah rawngbawlna kan kalpui tawh a, ram dang tam tak Kristianna pawh la luh lohna ramah rawngbawlna tantu kan nih theihnan kan tawngtainaah i hriain nasa takin thahnem i ngai ang u.


Duhthlanna dik.......

    Khawvela kan awm chhung hian duhthlang reng reng hian hun kan hmang a, a then chuan thlan loh tur te thlangin buaina tam tak an hmachhawn a, chutih laiin thenkhat erawh chuan thlan tur dik tak thlang in harsatna an hma a lo awm thei te pawh an hneh mai thin.
    Chhandamna Sipai hian ni bik tam tak kan neih te zingah Decision Sunday hi kumkhat ah vawi 4 kan nei thin a, he Sunday hi YP Corps te pual ni deuhin a lang a, amaherawh chu Senior Corps tan pawh he ni bik hi pawimawh leh tul tak a ni  tho a ni.
    A hranpa a inhlantharna ni ang tawp hi mimal ang pawh in neih a harsa em em a, hetianga a ni pual bik anga Chhandamna Sipai ten kan lo nei hi kan vannei in Kohhran dang te laka kan danglam pakhat chu a ni.
    Kristian kan nihna angin duhthlanna chi hnih kan nei a, chung te chu Sual leh Tha a ni. Kan chhia leh tha hriatna hmangin thil Tha leh Sual te kan thliar zung zung thei a, chu chu kan NUN hruaitu pawimawh tak chu a ni ta a ni.
    Sual leh Tha kan thliar rual rual in kan duhthlanna in a kentel chu VANRAM leh MEIDIL a ni a, hei hi Kristian leh ringlo miten kan huntawp kan hmanna tur a ni  tih kan hre vek a, a khawi zawkah hian nge kan chatuan hun kan hman ang le?
    Mahni chauh ni lovin kan chhungkua leh kan thenrual te hian chu duhthlanna dik chu an thlang em tih hi in enfiah a, kan in ngaihtuah a pawimawh khawp mai. ‘Kei hi kawng leh thutak leh nunna ka ni,’ tia sawi tu Isua Krista hi thlang ila, chu kawng dik chu thlang ila, chu thutak chu thlang ila, a tawpa kan chan tur chu CHATUAN NUNNA ani tih hriain Duhthlanna Dik i thlang ang u.



Thalaite khawvel.......

    Kum zabi 21 na ah kan cheng mek tawh a, khawvel thiamna leh finna lah nitin mai a thang zel a, chutih mek lai chuan he kan chen na khawvel hi Thalai te khawvel tiin sawi ila kan sawi sual awm love.
    Khawvel thiamna te, finna leh ropuina zawng zawng te hi a hmang nasa tu leh chher a, chen nasa tu te chu thalai te hi kan ni a, thalai te hawi na lam apiang mai hi nu leh pa leh naupang te pawhin an hawi lam chu a ni ta zel mai.
    Mi tam tak chuan khawvel ram hrang hrangah te thalai ten Pathian an ngaihsaklo, Pathian an hrelo tiin hmun hrang hrangah te an sawi thin a, a dik na lai chen awm mahse a dik ber lo tih hi kan hriat a pawimawh khawp mai.
    TV ah te Gospel Channel tam tak a awm a, heng channel hrang hrang ah te hian Thalai sang tel in a Pathian an fak leh chawimawi lai hmuh tur ala tam in, he kan Zoram a thalai te ai mah hian Pathian thu ah an Nung zawk emaw tih tur hial khawpin Pathian an hnaih a ni.
    Khawvel sualna sang zelah hian Setana’n thalai tam tak Hremhmun lamah a hruai mek zel a, thiamna hrang hrang hmangin leh ruihhlo hmang te in boral tam tak an awm mek a ni. Heng Setana hnathawh hrang hrang te hi keini SAY te hian kan do let in kan thian te, thalai tam tak thlarau boral mai tur te hi kan chhanchhuak dawn lawm mi?

    “Thi tura hruai te chu chhanchhuak la, thah mai tur te chu chhanchhuak thuai rawh.” (Thufingte 24:11)



2012 editorial collection



 

Naktuk hi Chhandamna Sipai te tan chuan ni pawimawh tak mai Self Denial thawhlawm lakkhawm na ni a ni a, he rawngbawlna pawimawh tak hi khawvel pum a Chhandamna Sipai te chuan kan ngaihlu in Kohhran dang te pawhin an ngaihsan leh ngaihhlut em em thil pakhat a ni.

Self Denial intanna chu kan ngaithla fo tawh thinin a rinawm a, mahse han sawi nawn leh tho ila. Chhandamna Sipai rawngbawlna leh hmeichhia ten chanvo an neih ve thin te hmusit a, deusawh thin tu John Carleton chuan mak tak maiin Pathian kohna a dawng a, siamtharna changin Salvation Army Officer ni turin a inpe ta hial a. Rawngbawlnaah nasa takin a thawh hlawk a, Major anih hnu chuan Chhandamna Sipai in khawvel pum huapa rawngbawlna danglam tak mai, Self-Denial (Mahni Inphat thawhlawm) chu General William Booth-a chuan Major John Carleton-a chanchin a chhiar atang chuan alo tanchhuak ta a ni.

Major John Carleton chuan a kumkhat chhung nitina a chaw nghei ai a khawl a, chu chu Shilling 50 (Rs.500 vel) lai alo tling a. Hei hi General William Booth-a hnenah a thawn a, Self Denial bultanna chu alo ni ta reng mai a ni.

Self Denial intanna hi mahni inphatna tak tak, mahni chaw ei ai khawl a midangte tana inpekna in a intan a, hei hi Chhandamna Sipai rawngbawlna pawimawh tak leh mi harsa, chanhai leh retheite tana malsawmna thlentu tangkai tak a ni a. Mahni inphat in midangte tan malsawmna kan ni thei a, hemi ti thei tur hian Sipai chhungtin te a hma aia nasa in i in buatsaih ang u.

 

Nute Ni

 

      Nute Ni kan lo thleng leh ta a, dam tak a he ni hmang leh thei  a min hruaitu Pathian hnenah lawmthu kan sawi a pawimawh. Nute Ni kan lo thlen hian Nute kan chawimawi ve theihna hun a ni tih hi kan hriat nawn fo a ngai. Nute pawimawhna hre lo kan awm a nih chuan eng mi nge kan nih tak ang ? Kan nute chu  lehkhathiam lo emaw, Pathian thu hriatna kawngah pawh miril an ni lo mai thei, khawvel finna kawngah pawh mite pawl pha lo pawh an ni mai thei, Amaherawh chu khawvel a nu awm zawng zawng zingah kan nute hi NU tha ber an ni. Kan chawimawi hi kan tih tur dik tak a ni.

 

      Kan nuten min pai a, min hrin hnuah min enkawl seilian a, kan hreawm hlau reng reng in an hun pum an hmang a. Rual kan pawlloh an hlau a, thei leh thei lovin lehkha min zirtir a, an mi hmangaihna chuan kan tan  khawvel lak pawh an in huam a ni. Nu kan nei hi kan vanneih zia kan in hriat a pawimawh. Kan nute chuan kan thatna turin min zilhhau thin a, an thu kan pawm a kan zawm phawt chuan Pathian ring kan ni. Thil tha lo min zirtir ngai lova, kawng dik min kawhhmuh zawk thin.

 

      Nute ni kan lo thlen hian kan nute chuan Ropuina ramah min kaisan san tawh pawh a ni thei,  thutha tin reng min hrilh lai te pawh kan rilru ah a cham reng fo ang. Thu tha lo min hrilh ngai lo va, hmangaihna tin reng in min uap fo thin kha. He ni kan lo thlen hian kan nute kawng dik leh tha min hrilh thin kha rilruah i vawng thar leh theuh ang u.

 

      Tuna Nu min la dampuitu kan neih te hnenah hian kan hmangaihna kan lantir ve tur a ni. Tun thlenga Pathian in Nu min la enkawl thei kan neih avang hian lawmthu i sawi ang u. Pangpar kan pe a kan chawimawi chauh hi a tawk lo, kan Nu ten min hmangaihna kha hmangaihna vekin i chhang let ila, kawng dik  leh thutha tin reng min hrilh thin hmang khan i in hlan thar leh theuh zawk ang u.

 

      Lawmchang hria in, kan Nute I chawimawi theuh vang


CORPS CADET

 

 

                 Corps Cadet Sunday kan lo thleng leh ta a, he ni pawimawhna hi Corps Cadet lo ni tawh leh zo tawh te tan chuan a hluin,   kan hotu ten ni bik an lo siam hi a lawmawm em em a ni. Corps Cadet zirzo tur chuan kum 6 lai mai a ngai a, tin Piangthar an ni tur a ni. Mahni inpekna leh tumruhna a pawimawh zia a hre chiang   bawk tur a ni. La zirlai mek leh la zirtur tan chuan thuawihna nun a pawi-mawh hmasa ber a, a dawtah chuan Corps Cadet Guardian te chu a zahin an thu a awih bawk tur a  ni. Corps Cadet ten thutiam an nei a, chu thutiamah chuan an ding nghet tlat tur a ni. Corps Cadet te chu Corps rawngbawlnaah mi hman tlak an ni fo thin a, Corps Cadet zirzo tawh Local Officer chu Corps a  mi hmantlak ber ber te an ni. Tin, Corps Cadet zir zo, Officer atang te chu Pathian thusawi kawngah te, Pathian thu hriat kawngah te leh Tlaraubo manna kawngah pawh mi hman tlak ber ber an ni zel.

                 Corps Cadet te chuan Lesson chhan tur an neih atangin Pathian tan a mite lo inpek nasat zia leh thawhrimna thu te, Bible chang tam tak an nun atan a pawimawh turte an zir thin na te chuan Bible thu an hriat tam phah mai bakah, thuawih theihna a pe bawk a ni.

                 Corps Cadet te chu Corps rawngbawlna reng rengah mi hman tlak an ni zel a. Commanding Officer-ten tih tur an tuk apiang chu thuawih na nen an zawm reng tur a ni. Nakin hnu a Corps hruaitu turte an nih avangin an zirlaiah an tuiin, tih tak zetna nen an bei tur a ni. Chuvang chuan Corps Cadet nih hi a lungawi thlak a, mipuitling nihna a ni a, Pathian rawngbawlna kawngah pawh hmahruaitu an ni a, malsawm dawn na a ni bawk. La zir lo leh zir thei te chuan Corps Cadet nih tum ta ila, tichuan kan Corps ah mipuitling hman tlak kan ngah dawn a ni.



Tumkau Ni

            Kum tam tak chhung chu Tumkau Ni kan lo hmang ral tawh a.  Tumkau Ni hi eng vang a hmang thin nge kan nih kan hriat a pawimawh khawp mai. Kum za tam a liam ta, Kristian te chuan he Ni hi niserh a tan kan la hmang ta zel a nih hi.

 

            Lal Isua Jerusalem a Lal anga a luhna ni champha a ni a, Kristian te tan chuan ni pawimawh tak, kan hman reng fo tur chu a ni. He khawvel a a lo kal lai khan Lal ang a lo kal lovin, mihring zia rang pu in a lo kal a ni. Khawvel sual a boral mai tur chu a khawngaih a vangin a Lal Ram a rawn kal san a, chu chu he khawvel hian a hre si lo.  Judate khan Isua kha an nghah Messia kha a ni tih an hre si lo. Thiltihtheihna a thuam a nih avang khan thilmak tam tak a ti a, mithite a kaitho in damlote a ti dam a, mitdelte mit a ti varin, tawngtheilote an lo tawng theih phah a, Ramhuai paite a hnawhchhuah sak bawk a, thil mak tam tak a ti chung khan he khawvel sual tlantu tur  a nih kha an hre miah lo a ni. Amaherawh chu Juda tam tak chuan Thilmak tam tak a tih avang khan Rom Sorkar awpna hnuai atanga chhanchhuak thei tur a an rin avang khan an zui mai a ni. 

 

            Kei ni erawh chuan he kan sualna lak ata min chhandamtu tur a ni tih kan hria a, kan theih ang tawk a nasa in kan chawimawi hi kan tih tur a ni. YP Corps ten zing karah kawngte zawhin “ Hosanna! Lalpa hminga lo kal chu fakin awm rawh se, Ram lo thleng tur kan Pa Davida ram chu chawimawi in awm rawh se. Chungnung berah khian, Hosanna !” tia Tumkau nen an chawimawi thin ang in Sipai zawng zawngte pawhin kan theihna zawng zawngin i chawimawi ve ang u!!

PATHIAN BIA A INKHAWM

Pathian ringtu leh Amah zuitu kan nih hi kan in hre vek anga. chu ti a nih chuan Amah ringtu kan nih chuan a chibai buk turin a Biakbuk Thianghlim hi pan awm tak kan ni. Ringtu kan ni kan ti a,  Amah be tur hian kan kal leh peih si loh chuan ringtu dik kan ni thei dawn em mi le? Amah ringtute chu tih tak zet a chibai buk turin min beisei a, chu chu kan tih tur reng a ni. Kan Corps ah hian Sipai Puitling hi eng emaw zat kan awm. Mahse inkhawm hi chhiar tham lek kan ni. Sipai inkhawm, Tawngtai Inkhawm, Thianghlim Inkhawm leh Chhandamna inkhawm kan nei a, chungah chuan ringtu chu kan inkhawm thin tur a ni. Kan Biak in hi ringtute intuai hriamna  leh kan ralrelna hmun anih avangin Sipaite chu kan kal ngei ngei tur a ni. Ringtu chuan ral tlatna hmun a awm a nih a in hriat a pawimawh a, indo laiin tumah thil dangah an in hnamhnawih ngai lo. Raldo tur an nih avangin training tha tak a a lak a ngai a, a duty na hmun a kalsan thiang lo. Ringtu pawh lei Sipai dan ang a do nei reng a nih avangin a inthlahdah thiang lo a,  in ring rengin a awm tur a ni. Training kan lakna hmun Biakin hi a kalsan thiang lo a, a ralthuam in a in thuam reng tur a ni. Chu chu ringtu tih tur, a duty Lalpan a tuk a chu a ni.

 

            Chuvangin Kan buante hi tisa leh thisen an ni si lova, Felna awmphaw hain remna chanchin tha inbuatsaihna chu kan keah bun in kan ding tur a ni. Ringtu chu hnungtawlh lo va hmalam a kal tur kan ni. Kan rinna hi I din thar leh theuh ang u.


LITERATURE

                Thu leh hla awm ze  nei a phuah emaw ziak emaw hi Literature chu a ni. Chu ti a nih chuan thu awm ze nei a phuah leh ziak hian tangkaina a nei a nih chuan Sipai te hian kan ti thei vek tihna a ni. Mizoram hi Literacy ah hian India ram pumah pahnihna kan ni mek a, Literature ah hian kan sang kan ti em le? Ziak a rawngbawlna hi tawngka ai chuan thil a ti thei zawk tih hi kan pawm a tha. Chhandamna sipai Pawl chuan ziak a rawngbawlna hi a ngai pawimawh em em mai a, rawngbawlna ah nasa takin hna a thawk tih a hriat avangin kum 1878 January atang khan bul a lo tan tawh a. East London Evangelist hi ziak a rawngbawlna a kalpui hmasak ber a ni.

 

Mizoram bikah chuan Sipai te hian ziak a rawngbawlna hi a pawimawhna kan hre tam lo deuh em aw!! Testimony emaw, Sermon emaw, rawngbawlna tur atan a tangkai tak kan ziak hmangin rawng kan bawl thei tih kan hriat nawn a tha khawp mai. Mizoramah hian Sipai Pawl hian ziak a rawngbawlna hi kum 1934 atang khan a lo kalpui tawh a, Thlarau malsawmna mi tam tak ten an hmuh phah a ni. Sipai Pawl chhuah chanchinbute hi kan chhiar ngai lo a nih chuan tuna tang chuan chhiar i ching tawh ila. Kan chanchinbute hi chhungkaw tin ten lak vek tum ta bawk i la, Local Officer leh Pulpit chuangkai thei chin phei chuan lak ngei ngei tum ang u. Tin, kan sawi thiam lo a nih pawhin ziakin rawngbawlna kalpui hi kan ti thei vek tih kan hriat thar a tul khawp mai. Ziak a rawngbawlna hmang hian kan thlen phak lohna ah pawh rawng kan bawl thei a ni.

 

Kum engemaw ti hnuah ziak a rawng kan bawlna khan midangte nunah thu a sawi thei a ni tih kan hriat reng a tha. Chuvangin, Sipai tinte nasa zawk a rawngbawlna kan kalpui theih nan ziak a rawngbawlna hi nasa leh zual a kalpui thei turin tan in la teh ang u.

 

PATHIAN HNENA THILPEK

 

Pathian hnena thil pek chungchangah hian Sipaite kan harh thar a pawimawh khawp mai.  Pathian hnena kan thlatin pekchhuah hi han in chhut ta i la, pe tam tawk kan in ti em le? Pathian kan hmangaih kan ti a, kan hmangaih a nih chuan A ram zauhna tur hian eng chen chiah nge kan pen chhuah tawh. Midang ten thawh teuh teuh sela, kei ni’n thawh tlem ila kan ti mai dawn nge kan theih ang tawk a thawh thin zawk kan nih.

Kan neih chuang liam hi Pathian hian a hnena pe turin min beisei hauh lo. Amaherawh chu Sawma pakhat hi chu kan ta ni lovin Pathian ta a ni a, kan pe let mai zawk tur a ni. “I sumin LALPA chawimawi la” min ti a, Lalpa chawimawi turin kan thawh a ngai

Thil pekah hian kan tan tlan a pawimawh khawp mai. Pathian ram a lo zau deuh deuh na tur chuan keimah hian tihtheih ka nei a ni tih kan lantir a ngai. Sipai Pawl chhungkuaah hian Silaimu pe ngai lo kan awm em? Kan awm a nih chuan tuna tang chuan pek tum ta i la, pe dik lo kan awm a nih pawhin pe dik ta ila, Keimahni pawh kan lawm ang. Kan Pathian chuan, “Van tukverhte chu hawnsak che u in Malsawmna dawn sen loh khawp hial Ka vur dawn che u nge dawn lo, mi han fiah teh reng u” a ti. Kan Pathian ram a lo zauh theih nan din thar ngai kan nihna atang hian hmasawn tum in tan in la tlang teh ang u.

 

INPUMKHATNA

    Corps chu ringtute in zawmkhawm in a siam a ni tih kan hre vek awm e.

    Corps chu tu ta nge ni ta ang? A chhanna chu kan zavai a ta a ni. Ringtu mal awmna chu Corps a ni thei ngai lo va, kan in zawmkhawm na khan Corps ah min siam zawk a ni. Chuvangin Corps chhunga awm te pawh kan in lungrual a ngai khawp mai.

     Chak tur chuan in lungrualna kan neih hmasak a ngai. Ram chakna chu a mipuite ah a in nghat ang in, Corps chakna pawh Sipaite ah a in nghat tlat a ni. Local Officerte leh Sipaite pawh kan thawhhona a that phawt chuan kan chak anga, tin kan hlim bawk ang.

    Mi pakhat chakna ai chuan mi tam tak chakna chu a ropuiin, thil tam tak a ti thei zawk tih kan hriat kha. Chuvang in Krista ah chuan ringtute chu pumkhat kan ni tih kan hriat nawn a tul khawp mai.

    In peng tawn theuh kan ni a, Pathian ram zauhna kawngah pawh kan pawimawhna a in ang vek. In ti chak tawn a in fuih thar reng tur kan ni. Ding chhuak a, kan theihna theuh kan thawh khawmna khan kan Corps chhungah hian thlarau malsawmna a thlen thei a ni.

    Ram leh Ram, Hnam leh Hnam a indo chuan a dingchhuak thei lo ang hian, kan Corps chhungah hian kan in lungrual loh chuan kan ding chhuakin, kan hlim ngai hauh lo ang.

    Enga ti nge kan Corps kan hlim theih loh na chhan ni ta ang le? A chhanna dang vak a awm lo, keimah vang a ni tih hi Sipai tin ten kan pawm tlan a ngai. Corps nung leh hlim, chak leh inthurual kan nih theihnan inpumkhatna hi kan neih a ngai a ni.



Vana ro khawl dan

    Isuan chiang takin min hrilh a, Luka12:23,34; Marka 10:21. Vana ro khawl khawm dan chu mi harsa te tanpui leh chhawmdawl hi a ni a, chung thil kan tih avang chuan chhandam kan ni dawn tihna erawh a ni chuanglo, chung chu vana ro khawl khawmna ani e  tiin min hrilh mai zawk a ni. Mi rethei te tana kan thawhlawm  pek Self Denial te pawh a ni thei mai ang.

Chhandamna leh vana ro : Thilpek rawngbawlna leh vana ro khawl chu vanram kaina tur ang hiala ngai te pawh kan awm mai thei e, helai thu hi hriat chian kan mamawh lai tak chu a ni bawk. Tam tak chuan nakinah kan Lallukhum timawitu tur a ni e an ti thin a, kan chhandamna tan pawh pawimawhna nei ang hialin an sawi thin a, chu lam ai mah chuan he lei a kan damchhunga kan hlawkpui tur hi a nasa ber zawkin a lang. Chhandamna tura ro khawl khawm tur kan ni lova, chhandam tawh te sum khawl khawmna tur min kawhhmuh mai zawk a ni.
    Chhandamna leh thilpek rawngbawlna hi in zawm bawk mahse, van rama kan lallukhum timawitu ber tur atan erawh chuan a tangkai ber lo mai thei a ni.
    Chhandamna chu kan thiltih vang nilova Pathian thilthlawnlpek kan dawn a ni a,  Kan Pi leh Pu te pian hma daih tawh a, mihring thiltih tellova, Lalpa lo buatsaih tawh kha a nih avangin, kan ro khawl khawm avanga chhandamna chu kan chan a nilo tih chu kan fiah mai awm e.
    He khawvela tlachham lova kan awm reng theihna turin  sum ral theilo, bo theilo, kan in siam a mamawh a, chuvang chuan kan Lalpa hian a hnenah kan ro te khawl thin turin min duh a ni.

Mobile Phone

Bazar Corps chu veng hrang hrang atang a kalkhawm kan nih avangin inkhawm tan hun takah kan kal thei thin lova, amaherawh chu tlai lo tur a kan zir chhoh a ngai khawp mai. Tin kan vengte a hla a, inkar kik tak tak a awm kan nih avang leh inkhawm ban hnu lamah in lama haw hman lo a tihtur pawimawh dang nei kan nih thin avang in mobile handset pai kan awm thin. Ken loh theih hi a that ber laiin, keng lo thei lo dinhmun a kan ding a nih si chuan silent ah emaw switch off emaw tal hi ching ila, inkhawm laia min rawn bia a nih pawn chhan loh tum ta ila thil tha tak a ni ang. Phone a lo rik hian thenkhat chuan an chhang mai thin a, hei hian inkhawm boruak a ti chhe thei tih hriat a tha. Chuvang chuan Pathian be tur a kal kan ni a, inkhawm chhung na na na hi chuan Pathian tan kan hun hi i pe phal ang u.
Thenkhat inkhawm lai a mobile khalh ching kan awm thin a, SMS in thawn nan Biak In chhung kan hmang thin hi sim tum a tha khawp mai. Darkar khat kan inkhawm chhung hian thil pawimawh em em hi a thleng hman lo tlangpui. Thusawitu enkar a thu ngaihtlak hian thusawitu hi nasa takin a pui tih kan hriat a tha khawp mai. Chu chu keimahni tan pawh a pawimawh mai bakah, mahni kan in thunun hi a pawimawh hle.
Biakin ah kan kal chhan hi kan chian a pawimawh khawp mai. Pathian chibai buk a, a thute ngaithla turin kan lo kal a ni tih kan hriat a tha. Inkhawm hi tihdan phung pangngai ang a kan ngai a nih chuan keimahah hian Thlarau Thianghlim hnathawh a lang thei hauh lo vang.
A tam zawk hi nei ve tho, keng lo ngam an nih kan hriat a pawimawh, kan keng a nih pawhin switch off a, inkhawm banah switch on leh mai hi a harsa lo. Kan than lenna kawngah min dal thei ang chi dah tha ngam ila chu Thlarau malsawmna kan dawng ngei ang.




LAWMTHU SAWI

Hmangaih har tak mi i tawn fuhte avangin Pathian hnenah lawmthu i hrilh thei em? Thenawm sual tak emaw, hotu hrawn harsa tak emaw i nei em? Chung mite avang chuan lawmthu sawi rawh. Pathian chuan a hmangaih che a, i lawmna chu tih famkim a duh avangin anmahni hmangaih theihna a pe che a ni.

Hmangaihna lan chhuahtirna hmun tha ber leh harsa ber chu mahni inchhung, kan chenna ngeiah hian a niin ka ring. I nupui emaw, i pasal emaw mizia ah i thin tiur fo thin an awm em? I nu leh i pa te khawsakpui an har viau em?  Nge, i fate an sual viau zawk le?

Isuan “In hmangaih tawn rawh u”, a ti a. Inngaidam tawnin, Pathian hnenah lawmthu sawi theuh thei ila, a va han tha dawn em! Pasal zu inmi avang te, fa sual tak te avanga lawmthu sawi chu thil har tak tur a ni. “Nanga hmangaih ka ngai lo” ti a min chhangtute hmangaih phei chu thil awlai a ni hauh lo.

Mahni mita khanchhuk – thaa inhriatna te, mahni inlainatna te leh tuar nasa tawh nia inhriatna te  hi pawm(accept) a harsa duh hle a. Kan mita khanchhuk awm kan hriatchhuah(hmuh) theihna tura  Pathianin mi thenkhat kan hnena a rawn tirhin Pathian hnenah lawmthu kan sawi thei em?

Engkima lawm zel tura Pathianin min duhna hi tihhlawhtlin a harsa fo thin.  Mahsela, Amah kan thinlungah a chen tlat chuan “Lawmna tur hlir a ni”  tih kan hrechhuak thei ang. ¶






Add comment to this page:
Your Name:
Your Email address:
Your message:


This website have 202530 visitors (601404 hits)
 


Zoram Sipai Pawl rawngbawl dan hi tha tawk i ti em?
Tha ka ti lutuk, a bak a awm thei lo
Aw, a tha tawk e
A tha ka ti lo
Ngaihdan ka nei lo

(View results)


 
=> Do you also want a homepage for free? Then click here! <=
SALVATIONIST (Bazar Corps S.A.Y. Newsletter) ================ EDITORIAL BOARD ================ Editor : ================ Jt. Editor: H. Lalhriatpuii ================ News Editor : H. Lalrinchhana, Reuben C. Zochamliana, Marina Lalrintluangi, Ngurnunpari ================ Cir.Manager: Lalrinchhana Lalrinpuia ================ Webmaster: Lalnghahchhana ================ Website: http://bazarcorps.page.tl & http://bazarcorps.blogspot.com ================ E-mail: bazarcorps@yahoo.com editorialboard07@yahoo.com, bazarcorps@gmail.com ================ Address: SAY, Bazar Corps, Dawrpui Jail Veng, Aizawl. Pincode: 796001. ================ Published by : Salvation Army Youth, Aizawl Bazar Corps, Jail Veng: Dawrpui. ================