Kum 2013 chhunga Salvationist Weekly Editorial dahkhawmna a ni.

-----------------------------------------------------



Editorial on 4 May 2013 issue:

    Jeriko kulh chu Israel fate luh theihlohna tura khar tlat ni mahse, an lama tang Pathian engkim titheia chu a chak em avangin Joshua leh a hoten Jeriko kulh bang chhah tak mai chu tunlai ralthiam tha leh changkang silai tha ber ber boom leh missile te leh indo thlawhna te nena an beih kan hre hek lo, nimahsela Pathianin ti tura thu a pek anga rimawi hmangin Pathian faka aruala tawtawrawt ham in  Jeriko kulh  bang chhah tak mai chu ralthuam tel lova rimawi hmanga au chim in  khua chu an la a, ahmei apa, apui a pang bawngte, beramte, sabengtungte nen lam an ti hlum vek a, khua chu an hneh a ni  tih chiang tak in Pathian thu in min hrilh a ni.

    Thalite hian tun hunah hian Pathian faka kan awka te kan rimawi te hmanga theihtawp tak meuh meuh ka chhuah avan tul tak em, thlarau bo man na kawngah leh sual kan beih na atan hian a tha tawk a ni tih Joshua leh a hoten Jeriko kulh an au chima an hneh atang hian kan hre thei awm e.

    Min Pathian thu nung teh chiam lova a sawi  anih chuan thlarau thianghlim pawlna dawn a har viau maithei a ni.
Nimahsela zaiwpawl ten emaw malzai pawh nise Pathian fakhla a sak atangin thu leh hla in nasa takin a mite min pawl thin a ni.

    Pathian fakna hian thil ati thei tak zet a ni tih kan hriat a tha a ni.

    I theitawp in Pathian fak leh chawimawi tura Pathian in i aw ka a pekche hmanga zaipawla zaitur leh I ri mawi tum thiamna Pathian in a pek che ka amah fak nana hmanga  hnungtawlh te hruai kir tur in Pathian in a ti che a ni.
    I thiamna i awka te amah faknan zawmthaw taka i hmang peihlo a nih ngai chuan, i khawnvar dahna a sawn sak hlauh dah ange.



S.A. kal zel dan

    Kum 148 kal ta khan William Booth te nupa chuan Christian Mission tih hming pu in London hmun chhe lai atangin rawngbawlna bul an tan a, chu an rawngbawlna tlawm tak chu Pathianin malsawm a sawm a, tunah hian khawvel ram hrang hrang 125 ah Salvation Army chuan rawngbawlna a kalpui mek a ni.

    Chhandamna Sipai rawngbawlna chu a kal zel a, Keini ram, India ramah pawh hmun kilkhawr takah ngei pawh kum 96 tehmeuh mai alo ding ve ta! Hun kalta te, kan mihuai kal ta te chanchin kan han chhui let leh hian Pathian in Salvation Army te min hruaina hi a ropui in, mal min sawm hle a ni.

    Pu Kawlkhuma’n tlawm te in bu a tan a, chu rawngbawlna chu Pathian in mal a sawm sak a, tunah chuan kan Territory chhungah ringawt pawh Sipai thahnem tak, chhiar zat zel mai kan lo awm ta a ni.

    Thlarau Bo hmangaih a, chanhai leh mamawh te tana thawk thin Salvation Army rawngbawlna hi Pathian in mal a sawm zel a, tun atanga kum 5 a liam meuh chuan Mizoram ah ngei kum 100 Salvation Army te chuan rawngbawlna kan kalpui dawn a ni.

    Pathian in min hruaina te hi hre reng ila, in hmangaih tawn takin, in lungrual takin Pathian tan i bei zel ang u.
-----------------------------------


Ziak a rawngbawlna

    Pathian rawngbawlna kawnga Ziak a rawngbawlna pawimawh zia chu kan hre vekin a rinawm a, heti khawp a pawimawhna a nei tam hi kan mi hmasa te khan an lo hre reng a, chanchinbu te chhuah in nasa takin hetiang kawngah hian Chhandamna Sipai chuan hma a la a ni.

    India rama Chhandamna Sipai rawn din a, rawn puluttu Booth Tucker ngei pawh kha War Cry Chanchinbu a chhiar atanga Chhandamna Sipai a rawngbawl tura inpe ani tih kan hre fur in a rinawm a. Kan hmuchhuaktu William Booth leh a thawhpui ten War Cry chanchinbu lo chhuah lo ta se India ramah hian Chhandamna Sipai Kohhran hi din a ni angem? Din pawh lo ni ta se tun ang hian a lian ang em? tih thleng hian ngaihtuahna a kal tir thei a ni.

    Rawngbawlna kawngah thahnem kan ngaih a, mi te Pathian hnena kan hruai duh chuan Pathian Thu, Bible kan hre tamin kan chhiar tam tur a ni a. Tin, lehkhabu tha tak tak te pawh kan thlarau nun thanlen zelna turin kan chhiar fo tur a ni.

    Thusawi thiam, Pathian in a hmang kan tih tam tak te hi nasa takin in chhiar zau chungin an in buatsaih a, chu chu Pathianin a hmang ta thin a ni. Pathian mi hman, Pathian kaihhruai kan nih theihna tur atan chuan hriat mai leh sawi mai ni lovin, Ziak a rawngbawlna hmang hian kan theih ang tawkin tan i la ve ang u.
-----------------------------------

I TAN LEH KA TAN.....

    Eden huan a kan nu leh pa hmasa te tihsualna avanga Pathian laka mihrang ni tawh chu Isua Krista avangin van khua leh tui nih theihna kan nei leh ta a. Pathian in a fapa neihchhun, a hmangaih em em min pek vang chauh a ni.

    Pathian leh mihring te inkara khi kak zau tak awm chu Isua Krista Kross chuan lei siamin Pathian leh mihring te inkar chu zawmin a lo awm ta a ni kha.

    Pathian fapa, thiltih theihna nasa tak nei ni mahse mihring te kan dam leh na turin anchhedawng Kross ah khenbeh a ngai a, sawisak leh diriam a tawh a ngai. Engmah sualna neilo, bawlhhlawh kailo chuan dawt a hekna leh puhna tihreng te chu a tawk a, mahse a thiam thu vawikhat mah a sawi lo. Hmangaihna chuanin thiamthu sawi lo turin a phuarbet a, TLANNA HLU chu kan tan alo awm ta!

    A sawi lawk ang ngeiin a ni thum tukah chuan thlan atangin a tho leh a, THIHNA HNEHIN A THO LEH TA! Chatuana nunna kan neih theihna tura thi a, tho leh ta hi engtin nge kan chhan let ang le?

    Petera chuan ar a khuan hmain Isua Krista chu vawi 3 a phat hman anih kha. Kan nunah hian vawi engzat nge Lal Isua hi kan phat ve le? I in enchiang ang u.

    “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.” (Johana 3:16)
-----------------------------------


HOSANNA!!!

    Naktuk hi Isua Krista he khawvel a vawikhat Chawimawi a a awm na ni champha a ni lo leh ta reng mai a. He khawvelah kum 33 chhung tehmeuh mai hun a hman chhung in vawikhat chiah chawimawi in a awm a ni tih ka hria in kan ngaihthla fo thin awm e, chu mi ni chu Tumkau Ni tiin kan vuah ta anih hi.

    Tumkau Ni a lo thlen hian enge kan rilru ah kan ngaihtuah a, eng te nge kan suangtuah thin le? Zing a tumkau nen a kawngzawh ringawt ami? Kan in ngaihtuah chian a ngai khawp mai.

    Kan thinlungah hian Lal Isua Krista hi vawi engzat nge chawimawi a a awm thin? Kan nungchang leh kan chetzia avang hian Isua Krista hi chawimawi in a awm em? Kan thusawi te, kan tawngkam avang te hian Isua Krista hi midangte hnenah chawimawi in a awm em? I in ngaihtuah chiang ang u.

    Pathian laka mihrang ni tawh, kan dam leh theih na tur atana he khawvel a hrehawm tinreng rawn tuar tu in Chawimawi a hlawh ve na ni awmchhun ah hian thinlung leh tihtak zetin, Amah fak chungin i chawimawi ve ang u.

    “Hosanna! Lalpa hminga lo kal chu fakin awm rawh se,  Ram lo thleng tur, kan Pa Davida ram chu chawimawiin awm rawh se. Chungnung berah khian Hosanna!” tiin hlim tak in Lal Isua  hi i fak in i chawimawi ang u.
-----------------------------------

HIV/AIDS hi.....

    HIV/AIDS chungchang hi vawi tam tak kan ngaithla tawhin a rinawm a, a tu a te pawh hian eng vanga kai theih nge tih leh taksa-a tihchhiat dan te chu kan sawi zul thei vekin a rinawm a, mahse HIV/AIDS chungchang hi sawi zawh a awm theih loh avangin sawi nawn fo hi a tul thin a ni.

    HIV hi natna hrik te takte AIDS natna thlentu hrik a ni a. Kan taksa a natna lo do lettu ‘Taksa Sipai’ eichhetu a ni. A tihchhiat nasat avangin HIV hrik paite chuan an taksa a natna hrik lo lutte an do hneh lovin natna a rawn thlen ta thin a, chu natna chu AIDS natna an tih hi alo ni ta a ni. Natna thlentu tlanglawn zual deuhte chu TB, kawthalo, pneumonia, awmvel leh vun cancer te an ni hlawm a ni.

    Mihring taksaah HIV hrik chu thisen emaw taksa a tuiril (mipa chi) ah te a a awm thin a. Chil leh mittuiah te pawh awma hriat a ni. HIV hrik hi taksa-a a luh tawh chuan tihdam emaw tihhlum theih anih loh avangin a paitu chuan a damchhhungin a pai tawh mai a, a taksa chakna a tlakhniam chuan natna tihbaiawma kan ngaih ‘AIDS’ natna thlenin thihna a thlen thin. Amaherawhchu, HIV hrik paiin a taksa a vawn uluk a, exercise leh ei leh in lama a taksa mamawh ang a ei chuan AIDS a vei nghal mai lo tih hriat tur a ni a, mi pangai angin a nung thei a ni.

    Mizoram chhungah nikum 2012 thleng khan thisen test mi 1,88,186 ah HIV hrik pai mi 6,829 hmuhchhuah a ni a, thisen test lo tam tak kan la awm bawk avang hian HIV positive hi hei aia tam tur ngaih a ni. Hetiang anih rual hian HIV positive te hi kan hmusitin kan endawng tur a ni lova, keimahnin kan en dan azir hian an damin an damlo thei a ni.
---------------------------------------------------

Outreach.....

    Outreach (Feh chhuah rawngbawlna) hi eng Kohhran mai pawh hian kan uar in kan kal pui nasa hle a, hemi atan hian budget te pawh duan lawk a ni thin fo reng a, hei hi a zau zawk a a hu ho a kan rawngbawlna kawng khat pawh a ni reng a ni. He Outreach    rawngbawlna hi eng hun lai chiah a tan nge anih chu hriat a ni lo na in   rei fe chu kan kal pui tawh tih erawh chu kan hre theuh ang.

    Heti  taka kan ngaipawimawh anih lai leh sum tam tak kan sen na anih lai hian, hlawk pui ta sawi tur lian tham hi kan nei em? Nge, “Hlawk pui tehreng” mai tiin keimahni hian kan sep raw tui a, chu chu tak tak emaw tiin kan Kohhran leh member pui te hnen ah chhunzawm   tlak anih thu sawi in sum tam tak  kan chhung leh ang.

    Ngaihtuah teh, Outreach a kan kal hian, mi mal a kal lovin a hu ho a ni tlangpui awm e. Kohhran Thalai te emaw, Nu ho te emaw, Outreach a kan kal hian, a nihna tak  ah chuan kan chhuah dawn lai Bus a kan han thu te hi chu kan  hlim in kan phur thin teh e tiraw! Kan va kal chhan kan hre lo chu ka ti lo, mahse huau huau hlimna lam kha a lang zawk mah thin a, chutah kan chhuak a kawng tluanin kan kir leh lam thleng hian kan thinlung ah kan kalchhan hi a chiang em? tih hi i in zawt nawn ang u.

    Hetiang anih thin avang hian, a ni lo maw kan Outreach te hian rah tha a chhuah loh fo thin. Tin, Missionary rual tha tak tak kan nei tho si a, heng missionary te hi  Outreach atan a kan sum sen tam tak te ai hian vur thin ta zawk ila, ko ri a tu zawk lo’ng maw?
------------------------------------------------

Naupang chu zirtir rawh

    Naupang chu a kal na tur kawng ah chuan  ah chuan zirtir rawh, a lo puitlin hun thlengin a theihngilh dawn si lo a....
    Mihring a lo pian atangin hringnun ah zirna a rawn tan thin. Nu hnute hne in a nu chu a thlir reng in a nu mit a hmangaihna pawh chu a hmu thiam reng a, he hriatna finna  hi Pathian malsawmna ropui tak zinga mi pakhat chu a ni. Kan mizia leh pianphung te kan pianpui, kan thhlak theih loh thil  a awm lai in, mihring in kan zirna atang leh tawn hriat atang te in thil tam tak chu kan her danglam in kan thlak danglam ve thin ve bawk . Chumi avang tak pawh chuan a ni naupang chu a nuapan lai, a hringnun in zir chhoh lai tak hi a pawimawh em em, zirtirna a dawn ten tam tak ah a nun kal chhhoh dan chu a hril dawn reng a ni. Heng zirtirna a dawn atang te leh a tawn atang a, a tha lam kawng la zawh a a chhe lam la thlang ta te pawh an awm tho awm e, chung te pawh zirtirna tha a dawng lo ni lo in, zirtirna tha lo a dawn tel ve tho vang emaw an thil tawn in a zir em vang te pawh ani thei.
    Helai lai tak hi ani , zirtiru te leh Nu leh Pa te hian kawng tam tak a mawhphurhna sang tak kan nei ve chu. Cradle Roll Sunday ah hian  abikin YP lama kan zirtirtu te an thahnem ngaihna leh an thawhrimna in ko ri a tu hle dawn a ni. Tu nu leh Pa leh Zirtirtu te mahin mahni fate leh naupang te thil sual ti turin an fuih lo ang tih chu thil chiang sa a ni. Amaherawh chu, kan en kawl dan bih chiang leh teh ang u, An awh apiang  tih sak hram kan tum em? Pa ber in fate a zilh hauh laiin nu ber in emaw fate a lo tan em? An mahni a harsatna sut kian tir ve  kan tum em? naupangte si in sum a lawm viau em? fate vui leh vai na kan lo awih sakin kan lo vui pui mai zel e em?Naupang enkawl na hian Pathian nge kan ngaih pawihmawh kan sum leh pai? nge kan hna lam thil ? Fanau te hi kan pathian laka kan rochhan an ni si  a. A tha lam kawng chu i kawh hmuh in i bei hram hram ang u,heng naupang te hi kan Corps khaiding kut leh ke ber tur te an la ni dawn si a.
----------------------------------------
     Salvation Officer hna hi....

    Salvation Army Officer ni tur hian ka qualification in a phak vang ngawta sawrkar hna ang maia luh ve ngawt theih a ni lem lo tih kan hriat a pawimawh hle mai, Pathian kohna, rawngbawlna tak tak ni a ngai mi PIANGTHAR dik tak Ruih hlo tinreng leh mipat hmeichhiatna laka fihlim tan lo chuan dil chi a ni lo.        
    Heti tak maia Nun uluk leh mi in vawng thei tak Pathian tih mi nih a ngaih avang hian an mawhphurhna pawh a sangin midang te thlarau nun kawng dik a kaihruai thei tur an nih a ngai reng ani. Tun lai chhanah khawsak a har in eizawnna hna te a harsa tawh viau lai hian remchang a la a ‘LALPA’n a in pe apiang te a hmang duh alawm’ tih chang chawi si a, eizawnna hna atan kan dil ve ngawt emaw Sawrkar hna hmuh theih loh vanga beidawngin kan dil ve ngawt anih zawngin a fuh ber kher lo maithei. Kan biak Pathian hi thik thu che tak Pathian a ni si a, Ama tan a in pe Officer a duh lo zawng a awm te hi a ti mualpho hreh dawn si lo.
    Ani taka Ama tan a in pe te chu a hmang duh na meuh mai, chutih rualin a tha ber hi Lalpan a duh ve tih kan hriat rual hian kan mithiam leh zir sang te hian Officer hna hi ti tak mai a kan han ngaihthah mai erawh hi zawng in bih chian kan ngai deuh lawng maw? Kan Khohran dang unau te en reng mai hian an hruaitu te  hi Doctorate rual an ni fur hlawm si a. Hei aia tan han lak dan hi a awm ngei a rinawm, Pathian mihriat, thiamna sang tak nei hi kan officer ah te hian han awm khup mai ila, hei aia zau zawk rawngbawlna International Level thlengin chak takin kan kal pui theih ngei a rinawm.
    He kan ni bik Candidate Sunday ah hian kan thalai rual dang lehkha thiam leh zir sang tak tak te hi i in ngaihtuah nawn leh teh ang u. I kut lo chu Lalpa’n kut dang a nei lo.
---------------------------------

        Thianghlim taka inngaihzawn....

    Rose par hi a mawi em avangin a kuhmum laia lo pawh pharh ngawt chi a ni lo. A mawina zawng zawng a hloh phah vek dawn a ni. Phengphehlep mawi tak hi a buhchium lai emaw pangang anih laia thlawk tur leh mawi tur a kan beisei anih chuan kan tisual hle ang.
   
    Thalai kan ni a, nupui-pasal la neilo kan ni a, ngaihzawng nei rual kan nih chuan inkawp tura siam kan nih miau avangin mipa leh hmeichhiate chuan ngaihzawng kan nei ang. Mi pangai kan ni alawm. Amaherawhchu, kan thatlai hun, kan chak lai, engkim tihchhin kan chak hunlai hian kan fimkhur a pawimawh hle, a bikin Sex ah. Inngaihzawnna hian Sex hi a ken tel ve reng emaw ti tlat tawh tleirawl/thalai kan tam ta, kan la pung zel dawn lehnghal ! Salvation Army thalaite pawh kan bang biklo, Uniform var kan hak avangin kan Thianghlim bik kher lova, tisa-chakna neilo kan ni bik hek lo. Nupui pasal inneih hmaa Sex hman pawizia te, thianghlim taka ngaihzawng neih a theih thute hi kan inzirtir uar a ngai takzet a, kan sawi tam a ngai a ni. Sex hi nupa kara hman tura duan, nupui pasal tana thil bik a ni. A hun hmaa hman chuan nun a tikhawlo vek thei a, nih tur ang a nih phak lohtir thei a ni. Nghawng thalo tam tak a nei a, inrintawn lohna leh mi dang laka rinawm lohna te leh zahawmna hloh phah theihna a ni.
   
    A zirmiten an hmuhchhuah chu- mipain an zawn ber chu pawimawhna (significance) a ni a, hmeichhia erawh chuan himna (security) a ni. Hmeichhe tan Kristian mipa dik tak an thlamuanpuiawm ber, an caring ber, ngaihzawng atan an tha ber, inneih hun thleng pawhin, in him ber ang. A chhan chu Bible-ah ‘ Pasalte u, in nupuite hmangaih rawh u’ tih a chuang tlat alawm. Chutiang bawkin mipa tan pawh Kristian nula dik tak an tha ber, an dah pawimawh thiam ber ang che u. A chhan chu Bible-ah pasalte zah le an laka intukluh tur tih a chuang tlat alawm.
    Salvation Army thalaite chuan Pathian rawn chunga kan kawppui awm mi kan zawn thiam a pawimawh. A hmel leh pian, a zei leh zei loh, a hausak leh hausak loh chu engpawh lo rawh se, Pathian tih mi, Pathian hnaih tlat mi nise an tha ber ang.
    ---------------------------


            THILPEK

    Kum 2013 February thla kan chuang kai leh ta reng mai a, mahni hna lam ah leh eizawnna lam a hma thar kan la leh tan theuh in Malsawmna tamtak kan lo dawng tawhin Pathian hnen ah kan dil leh ngei ang. A malsawmna kan hmuh ruala kan tihtur kan kut a tla hi a awm ve bawk a, chu chu  THIL PEK hi ani.
    Sipai chhungkaw tin ten mahni bialtu te hnen atangin SILAIMU IP te kan dawn leh theuh a rinawm, chutiang in SAY member tin te pawn FAITH PROMISE IP chu kan dawng nual tawh ang. Kum dang ang bawk a dan anga  kawl ngawt tawh lo in, thahnem ngaihna rilru nen,kum dang aia hmasawnna rilru pu in hei aia tam zawk a Pathian tan hian ka pe dawn a ni tih rilru pu ran in Thilpek lamah hian tan in la thar leh teh ang u.
    Faith Promise Ip hi a hming a put “Rinna a Intiamna “ anih ang ngei hian SAY member tin te kum kalta lama cheng 50 dah thin chuan, tun kum ah pawh chiang sa in cheng 50 chu a dah thei, he cheng 50 a dah hian Rinna(Faith) a tel lo, Intiamna (Promise) lai chin  chiah ani. Rinna tel tur chuan, a sum a dah theih tur a in  rin bak a liam a intiam khan Rinna (Faith) chu a lo ni ta chiah. Chu tak chu a ni FAITH PROMISE in a tum chu,kan  theih chin bak a liam a in tiam na chu.
    Chumi anih rual chuan,Bial neitu te pawh hian Thahnem ngai in i han tang leh sauh sauh teh ang u, a khawn leh a sem ah tan la ila, IP ka hmu lo emaw, Min la pe kir lo tih awm lo thei hram se, mahni bial tin te tlawh chhuak tha in IP in a thlen tur tak a thlen theih nan tan i la ila, hei hi Kohhran rawngbawlna hnar ber ani si a.
“ Pe rawh u ti chuan pek in in awm ang, pek ah Pathian i hneh bang thei lo ang. ”
-----------------------------------
   

Soldiers Renewal Sunday

    Soldiers Renewal Sunday kan lo thleng leh dawn ta reng mai, he Sunday pawimawh takah hian Sipai tin ten kan Raldona Thutiam te vawng thar leh ila. Sipai Pawl leh Pathian tan kan rilrute hawng thar leh ang u.
    Sipai ni tura kan inpekna, Sipai Pawl leh Pathian tana kan rinawmna te tih thar nan he hun pawimawh tak hi hman tum theuh ila, Sipai Pawl leh a inkaihhruaina dan te, Pathian leh Sipai Pawl dain in a min duh ang ngeiin kan rilru leh kan nun te, zuk leh hmuam leh ruih theih thil laka fihlim tura inhlan thar nan hmang theuh teh ang u khai.
    He khawvel kan damchhung vawikhat theuh kan hman turah hian Pathian duh zawngin a tam thei ang ber  hman tum  ila, he Soldiers Renewal Sunday hi Pathian tana inhlan tharna hunah kan hman theuh theih chuan avan hlawkthlak dawn tehlul em.
    A pawimawh ber chu mimal inpekna ani a, kan thu lo tiam tawhte kha ti nghet thar leh sauh sauh ila, midangte pawn he kan pawl chhuanawm tak hi zawm tlak leh tel vena tlak a  an ngaih theihnan kan thutiam ah te nghet taka kan din theuh a pawimawh hle a ni.
    Raldona thutiam a kan thutiam tawh te, tiam ral ve mai lovin, Sipai Pawl O&R in a a phut ang ngeiin tih hlawhtlin tum ila,keimahni mimal nunah ngei pawh kan hlawkpui bakah Pathian malsawmna pawh nasa takin kan dawng ngei ang.



Ni 26.01.2013 issue a mi


    Kum bul kan tan a, mawhphurhna leh chanvo hrang hrangte chang turin kan inruat vel mek a ni a.  Chanvo nei tura ruat kan nihna hi kan hruaituten min ringtawk a, min pek a ni a, kan mawhphurhna a ngaiin, ti mai mai leh duhdah taka ti hnihne lo turin, Chanvo (Nihna) kan neihte hi Pathian Rawngbawlna a ni tih hre ran chunga, Ama tanpuina dilin, tha taka hlen chhuah i tum ang u. Chanvo te bik emaw lian bik emaw pawimawh bik emaw a awm hran lova, inpeng tawn theuh, tangkaina nei vek, a hun leh hmun a zira tangkai tak tak vek te an ni si a.
    Kan Corps hi Corps hlun tak nimahila, member kan tam lem lova, indaihlohna a na in, Chanvo leh Nihna te pawh mi pakhatin kawp fir fer a ngai thin a. Hemi avang hian pawimawh ta viau leh tithei riauva inngaih palh te a awl thin. Hei erawh kan hriatreng a pawimawh, Pathian hian keimah lo hi midang hman tur a ngah lutuk, tumah han inchhuang a, ti tha duh lo vel tur kan awm lo. Talent hrang hrang min pekte hi tha taka Ama tana kan hman tlingkhawm hian Corps chak leh nung, midangte tana malsawmna thlen thei khawpin min lo siam zawk a lo ni. A thilsiamte hi a Siamtu laka han intivei  tur kan ni em? Malsawmna chhiarsen lohva min vurtu tana kan theihna tlemte hman hi chu kan tihtur, kan mawhphurhna a ni ve bawk a lawm le.
‘’....Israel ramah hian Baala hmaa la thingthi ngailo leh, la fawp ngailo mi sangsarih ka tan ka hum dawn a ni’’ (I Lalte 19:18)

-----------------------------

Ni 19.01.2013   issue ami

    Tihdan phung leh kalphung pangngaia neih tawh vangin em ni he Chhandamna Sipai Pawl thalai rawngbawlna ah hian kan inpek aw..? Kum 2009 chhunga SAY member ni turin tihluihna tel lovin, mahni duhthlanna ngeiin kan lo inpe leh ta a, a lawmawm hle.

    SAY member ni tura kan inpek hian hei erawh kan hriat a tul, member kan nih rual chiah hian tihtur(duty) kan nei nghal a ni tih hi. SAY-a kan tel chuan rinna thutiamah te, thilpek chungchangah te, midangte tana malsawmna thlentu nihna ah te kan tan a tul a, SAY rawngbawlna hrang hrangah te telin, a kul a taiin kan inhmang thei lo a nih pawhin kan theihna zawn theuhah Pathian leh Corps tan kan in hmang ve tur a ni.

    Membership form leh a fee Rs 10 thil tel ah hian kan duh tawk mai tur a ni lova, SAY thiltihna hrang hrang ah SAY member kan nihna tilangin kan tel ve thin anga, midangte ring mai lovin,mahni ah theuh tan in la leh teh ang u.
    Tun kum kan thupui “Pathian hnaih rawh  u,  tichuan anin a hnaih ang che u” Jacob 4:8 han chhiar te pawh hian SAY member te pawh hian kan tih tur dik tak Amah hnaih a a rawngbawl na hna  chu hlen i tum theuh ila, SAY member nih ah chauh hian tawp lo ang u. Tun kum thar ah hian  kan theih tawkin Pathian  hnaih leh zual in a rawngbawlna lam hna te hi  kan theih tawk ah kal pui in, SAY member-niawm reng in kan awm tur a ni. SAY member-a inpe tawh leh la inpe zel turte pawhin hei hi hria ila, ‘a hminga member’ ni satliah ve ringawt lo turin Pathian chakna ring chungin kum bul atang hian tan ila theuh ang u. Tichuan Amah kan hnaih phawt chuan aman min hnaih a tiam si a,hawh u Member tin te hian Membership form leh a fee Rs.10 ah tawp lo in amah i hnaih thar leh theuh ang u.

----------------------------

Rilru thar nen aw....

 Kum 2012 chuan koh kir rual lovin min liamsan a, au let leh dawn pawh ni ila engtikah mah a rawn let tawh dawn lova. Pathianin dam taka kum 2012 chhung zawng min kaihhruaina zawng zawngte avang khan Pathian hnenah lawmthu awm sela, dam taka kum 2013 min hruaikai avangin lawmthu i sawi mawlh mawlh bawk ang u.

 Keini Chhandamna Sipai Pawl te chuan December Ni 31 zanah urhsun takin Zanlai Inkhawm kan nei thin a, chu inkhawmah chuan inhlan tharna te, lawmthu sawina te leh kumthar lo awm tura kan intiamna te Pathian hmaah kan thlenin kan chham thin.

 Pathian hmaah thu kan intiam a, New Year Resolution te siamin chu chu Pathian hnenah te kan thlen thin a, khang kan intiamna te kha engtin nge kan hlen theih ang? Engtin nge kan intiamna te kha kan bawhpelh lovang?

 Kumthar alo nih hian engkim hi a thar vek chuang lova, amaherawh chu kan ngaihtuahnaah te erawh chuan kum kalta ai chuan kumthar ah chuan thil tha zawnga tih tur te kan ngaihtuah in kumhluia kan thil tihthatloh te chu a theih anga siam that te kan tum thin a ni.

 Pathianin kumthar dam takin min hruaikai ta sa sa, a duhzawng leh min hruaina anga kan awm thiam a pawimawh tawh hle a ni. Zanlai Inkhawmah engtin nge kan inhlan a, engtin nge Pathian hmaah thu kan tiam tih hi tunah hian kan la hre hlawm em aw? Kan intiamna te hi ngaihtuah miah lo hian kan lo palzut ang tih hi a hlauhawm khawp mai.

 He kumthar ah hian rilru thar nen lut ila, kumhlui kan thlahliam tawha kan duh loh zawng emaw, keimahni min ti hnual thei tura kan rilru a thil cham zawng zawng te kha paih vek ila, Pathian rawn chung zelin he kumthar hi kumbul atang hian Isua Krista nen bul i tan ang u. A ngai te te a kan kal leh a, kan tih ngai leh kan thlah phalloh te kan la vawn reng a, keimahni tana thalo tih kan hriat reng si kan la tih leh kan la kawp fo chuan kumhlui ang bawkin he kumthar hi kan tan chuan hlimna ni lovin thahna min thlentu ala ni thei a ni. Chuvangin, kumthar hi rilru thar nen, Isua nen kumtluanin i hmang ang u.
------------