The Salvation Army Kum 2016 India Eastern Territory Thupui : “ I duhzawng tih mi zirtir ang che; ka Pathian i ni si a” - Sam 143:10 =============================================="One Army, One Mission, One Message" =============================== Advertisement support website a ni a, advertisement hi chu a awm lo thei lo a, hriatthiamna kan ngen e. Tin, Advertisement (phek chung ami leh phek dinglam ami) te hian Bazar Corps nen inkaihhnawihna an nei lo a, webhost tu, own-free-website.com te dah a ni e. Mawh kan phur lo.

 
WEB-PAGE LIST
Home
Guestbook
News
Corps news
Salvationist Poll
Forum
Contact us
About us
ve lawks
Ka lo tawn ve
Ka hla duh leh a chhan
Editorial
Article lawrkhawm
website newsletter
Gallery
SAY Sub-Committees
YP Corps
Home League
League of Mercy
Bible Society
SA News tawi
SA SocialServices news
Poem and poetry
Downloads
Website Statistics
SA website dangte
Kan Dopuite
Thurin
SA Story
Corps area map
Bazar Corps Location
 

All rights may be reserved by S.A.Y. Bazar Corps, Aizawl, Mizoram. Copyright © 2016. ================== "One Army, One Mission, One Message" ================== MISSION STATEMENT ---------------------------- Chhandamna Sipai Pawl chu, khawvel pum huap pawl, Kristian kohhran te zinga pakhat Chinchin Tha hril lam thawktu a ni a. A thuchah chu Bible-ah a innghat a, A rawngbawlna chu Pathian hmangaihnain a tinung a, A thil tum leh a hnathawh ber chu chu Isua Krista chanchin Tha puandarh leh inthliarhranna awm lova mite mamawh phuhruk hi a ni. ================== MISSION STATEMENT The Salvation Army, an international movement, is an evangelical part of the universal Christian Church. Its message is based on the Bible. Its ministry is motivated by the love of God. Its mission is to preach the gospel of Jesus Christ and to meet human needs in his name without discrimination. ==================

Ka lo tawn ve

Ka lo Tawn Ve..tih column-ah hian Bazar Corps a miten  rawngbawlna lama an chetchhiatna tawite tarlan thin a ni ang, corps mi tupawhin thawh ve theih a ni a. kan email: editorialboard07@yahoo.com -ah emaw bazarcorps@gmail.com -ah pawh thawn theih a ni e - Eds
...................................................................................................

Ka lo tawn ve ........... :
***********************************

*  Robert VL Thlamuana

1. Kan tlangval laiin vawikhat chu Saron Vengah intinalh tawkin kan leng a, thimtham a mi pakhat lo ding chu Maawma hian Pi Zothani fapa Remmawia emaw tiin a hma ah tak chuan a zuk dinchilh thut a, Remmawia alo ni awzawng lo mai, midang daih alo ni si!!! Maawma chu a awmah a tham ta nawk nawk mai a, a bula ding Mapuia chu ‘nangkha lokal teh’ tih pahin a beng hawi sawk bawk a, han tih let ve chiam kha a ngamawm chiah siloh, tihchi loh teh mai ania..haw lamah kan  lenna in neitu Nu ber kan in thlah tir hmiah. (Hemi zan hian kan hming leh pa hming kan sawi zet zet).

2. 2000 kum khan Jeribam-ah SAY-in Christmas kan hmang a, chutah chuan zana kan mu kha misual zurui in min tibuai a, hel ho emaw tiin hmun dangah insawn ang u ka tia, U Dinga hian ‘min rawn tihbuai chuan ka hnek hrep mai ang’ a tia mahse amah (U Dinga) ka han en khan ring zo hek lo, mipa 2 chiah kan awm si, ka bungrua ka tel sawk sawk a, Maengi te ho kha ka tlansan a, ka bedding hnungah pheikhawk ka khai a, chumi inkhawng ri chu hlauh tawh nen min rawn um emaw ka tia, zanlaiah zun cheh phungin ka tlan chhe ta a, ka pheikhawk khing ka thlauh bawk, ‘i pheikhawk hi han chhar teh’ ka hnunga nula chuan a ti a, kei lah chuan rang tawkin ‘naktukah ka chhar mai ang’ tih pahin chak tawkin ka tlan char char a. An Evangelist teacher-te inah kan riak ta a, a tuk zingah chuan kan nui nasa teh mai ania.

3. 1986 kum khan CC Rally Central Corps-ah kan kal a, Maawma, Sawma, MST-a te nen tlar hma tawkah kan thu a, reh thep thawp laiin ka bula thu Sawma chu ring lutuk tak mai hian a ‘vawih’ ta mai a, an nui deuh huk a, an rawn hawi phei thup bawk sia, Sawma lahin min melh pahin min kawk a, ka zak ve khawp mai.

4. 1990 kum Scooter ka khalh thiam tir chu K.Zova ngei hi ka phur a, Hospital Road peng damdawi dawr nghak nula hmuh tur ngei mai hian Civil Hospital atangin ka tlan thla a, keilah la thiam chiang tawk hek lo, Bazar Bungkawnah ka tlan thla zel chu Traffic chuan Whistle alo ham ri tuarh tuarh  a, engemaw titi in ka ding thei hram a, License ka la keng lo zui, hnar chu a lian duh khawp mai.

(Pu Robert-a te thian ho hian ‘ka lo tawn ve’ an ngah em em a, a dang pawh kan la rawn chhuah zel ang).


* Pu Lalhrima PS

1989 January thla khan Damparengpui Society Tuikuk hlang in 200 awmna khua chu kan Corps Bial a nih avangin Senior ho - CSM(Pu C. Thangkima), CS(Pu TH Vanlalreia), CT(Pu C. Darkunga), Pu K-a(K. Hmingthanga), Pu Guntea leh Darrokunga to nen kan zu tlawh a. Hemi tuma kan nuih nasatzia hi kan hrilhfak a tling hlawm a ni.
1. Pu Darkunga chu kan kal dawnin Pu C. Thangkima CSM in fiamthu in `Rinna in kan kal dawn a, engmah keng lovin kan kal ang chu' a tih avangin Bible leh Hlabu bak a lo keng miah lo mai a. Thlasik vawh vanglai a ni a, thlenin ten puan min thuah tur an nei si lova, zan 3 chu a khur tlaivar zak a ni.
2. CSM chu an CSM Vuana inah a thleng a. Kan thlen zan Inrinni zanriah ah Bepui thing, a tak awm mang lo chauh an hmeh pui a, a tuk Chawlhni zing leh tlai ah pawh chu chauh chu an hmeh tluan chhuah pui a ni.
3. Zanah Pu Guna a hnar ring lutuk a, bawngchal hi zanlaiah a rawn chhova, kawmchhakah a phit dur dur mai a ni.
4. Kan thlen tlaiah Pu Reia CS chu football field naupang inkhelhna bul ah chhip lang rutin hnim zingah a inthiar a, a bulah chuan ball kha a rawn lum ta mai, tumah khan an zu chhar ngam si lova, minutes 40 lai a thu ta mai si a, Game an zawh hman loh phah ta a, a tuk tlaiah an chhunzawm leh phah ta a ni. Pu Reia hi a thlenin ten vawk sum 3 leh a chanve an talh a,, an chhum hel lehnghal.    '
5. Chawlhni tlaiah inah kan zaikhawm a, khaw thim dawnah kan bang a. An in a inang hlawm lutuk a, ka thlenin ka hmu zo ta tlat lo mai a, khua a thim tan tawh si a, ka mangang rilru viau mai a. A nakinah chuan kan zaikhawmna kha ka thlenin a lo ni reng tih ka hre ta hram a ni.
6. Pu K-a motor chuang thei miah lo thin chu hemi tum hian a rui lo tlat mai a, Pathian mi hriat leh ven deuh bikah a in dah a, a hawi champ deuh viau ringawt.
7. Thawhtan ah chuan West Phailengah kan riakchho a, an CSM in, inchhawng hnuaiah kan riak a, kan nui nasa lutuk a, khawvar hnaih lamah chauh kan mu thei a, kan muhil tan chauh tihah sazu a tam lutuk a, pakhat lian deuh mai hian ka awm atanga ka ke ler thleng a zawh a, ka kephah a thlen chuan ka vawr vak a, Ceiling a han deng a; Pu Darrokunga hmaiah a zu tum a, a sa rak ta vak mai a, nuih kan tharthawh leh a, khua a lo var ta hial a. Insiama kal mai kan tum lai tak chuan kan thlenin pa chu alo chhuk a,"Bazar Corps upa ho chu in va awhawm tak em, in zarah ka lo tlaivar ve thak mai a. Kan Corps upa ho chu kan nui tlang thei lo nasa lutuk a, ka va han awt tak the u em " a ti hial a ni.


*  John LTSanga SAY Adviser

Kar khat chhung (22nd-26th June, 2009) thangin Singapore-ah International Water Week hmang turin Chief Minister, Mizoram zuiin ka han kal ve a, hun tha tak kan han hmang a ni. Mite thianghlim zia leh hna an thawh nasatzia mi sawi atangin hre thin mah ila, keimah ngeiin ka zuk hmu ve a. He hunah hian politician, technologist, financiers, administrator leh company lian President leh CEO ten thusawihona neiin khawvel hi 70% tuiin khat mahse khawvel hmun hrang hrang tui supply nei tha lo tam tak an la awm a ni. Singapore ngei pawh an tui mamawh 70% hi chu Malaysia in a chawm a ni. Hetiang harsatna sawiho tur leh sutkian dan tur ngaihtuahin ram hrang hrang hruaitute an kalkhawm a ni.

Salvation Army ni ta chu Singapore-a Salvation Army Headquarter tlawh ngei chu ka rilru ah a awm tlat a, brooch 'S' leh Shoulder te lei ka turn hle a ni. An Headquarter ka va phone a, Salvation ten thil an zawrhna hmun min hrilh ah chuan ka va kal a mahse ka lei tum ang reng reng zawng an zuar ta hauh lo mai. Aizawl a charity shop kan neih ang Thrift Store ah chuan ka va lut hlawl a, ka lei duh zawng chu hralh an phal lova an zuar lo bawk tih min lo hrilh a, ka'n zawh ngial pawhin kan zuar lova kan hralh thei lo a ni tiin min lo chhang a. Ka tih ngaihna hre lo chuan Salvation Thrift Store dawr kawtah chuan thla kan la ta ringawt a ni. Engpawh ni se Salvation Army hmun pakhat ka tlawh hi ka lawm reng reng tho a ni.

* Dr. K. Lalhruaitluanga  
    Kum 7 emaw 8 mi vel ka la nih laiin, kan in bul lawk mai ah hian Culvert a awm a, leivung leh hnawmhnawk hi miten an paih tam thei hle mai a, YMA ten Bawlhhlawh paih an khap chung hian rawn paih tawk hi an awm fo mai a (khatih hun lai kha chuan bawlhhlawh thehthang mai mai an la ching si a..) Kan chhungkua chuan kan ning hle mai thin a, khaw ro hun lai tak a ni bawk si a, tuihawkin han lenfai ngaihna a awm lo reng a; Zan khat chu heti hian ka’n tawngtai ta alawm le, Lalpa, zaninah hian ruah i sur tir loh chuan ka ring tawh dawn lo che, kan in bul Culvert a bawlhhlawh tlengfai vek khawpin... tiin ka chham ta mai a. Pathian chuan min va han chhang chiang tehreng em. Naupang te tawngtaina pawh a hre reng, a chhang thin a ni tih ka hrechiang ta hle mai.Chumi zan chuan ruah nasa takin a sur a.  A tuk zingah chuan ka nu chuan nizan chu ruah a sur tam hle mai a.. a ti a, Pathian hnenah ruah sur tir turin ka ngen alawm ka lo ti vat a. Kan mamawh ang takin, kan thatna tur a nih phawt chuan min chhang thin a lo ni. Pathian rinawmna hi tun thlengin ka hmu hnem ta hle mai. Kan dil zawng zawng hi rang taka chhan te, rei deuh hnu a a chhan te pawh a awm thin. Tun thlengin min la ti thlawn lo. A rintlak em asin. Fiah a ngai lo, a rinawm em mai.

*    Major Vanlalhuma, Commanding Officer
    Nikum mai khan Civil Hospital-ah mitthi Tawngtai turin ka kal a, tichuan ka han chham kual vel a, ka han Amen meuh chuan Mitthi pa chu alo meng a, keimah nge amah kha hrilhhai zawk ang aw...? Mitthi chu a khum bula mu puana lo in khuh zawk chu lo niin...
    Tin, tumkhat chu mitthi ka vui a, Thlamuanna thuchah sawiin ka tui khawp mai a, mitthi chhungte nen kuang te thla kan lak pui a, video nen an la bawk a. Inah ka haw a, darthlalanga ka han in en chuan...ka phu zawk..!! Officer pa berin ‘S’ ka lo bel lo chu niin, ka zak lutuk a khumah ka mu a rizai-in ka in khuh tawp...Haihawt tak hi chu awwww.....Tumkhat leh pawh kan Inkhawm bang kan Nu (C.O Nu) emaw tiin nu pakhat banah ka va kai a, ‘Tinge min lo kalsan a....?’ ka va ti hu tawh bawk.


*  TH Vanlalreia, Corps Secretary
    A Corps hming chu ka sawi lo mai ang. Headquarters tirhin an Corps ah thusawiin ka va kal a, tlemin ka lo hritlang deuh bawk a, Missionary campaign a kal ka ni bawwk a, chuta thu uar taka ka sawi lai chuan ka khuh ta thut a, ka hnap hi balloon tia zetin a lo puar ta pup maia, ka romol ka phawrh a, ka han hmet keh a, ka hnapthleng leh ka hmui velah chuan a berh ta luai mai a, ka zak hle mai. Thlai ho lah an nui tawp thei silo. Ka thusawi pawh pawtchhe pahin ka ti tawp ta ringawt a ni. nui tawp theilo ho lah chu pawnah an tlanchhuak bawk a, zahthlak tak a ni.
    Hmanah Corps pakhatah Campaign a ka kal tumin thusawi hmain hla ka thlang a, ka hla sak lai chuan hlathu ka sawia, ka sawi uar deuh a, chutih lai chuan ka ha siam hi a leng chhuak ta tawp mai a, platform hma chhuatlaiah a tla thla a, an Local Officer pakhatin min rawn chharsak mai chu zahthlak tak a ni.Nuih pawh ka nui ngam lo, ka ha hmai a ni si a.....


*    K.Zohmingthanga SL
    Training College-a ka thawh lai khan tumkhat chu kan Corps ( Bazar) SAY ten Cachar Division-ah Good Friday an hman pui a, ka thiante ho ( Robert-a, Sawma, Lalrini, Mafaki, Amy, Maengi etc ) khan ‘nang lo chu thusawitu tur dang an awm chuang lo, kan rawn ring che ania’ tiin Kolasib ah min rawn lam thla nghal a. Phur takin an mi ngenna leh sawmna ang chuan ka zui thla ve mai a. Tichuan Mual Inkhawm, train station-a kan neih tumin, ‘nangin Sap tawngin Thu i sawi anga, Mafaki’n a lo let ang’ an tia. Min bol tih hre miah lovin sap tawng thiam zawng zawng nen Mizo leh Vai chauh ngaithlatu an nih laiin ka’n Praise the Lord ve pap pap mai a, ka sawi zo chu ‘i sawi tha hle mai’ tih chu khawi lamah, ka thiante ho chuan min nuih tiah tiah pahin ‘sap tawng ilo thiam hle mai’ min lo ti sap sap a, ka inngaihtuah chiang a, ka zak bawk si, thinrim angreng deuh bawk si, Mizo Tawng a ka lo sawi ta lo kha tunthleng hian ka la inchhir !!!Hemitum tho hian Phaitual ah Mual Inkhawm ah tho Thu min sawi tir leh a, keimah ka tui bawk a, ka thusawi pah khan ka vei kual a, ka lam deuh durh durh titih tawh a, mahse...mahse ka sawi tui thei ta lo, ka ke kha hnim ah ka tat pah a, ka hrut ka hrut a, ka thusawi tawp lam phei kha chu a nawi deuh ta nuaih khan ka hria a chhan chu Ui Ek ka  Rap Pherh miau alawm..!! Chutah duh tawk a min bol hrep e tilo chuan kan haw lamah lah, Silchar leh Bagha phei ah te, Vairengte leh Bilkhawthlir vel ah te, engemaw hlek ka sawi ve apiang hian ka thiante ho, a tira ‘nang lo chu’ min rawn ti tliar tliartu te khan ‘thusawi a ngai tawh lo, Bus atang hian chhuk tawh rawh, kan tawt, i duh leh Motor dang ah pawh i chuang thei ania, inthlahrung re re suh’ min ti sek lehnghal a, ‘in la hre ve khawp ang’ tih bak khami tum kha chuan sawi tur ka hrelo a ni ber e.


*  Major Vanlalhmui DSWM
    Corps pakhata kan awm laiin C.O a awm si lova, Kohhran dan atanga Pawla lawmluh tur, kan pawl nula nupuia nei tur kha mipui tam lai Thianghlimna inkhawma lakluh duh kher kha a awm a, kan upa ten in pa awm lo mahse nangman ti mai rawh min ti tlat si, ceremony ka vawikhat tihna tur a ni a, ka huphurh lutuk a, kan han in lalut tur ceremony kan tihlai chuan thuchham, ka sawi zawha sawi tir tur kha, “Ka sawi zawhah i sawi ve dawn nia” ka ti a; Ka sawi sei ta lutuk a, ani lahin ka sawi ang chiahin a sawi thiam ta si lo, kan sawi ngai kha kan sawi kan sawi ta mai  a, mipui lam lah an lo nui huk tawh mai si .....ka zah dan chu .... sawi thui lo mai ang.

    Vawikhat leh pawh, field training neia Corps kan awm zawk laiin, mite chuan C.O. nu min ti ve a. Thianghlimna inkhawmah thu sawi turin min ruat a, ka sermon hmasak ber tur a nih avangin ka huphurh deuh a, ka pasal hnenah min ziahsak mai teh ka ti a, tawite min ziahsak a, ka han sermon ta chu le, lehkhaziak ena sermon chu ka thiam zawng a lo ni hauh lo mai a, ka sawi buai nasa ta mai a, ih ... eng lo ... ih ... ka ti ka ti ta mai a ... Inkhawm kan han bang a, i sawi tha hle mai miten min han ti chu ... ka zah sa nak a laiin ....ka pum hian ka sa a, ka bing mum mum hian ka hre mai a, heta tang hian ka sermon tur reng reng chu ka ziak ngai lova, ka pasal ka ruai ngai ta bawk lova, Pathian min pawlna, keima dawn ngei chauh lo chu ka sawi ngai ta lo a ni.


*   Lalhrima Sailo PS

    Blood Sugar (Diabetes) hi lang tham si lovin ka neihna a lo rei tawh a; hei vang hian inkhawm apiangin ka muthlu ziah thin a. Kum 10 lai kal taah khan ni khat chu Nute Niah nuho zawng kha zai tur an ti a, an tho ri suau ah khan ka muthlu chu ka harh phut a, ka ding ve ta ngawt a. Hla bu ka en avangin ka hawi si lova, chang khat lai chu ka sak pui ve a. Ka han hawi vel chu thut loh chi ni hek lo ka thu ta vat a, ka fapa (Chama) zak lutuk chu a haw nghal vang vang... !!!

*  Maj. Rochhungi Commanding Officer
    Keifang Corps-a kan awm laiin, tum khat chu zan inkhawm tur ka insiam laiin, current a awm lova, CO pa uniform ‘S’ inbelsa emaw tiin ka fapa, Mawipuia uniform chu ka lo ha chhuak chu niin, Pulpit-a hun hmang tura ka’n lawn chu mi te chuan min lo nuih nasa ta mai a, kei lah chu mahni inhmu thei hek lo i.... .. ka hre thiam lo nasa mai a.... inkhawm banah min hrilh a, Officer ‘S’ sen bel tur khan ‘S’ pawl ka lo bel reng chu niin, a zahthlak duh chem chem ngei mai...

*  C. Lalbiakmawia FS
    Kum 1974 vel bawr khan – Ka pianthar tirhin Sialhawk Corps-ah Hriatpuina sawi turin min ko thut mai a. Ka hamhaih nasa mai a, mi khuaah Hriatpuina ka sawi vawi 1-na a ni bawk a, ka zak bawk si,  “Kei chu Presbyterian Kohhran a mi ka ni a, ka lo piangthar ta a, Salvation Army-ah ka lo awm ve ta a ni” tih zawng khan ka lo sawi a. Ka pianthar dan pawh ka sawi chiang ta lo a, ... Ka zak lutuk kha, inkhawm ban thuai thuai ka chak tawh lutuk a ..... khami tum tluka inkhawm rei ka tih ka hre ngai lo ..... ka va’n zak tak e aw ..........


*   C. Ramropuii (Chacha-i), Maj. Lalthansanga Brig. Leader
    Tumkhat chu Manipur-a kan awmlaiin Sunday tlaiah mual inkhawm kan nei a, ka thianpa nen kan duet dawn a, musician te chu Truck hnungah an instrument nen an awm a, keini zai tur ho kha leiah kan dinga kan hla key kha kan theihnghilh ta tlat mai a. Musician ten a  key min rawn pek kha a sang deuhin ka hria a, ka thianpa zak tawh lutuk chuan , ‘a pawi lo, a pawi lo...’ a ti a, kan han zai mai chu.....a sang lutuk a a mipa zawk pawh chuan aw sin chi paw’n a tlin lo vel.....ka nuihza bawk si, thinrim bawk si, zak bawk si chu a sirah microphone hum chungin ka lo ding tum char char ringawt......
    Tumkhat pawh 2002 khan Manipur Division Golden Jubilee kan lawm dawn a, Souvenir tihchhuah ve ngei kha kan duh sia. Mi hrang hrang article ziak turin kan sawm a, Computer thiam hleilo in zanlai pelh thleng thlengin kan chhu (type) tluk tluk mai a, kan han chhu zova tih leh ngaihna kan hrelo khawp mai a. Computer chu Press ah kan pu thla ta hluai mai a, Press awmna building chu a lo lian si a, khawi floor berah nge a awm kan hre ta si lova, nula berh ve tak mai hi kan han zawt a, “in changkang lo lutuk, signboard te khi in hmu lawm ni?” (“in changkang naw ta lu, signboard khi in hmu naw maw?” ) min lo la ti zek zui......changkang lo bawk a ni Computer chawpa Press a nula in pu lut ta vu vu sawi tur an vang khawp ang..........                 (End of disc 1)


*   a lo tawn ve!!

Nl. U Diki Sailo pawh buai leh hah takin, kutzungchal vung vek khawpa zan dar 12 pelh rawk thleng chanchinbu phek li (4) lawih!! chu uluk takin a save kauh a, S chiah a lang...(Kum 1 zet U nghaha’n a zirtir hnuah pawh ctrl+S nachang a la hre chuang lauuuu....) a tukah a tharin bul a tan leh char char.......

*   Major R. Lalbiakliana DS
    Vawikhat chu bial fang tur hian ka chhuak a, kan fanu naupang ber hian ka thawmhnaw min siam sak chu ka la a, ka in khai chhuak ve mai kha a ni a. A hnu a ka thlen chuan kawrchung chauh ka keng a, kekawr ka lo keng tello hi a lo ni a. Thusawi chhung zawng kha chuan kekawr lam chu Pulpit in a hliah vek a, ka sermon thupui inbuatsaihna chu tui tak chuan ka han sawi ve a, a zia awm phian a, inkhawm kal lam leh haw lam ah erawh chuan a nuam duh lem lo khawp mai.
    Hei lo pawh hi bial fanga ka kalna ah inbual ka tum a, Bathroom min han kawh hmuh a, current awm loh vangin a thim khawp mai a, switch chu ka han on tho mai a, thim deuh tak leh chep deuh tak ah chuan Sahbawn te ka han inhnawih a, ka inbual lai vek chuan current hi alo awm a. ka han in nuai phuan ve ta suah suah a, ka hnunglam chu lum deuh pup hian ka hria a, chiang vak lo  chuan ka han en a, Immersion Rod hi a lo inkhai ling senvur mai a, ka hnungzang hi a lo dep lo chauh hi a lo ni a, ka hlau kheeeeer mai.


*   a lo tawn ve
Chawlhni vawikhat pawh Nl. Dikdik-i CG cum Brig. leader cum SAY Council member cum News editor cum Lecturer hi Shillonga lehkha a zir laiin Centre Point (3 star Restaurant) ah American english awphawi puam nalh tawk leh ring leng lawngin.... “Waiter, SINGARA deuuuu.....” a ti chhakss.....(a la zak chuang miah lo..!!.) an ti.

* C. Lalchhuanawmi (Chhaiawki)
    A kum leh a ni chu ka ngaihtuah peih tawh lo (YC nge TGM nge TGM hming put hma..??? -Ed. Board) Tumkhat chu Mamit ah Rally kan nei a, inkhawmpui na ah chuan hmeithai inah kan thleng a,  Maj. Biaka (U Diki Sailo pa) hi Captain ala nih lai a ni a, kan thleng ho a. Inkhawmpui tawp zan chuan kan ti ti nasa hle a kan nui tlaivar thak a. Chumi zan chuan kan thian thenkhat ten ‘naktuk zing karah Motor haw na tur a awm dawn lova chuvang chuan  Hall ah bedding dahkhawm a motor phurh tir tur’ an ti a, zing hma tawkah kan bedding chu Hall-ah chuan kan han dah a, tichuan ke in haw turin kan insiam ta a, min tur hmanhmawh em avang chuan kan lo kal hmasa a, kawng kan han bo nasa em em khawp a, Tuikuk khua hriat ngai lo ah te kan  kal a, kalkawng ah chuan vawih-uih hruiin kan in phuar hlawm a (Vawih-uih hrui a ni tih hre hek lo i...) a lo rei deuh hnu chuan kan uih ta vung vung hlawm mai a, kan chau bawk si, kan hah lutuk chu kawngsir ah kan let tawp mai a, reife hnu ah chuan kan thiante ho, motor a awm dawn lo ti tu te chu One-ton motor ah hian an rawn chuang then thaw hlawm a, kan thian ho - Lalnunsangi (Major ni ta) te nen chuan kan thinrim lutuk chau bawk si chu motor ah pawh chuang duh lovin kan kal tau nghawng nghawng a, thui fe an tlan hnu chuan an ngaihtha lo an rawn kir leh a. Khami tum zet kha chu theihnghilh a har mang tak e...hemi tum hian alawm kan Leader, U Rothangpuia Sailo (MaNelte-a pa) in ‘motor chuanna ah pawh Pathian hla chauh lo chu sak loh tur’ a tih bur avangin faifuk takngial pawn love song kan sa ngam der si lo, love lama kan chet fuh leh lunglen ve lai a lo ni kher  bawk nen..hahthlak ve tak a ni!!! Tin e, in hriat loh ka duh miah loh chu khang hun lai kha chuan Zaipawl tih tawh chuan  tlar hma a thu thu kha chu Soprano (..a AIR kan ti deuh kher) tur ah kan in ngai tawp zel.


*   Major PC Thansanga   
    Vawikhat chu ka bial, Corps pakhat ah chuan nausen hlan tur mi 12 an awm a, CR Sergeant chuan a ruala hlan tur a ti a, an fate hlan tur in Platform ah chuan an lo ding tlar pat mai a, nausen 10 ka han hlan zova,11-na kha nausen hming ni lo in a pa hming zawkin ka hlan a, ‘nausen nu leh pa malsawm ang che’ ka han ti chu ‘Amen’ ri a tlem pharh a, a hnu ah CR Sergeant chuan nausen pa hmingin i hlan alawm!! a tia...hlan fu lo ve tak ka ni.
    Vawikhat chu, ka bial Corps pakhat ah Innei tur tuak 7 an awm a, zingkar ah RS in i ti ang u a ti si a, ka ti tha viau a ka hriat lai khan tuak 7 na ah ‘Pathianin a zawm tawh chu mihringin then suh se’ tiin ka tawngtai zo chiah chu  Zungbun buntir ka theihnghilh tih ka hrechhuak leh hnuhnawh a tihngaihna awm tawh hek lo le chutih a hnekin RS chuan ‘zungbun an nei lo em ni? Zungbun thuthlung i tih tir lo’ a rawn ti a, keichuan awlsam zet hian ‘a bun aiin an nghet phian ang’ ka lo ti hmak a, an ngaih chu a tha zan lo chuan ka hria. Chefuh lo beu beu tak ka ni.
    Vawikhat chu Bible Society Campaign-in Kohhran pakhat ah kan inkhawm a. Campaigner ah a upa ber ka nih avangin Thupui Sawitu atan min ti a. Minute 30 ka sawi a. Ka thusawi zawh chuan Chairman a lo ding a, ‘tunah Pathian Chawimawina hla kan sa anga Maj PC Thansanga’n Malsawmna in min tin ang’ a ti a. Hlasak zawh veleh chuan Pulpit ah chuan ban pharin, Malsawmna Tawngkam ka han hmang tur chuan ring fe mai hian ‘ Kan Pa’ ka han ti palh thut mai a, mipui in ‘Van a mi’ tiin min lo zawm nghal dial a, Lal Tawngtaina chuan kan tawp ta ringawt a, hemi tum hi chuan ka ti fuh lo cher cher bawk a, Kei meuh pawh ka zak ru ve chem chem..!!

*   Maj. R. Lalbiakliana DS
Vawikhat chu khaw pakhatah hian Cassettes release-na ah hunserh hmang turin min sawm a, urhsun takin Bible ka chhiar a, “Aw Lalpa I hminga kan thiltih tur zawng zawngte hi I ropui nan mal min sawm sak ang che” tiin ka tawngtai a. Chairman chuan Cassettes siamtu chu a hlun te zinga pakhat sa turin a han sawm a,
“Mi Pa ni mahla ka hmangaih che,
Tlangval dang zawng ai pawhin ka duh che”
tih hla a han sa ta hlerh hlerh mai chuh...ka harh zawk a, programme tawp thlenga awm tur nge chhuahsan tur ni ang tiin ka inngaihtuah nasa hle mai. Programme buatsaihtute zingah kan thalai hruaitute pawh an tel a, programme fel taka siamin lehkha meuha sawm ka ni a, khatiang tur lam reng reng anih rin ngaihna ka hre lova ka bing deuh mup mup ni ber hian ka hria. Officer ve meuh release atan chuan a khawvel hret a ni


*  a lo tawn ve
kan SAY Leader Pu Robert-a pawh hi Kumthar Inkhawm (..niin kan hria..) ah nalh takin Coat Suit nen a rawn Inkhawm a, mahse vanduaithlak takin haw lamah chuan a pa in KEL a kaih haw tir!!!!
Amah Joel-a-Pa vek hian Hangi Lunglen Tlang-a SAY Retreat (2008) kan neih tumin “Hei khua te a vawt sia, in sum hram hram ang u aw” a ti ringawt tawh bawk. SAY ten awm dan thiam har kan tiin a bangbo theih khawp mai. 

*   Captain Lalramliana Hnamte
    Vawikhat chu kan first appointment-a kan thawh laiin kan Home League Secretary te hian an in bulah zawngtah tui deuh mai kung an nei a, duhsak takin min pe a, mi nazawng pawh an pe phal lo a ni. Nangmah han in lawh tawp mai rawh an ti a. Zawngtah kung ah chuan chempui keng chuan ka han lawn ta a. Ka lawn sang vak thei si lova, a kakpui atang chuan a rah bawr thatna lai tak mai chu ka’n sat thla ta  hmiah mai a, zawrh chhawn fe tham a ni ta mai a, ka pu haw nghek mai a, kan Nu leh ka U chuan min lo nuih nasa mai a, a mawl theih khawp mai a. Kan Home League Secretary-te  chuan kan awm chhungin vawikhat mah min sawm leh tawh lo..!!
    Bolda Boldi-II ah khuan Bial ka fan tumin Tuikuk veng lama ka kal tur chu pa pakhat nen kan intawk a, Tuikuk emaw tiin, ‘bru thangnai’ kan ti mai pek a, a ni Mizo pa dik tak mai, Bolda II Corps-a kan Local Officer pawimawh tak lo ni rengin. Biakina kan han in hmu leh meuh chu zahthlak duh chem chem tak a ni.

*   Dr. K. Lalhruaitluanga
    Ka thusawi hmasak ber tum kha tun hnu a ka han ngaihtuah let leh pawh hian ka la zak chem chem mai. Corps Cadet Lower grade kan nih laiin kan Corps Cadet Guardian Pu Tlanglianthanga hian Zirtawp zan CC inkhawm leh hun ah chuan K. Lalhruaitluanga’n Pathian thuchah a sawi ang a ti chu ka sa hut hut nghalin ka hria, Hreh tak chung chuan  Thusawi tur chu ka han buatsaih ve ta a, Sam 23-na Lalpa chu min vengtu a ni a, ka tlachham lo ang tih behchhan khan ka han sawi ve ta a nih chu.... ka inbuatsaihna zawng zawng chu a bo nghal vekk. Pulpit ka han chuangchhuak chiah chu ka beng te hi a sa hut hut mai a, a hnuai lam chu en pawh ka en ngam tawh lo; Davida’n Pathian a rin ngam zia kha buh nuaihin ka sawi ve a, a ngaithla tu te rilru lam phei chu enge a khawih dan ka hre lo, kha sermon zet kha chu sermon zawng zawnga tawi ber a nih ka la ring hial.Ka sermon ai mah khan Bible chang ka chhiar kha a thui zawk mai thei a ni, ka hrechiang ngam tawh lo. a bing mum mum tlat.
    Kan CCG khan chanvo min pe ngun khawpa, vawi khat pawh, Kawng zau taka hawnin a awm tih solfa  a kan sak uar deuh hunlai khan khuangte vaw rawh, khuangte nen zai tur a ti tlat tawh bawka, solfa hlain kan sa tham tham a, khuangte in ka’n Beat a nih kha... inchawih lo ve chhah chhah tak a ni.Kan hotu thu a ni miau siiii.A hunlai kha chuan kan CCG kha hnung lama chhiatkhum a chakawm ve kher.




Comments on this page:
Comment posted by JK Dawngzuala( jk_pachuauyahoo.com ), 06/06/2011 at 2:02pm (UTC):
He column ah hian ziah ve phal ula ka va ti e !! Corps mi leh sa chauh in ti si a, Corps dangah ka lawi tawh bawk si. Mahni lo maha in tih Bazar Corps Ori' nak alai a, 1982 Sept. 9 khan Bandsman Commission ka dawng ngat ania..



Add comment to this page:
Your Name:
Your Email address:
Your message:


This website have 202530 visitors (601415 hits)
 


Zoram Sipai Pawl rawngbawl dan hi tha tawk i ti em?
Tha ka ti lutuk, a bak a awm thei lo
Aw, a tha tawk e
A tha ka ti lo
Ngaihdan ka nei lo

(View results)


 
=> Do you also want a homepage for free? Then click here! <=
SALVATIONIST (Bazar Corps S.A.Y. Newsletter) ================ EDITORIAL BOARD ================ Editor : ================ Jt. Editor: H. Lalhriatpuii ================ News Editor : H. Lalrinchhana, Reuben C. Zochamliana, Marina Lalrintluangi, Ngurnunpari ================ Cir.Manager: Lalrinchhana Lalrinpuia ================ Webmaster: Lalnghahchhana ================ Website: http://bazarcorps.page.tl & http://bazarcorps.blogspot.com ================ E-mail: bazarcorps@yahoo.com editorialboard07@yahoo.com, bazarcorps@gmail.com ================ Address: SAY, Bazar Corps, Dawrpui Jail Veng, Aizawl. Pincode: 796001. ================ Published by : Salvation Army Youth, Aizawl Bazar Corps, Jail Veng: Dawrpui. ================