The Salvation Army Kum 2016 India Eastern Territory Thupui : “ I duhzawng tih mi zirtir ang che; ka Pathian i ni si a” - Sam 143:10 =============================================="One Army, One Mission, One Message" =============================== Advertisement support website a ni a, advertisement hi chu a awm lo thei lo a, hriatthiamna kan ngen e. Tin, Advertisement (phek chung ami leh phek dinglam ami) te hian Bazar Corps nen inkaihhnawihna an nei lo a, webhost tu, own-free-website.com te dah a ni e. Mawh kan phur lo.

 
WEB-PAGE LIST
Home
Guestbook
News
Corps news
Salvationist Poll
Forum
Contact us
About us
ve lawks
Ka lo tawn ve
Ka hla duh leh a chhan
Editorial
Article lawrkhawm
website newsletter
Gallery
SAY Sub-Committees
YP Corps
Home League
League of Mercy
Bible Society
SA News tawi
SA SocialServices news
Poem and poetry
Downloads
Website Statistics
SA website dangte
Kan Dopuite
Thurin
SA Story
Corps area map
Bazar Corps Location
 

All rights may be reserved by S.A.Y. Bazar Corps, Aizawl, Mizoram. Copyright © 2016. ================== "One Army, One Mission, One Message" ================== MISSION STATEMENT ---------------------------- Chhandamna Sipai Pawl chu, khawvel pum huap pawl, Kristian kohhran te zinga pakhat Chinchin Tha hril lam thawktu a ni a. A thuchah chu Bible-ah a innghat a, A rawngbawlna chu Pathian hmangaihnain a tinung a, A thil tum leh a hnathawh ber chu chu Isua Krista chanchin Tha puandarh leh inthliarhranna awm lova mite mamawh phuhruk hi a ni. ================== MISSION STATEMENT The Salvation Army, an international movement, is an evangelical part of the universal Christian Church. Its message is based on the Bible. Its ministry is motivated by the love of God. Its mission is to preach the gospel of Jesus Christ and to meet human needs in his name without discrimination. ==================

SA Story

Salvation Army Story hrang hrang, Mizoram, India leh khawvel ram hrang hrang thu thar leh thu hlui kan rawn ziak ang.
.......................................................................................................................



UNIFORM CHUNGCHANGA THUCHHUAH
(2013)

India Eastern Territory-a Uniform atana Navy Blue Navy Blue hman tantirh kum 2008-a THQ atanga Uniform hman dan chungchanga thuchhuah tawh chu, a hun alo rei deuh ta a, Uniform pangngai (avar) leh thlasik lai Uniform (Navy Blue) hak hun chungchangah, rualkhai zawka kan kal theih nan Territorial Commander chuan thu a chhuah thar leh ta a. Thuchhuah hi Division Headquarters-atanga Corps tina chhuah chhawn leh tur anih avangin hun a duh rei dawn a, chuvang chuan Territorial News chhiar tute chuan hei hi hriattir naah ngaia zawm nghal mai a tha ang e.
Navy Blue hak hun : October - February (thla nga chhung)
A var hak hun : March - September (thla sarih chhung)
India Eastern Territory/South Asia Zone-ah hian Uniform chu A var suit a ni a, working uniform atan Kawrvar & Navy Blue Kekawr/Puanfen hman tur a ni a. Hei hi chawlhkar ni inkhawm (Sunday nilo ah) Officer te pawhin hun hmangtu an nih loh chuan an ha thei. Mi tupawhin Uniform var hi eng hun lai pawhin hak theih a ni a, Navy blue erawh chu a chunga kan tarlan ang hian, kum khat ah thla nga chhung (October – February) hak tura tih a ni.
Uniform anih angin, mahni duhdan anga thui mai pawh a remchang lova, in ang tlanga thui anih theih nan, Trade centre, Temple Square, Aizawl-ah entawn tur dah a ni a, hei hi sipaiten entawna zui vek i tum ang u.


PATHIANIN MIN HRUAINA LAMTLUANG
(Zoram Sipai Pawl Ni Pual)
  - 2013

    General William Booth leh Catherine Booth te nupa in tlawm taka hmun kil khawr atanga an lo tanchhuah ‘The Salvation Army’ rawngbawlna kal zel chu keini ram, Mizoramah ngei pawh Lt.Col. Kawlkhuma kaltlangin April Ni 26, 1917 khan din alo ni a, tunah kum 96 lai mai Pathian kaihhruaina azarah Zoramah ‘Chhandamna Sipai Pawl’ chu a lo kal ve ta a ni.

    Mizoram-a Chhandamna Sipai Pawl chanchin sawi dawn chuan Zoram-a bultantu Pu Kawlkhuma chanchin hi i han tarlang ila -

    Pu Kawlkhuma hi November Ni 1, 1889 khan Lungtian khuaah Pu Chhimthangvunga leh Pi Kawlchhingpuii te inkar atangin alo piang a, kum 1906-ah Kristianah a inpe a, Mizo zinga Kristian a inpe hmasa zingah a tel a ni. Kum 1908 ah Middle English a pass a, Lushai Hills (Mizoram) a Pawl 6 pass hmasa berte zing a mi a ni. Kum 1909 ah Nl. Khuangi nen Welsh Mission (tuna Presbyterian Kohhran ni ta) Kohhranah Dan Thianghlimin an innei a, kum 1908-1912 chhung Dr. Frazer-a hnuaiah Compouder hna a thawk a, amaherawhchu, Dr. Frazer-a chu sapramah a hawn tak avangin kum 1913 ah PWD ah Station Mohorer (tuna PWD S.A hna kan tih ang hi) hna a thawk leh ta a ni.

    Kum 1913 khan Lushai Hills ah harhna vawihnihna a thleng a, chu hlimna avang chuan Kohhran mipuite chu an lam mup mup thin a. Pu Kawlkhuma chu a nun a mangang em em a, mite chu vanram lam panin an liam mai zel niin a hria a. Tum khat chu inlarna a hmu ta a - “Thirtiang lianpui zum tak, ling vur mai hi van lamah hian a virkual pup pup mai a. Misual leh a kawng dal apiang chu a taithlerin a thil tlang pur pur mai a”. A han in ngaihtuah chuan kawng daltu chu a ni ve tih a inhria a, Isua Krista’n a thisen tlanna avangin thiam a chang a ni tih a inhre ta a, mangang takin suala inhriatna te neiin Pathian hnenah ngaihdam a dil a, Isua chu Lal leh Chhandamntu ah a pawm a, alo piangthar ta a ni.

    Thlarau Thianghlima harhna a chan chuan taksa, rilru leh thlarau thianghlimna famkim a dawng ta nghal a. Kristian ringtu dik tak chuan ruihtheih thil zawng zawng a bansan vek tur a ni tih chu thupuiah neiin a thil lo tih thin ang ang te chu a sim nghal ta vek a. Dan avanga chhandam kan ni lova, khawngaihna avanga Chhandam kan ni a ti a, a hlim hle a, Pathian chawimawi leh pawlna nasa takin a nei thin a ni.

    A pianthar-a a thu lak dan chu a awmna Kohhran chuan an ngaithei ta lova, “Chhandam nih inhriatna hi keimahni tih tur a ni love” tiin Pu Kawlkhuma thu ken chu a kalh ta a. Chutia an thu a inmilh tak loh avang chuan February Ni 7, 1915 khan “PATHIAN THUAWIH DIK PAWL” tih hming pu in mi 14 te chuan inkhawm hranna an nei ta a. Chhinchhiahna pawh nei nghal in Khaki Uk, Kawripte pahnih hmalamah belin a tlangah Puansen an bel a ni. Welsh Mission Kohhran a chhuahsan dan leh an inkhawm hran chungchang hi sawi neuh neuh a tam hle a, Welsh Mission Kohhran dang mipui thenkhat chuan chanvo chungchanga lungawilohna a neih avanga chhuak angin an sawi chang a awm bawk. Mahse hei hi a dik lo a ni.

    Nikhat chu Pu Dohnuna, chutih hunlaia Bawrhsap arpu hotupa inah chuan an leng a, an chanchin an han sawi chuan Pu Dohnuna chuan Salvation Army nena an kalphung a inan thu lo hrilhin Salvation Army Thurin Bu leh Thupek leh Thununna Bu (O&R) chu a lo pe a. An han haw hnu chuan Pu Kawlkhuma chuan a han chhiar a, a chhiar zawhte chu Mizo tawngin a let zel a. “E! Hei chu keimahni ang chiah an ni e” tiin lehkhain an zuk zawt ta a. Commissioner Booth Tucker, TC chu an zuk hriattir ta a. Commissioner chuan hetiangin a rawn ziak a, “In zing ami Hindi emaw English thiam pahnih lo kal rawh u” tiin a rawn ko ta a ni.

    Chutia Territorial Commander hnen atanga lehkha an han hmu chu an phur hle a, mahse kal man an nei si lova. An chanchin vel alo hriatin Sairang mi hausa Pu Vanhlira, Pu J.Lianchungnunga pa chuan mi pahnih, Pu Kawlkhuma leh Pu Chalchhuna te kalna man tur Rs. 60.00 alo pe ta hlauh a, May Ni 16, 1916-ah chuan Sairang atangin lawngin an chhuak ta a ni. Pu Kawlkhuma te Traininga an thangbo chhung hian Pu Vanhlira te chhungkua hian Pu Kawlkhuma nupui, Pi Khuangi leh a fate an lo enkawl a ni.

    Dam taka Simla an thlen hnu lawk June Ni 15, 1916-ah Pu Chalchhuna chuan ropuina ah a kaisan san hloh mai a, Pu Kawlkhuma chu amahin Bombay-ah Training College ah a lut ta a ni. Training College atanga a chhuahin Kharakpur, U.P ah hnam sual siamthatna hmunah an awmtir a, Mizoram-a let beisei viau mahse lungawi takin an hmun tur an ruatah chuan a kal a. Kum 1917 alo inherchhuah chuan Pathianin Lushai Hills lama a kaltir turin TC chu lehkha a thawn ta a, “Commissioner duh tak, kan ram lam Lushai Hills-ah ngei min kaltir loh chuan Pathian kohna dodaltu i ni ang,” tia a han ziah meuh chuan TC chuan Aizawla awm turin a phalsak ta a. April Ni 25, 1917 ah mahni in thleng lovin Durtlangah a thleng hmasa a, a tuk April Ni 26, 1917 ah chuan Officer full uniform nen Aizawl a lut ta a ni. Hemi ni nge mai hi “ZORAM SIPAI PAWL NI” tih a lo ni ta a ni.

    Kan mihuai kalta te khan hun harsa tak tak, hmuhsitna leh endawngna tam tak paltlangin hmangaihna tak tak nen Chhandamna Sipai Pawl an lo enkawlna rah chu tunah hian keini hian kan lo tel ta a, kan hruaitu ralhrat tak tak te sulhnu zui turin Sipaite i in sang mar teh ang u!


Sipal Pawl Chhinchhiahna - CREST

    Chhandamna Sipai Pawl in chhinchhiahna kan neihah chuan Crest hi a hmasa ber a ni.
    Crest siam chhuaktu hi Captain W.H. Ebdon niin Kum 1878 khan Crest neih hi a rawt a, kum 1879 khan Salvation Army Headquarters Letter Head ah hmuh tur a awm tan ta a ni.
Kros - A lai a Kros hian Isua Krista Kros a entir.
“S” - A lai a “S” hian Isua Krista’n sual laka min Chhandamna (Salvation) a entir.
NI ZUNG - A bial atanga thil zum fir fer lo chhuak hian Thlarau Thianghlim mei alh a entir.
THIL MUM PASARIH - A lai a thil mum 7 hian Chanchintha thutak a entir.
NGUNHNAM - A laia ngunhnam pahnih in kawkalh hian Indona a entir.
BLOOD & FIRE - Blood & Fire (Mei leh Thisen) tih inziak hian Isua Krista Thisen leh Thlarau Thianghlim Mei a entir.
LALLUKHUM - Lallukhum hian sipai ten nakin a vanram a kan lawmman dawn tur lallukhum      a entir. danah hian tlem tih danglam a ni a. Lallukhum a hmawr a arsi awm hi belh leh  a ni.



SIPAI PAWL PUANZAR

    Sipai Pawl chuan khawvel rilru tak leh chapona thinlung takin ‘Puanzar’ hi a siam lova, Pathian tihtu, Thutak hmanga raldotu a nih avangin, leh Bible thu a nih avangin he ‘Mei leh Thisen kai puanzar’ hi ram tinah zar tumin a bei tawh a, a bei zel dawn a ni. “Nangmah tihtute hnenah chuan puanzar i pe ta a, Thutak avanga zar a nih theih nan” (Sam 60:4).

    Sipai Pawl puanzar hmasaber lo lanna chu William Booth-a nupuiin Coventry Corps tana a pek kha a ni. Chutihlai chuan a rawng chu a senduk, Isua Krista thisen entirna, a dumpawl - Thianghlimna entirna leh a laiah Ni (Sun) lem leh eng aiawhtu te leh Mei leh Thisen thuziak chuan ‘Beramna thisen leh Thlarau Thianghlim mei’ entirnate chu an ni.

    Tuna kan hman mek ‘Hnehna Puanzar’ hi 1874 kumtir lam khan General leh a fapa Bramwell Bootha chuan flag rawng leh a pian phung tur an sawi dun a, 1876 May thla khan chu mi t hu chu General chuan Billups-a nupui hnenah, “Puanzar neih dan kan ngaihtuah a puansen duk, dumpawl hualin, eng nge i ngaih ve dan? A senduk chuan - tlanna, a dumpawl chuan thianghlimna a entir ang a,” tiin a thawn ta a.

    Tuna kan puanzar hman mek hi 1882 vela siam a ni a, a laia Ni chu ‘Arsi’ in an thlak ta a, General chuan 1882 June thla khan Penzence Corps Biak In thar lungphum a phum laiin, a pe ta nghe nghe a, William Booth-a leh a nupui chuan a rawng awmzaite an sawifiah a, an tihdanglam chhan erawh chu a sawi lo thung. General chuan Corps tinte chu puanzar nei theuh turin a hrilh bawk a ni.

    Puanzar a laia Ni (Sun), Arsi (Star) a an thlakna chhan chu, mi thenkhat Ni betute an awm avangin, chung mite tan chuan ngaihthiam loh tur a awm theih avang leh, anmahni chu Sipai Pawla lut tura harsatna a siam hlauhna avang a ni.
(Source - Kan danglamnate)


FLAG HMAN TUR D.C. TE HRIATTIR

Lt.Col. Lalbulliana, Secy. for Personnel Administration chuan Divisional Commander te hnenah thuchhuah siamin, Ceremony hmang tuten an Ceremony khawih azira Colour Sergeant-ten puanzar an zar tirna dan tur (Ceremony Date of Composed : 06/09/99 Date of Modified:15/02/2004 IHQ in a tarlan dungzuiin) hetiang hian anmahni Division chhunga anlo hriattir turin DC te a hriattir a ni.

Sipai lawm luhnaah : A lawmluh sipaite chungah Flag zar tur (at the time of the enrolement,the recruits should be called to the platform and stand under the Flag)

Naupang Sipai lawm luhnaah: Naupang Sipai a lawmluhte chungah Flag zar tur (The Young People to invited to the Platform together with the Young People Sergeant Major and junior Soldiers’ Sergeant they should stand under the Flag)

Sipai pawl zawmthar lawm luhnaah : Lawmluh tharte lu chungah Flag zar tur.

Nauhlannaah chuan Nauhlantu Officer Lu chungah Flag zar tur (And the Colour Sergeant should stand behind the Officer)

Inneihna ah : Inneihtirtu Officer Lu chungah Flag zar tur (For the wedding of Salvationists the Flag should be held or Placed behind the Officiating Officer. For the Marriage of non-Salvationist the Army Flag may be used at the Officers’ discretion).


ROVER SCOUT

    Boy Scout leh Girl Guides hi tlawmngai pawl, mite tanpuitu leh khawtlang tana thil tha titu, mihring siamthatna hmanrua tha tak a ni a. Sipai Pawl rawngbawl dan nen a inrem hle a ni. Chutiang chu a nih avangin hei pawh hi Salvation Army rawngbawlna huang chhungah an lo khung tel a lo ni a.
 Scout & Girl Guides hian dan fel tak a nei a, chung te chu Salvation Army thawh dan rem zawngin an siam tha a, Dan bu fel tak an lo siam a ni. Khawvel pumpuia Scout & Girl Guide thil tihkhawmna te, mahni rama thil pawimawh tihnaah te, hun pui pawimawh bika thawh tur a awm changte hian Salvation Army Scout Troop pawh a tel thin. Thawh dan pangngai bakah Pathian thu theh darhna atan a tangkai thei zawnga kalpui a ni.
    Scout & Girl Guide Dan bu te Mizoram mihring rilru leh nun dan mil zawngin siam that a ni a, Aizawl Bazar Corps-ah kum 1981 khan Rover Scout leh hmeichhe lam tan Ranger Group din a ni ve ta. Rover leh Ranger hi puitling tawh deuh te telna a ni a, zirna hmun sang deuh chinah an din thin. Mizoram Scout & Guide Association ah member pakhat angin a awm ve thei mai a.
    Rover Scout ho thawh dan ber chu mahni taksa leh rilru invawn that a, insawi zawi that te, thil pawimawh bika duty te, Corps leh khawtlangin an mamawh hun apianga hna pawimawh lo kenkawh te, thil tha ti tur leh tanpui ngaite puih dan ngaihtuah te a ni. Inkhawmpui nikhuaa Gate duty leh thutna rem vel leh, mi sahawk lutuk tur lo ven te hi an hna a ni bawk. Scout leh Guide member dik tak chu nun bawlhhlawh leh thatchhe takte lakah pawh an invawng fel khauh zel a ni.
(Source - Indonna tha Sipai)


CHHANDAMNA SIPAI IN PUANZAR KAN HMAN DAN TE

    Serh leh sang (ceremony) hrang hrangah te uluk takin a hmang thin a, Corps tharah te, Society tharah te chuan zar ngei tur a ni a, hma thar la a, hna a thawhna hmun apiangah Chhandamna Sipai chuan a zar thin.
    Mi thenkhatin, Sipai Pawl chuan Baptisma leh Lalpa zanriah aiah puanzar hmang thin angin an sawi thin a, Sipai Pawl chuan Lalpa zanriah emaw baptisma aiah emaw puanzar hi a hmangin , a zar ngai lova, a zar bawk hek lovang, hei hi mahni leh mahni dawt insawitir tumna ang chauh a ni.
    Sipai Pawl chuan Bible zirtirna atangin, ‘Puanzar’ hian awmze ril tak a nei a ni tih a hriat chian em avangin, a zahin a ngai ropui em em a, ‘Puanzar pekna’ pawh urhsun takin a nei thin. Puanzar chu Divisional Commander/Divisional Officer-in a pe tur a ni a, dawng tura ruat bik ten an Officer hovin an dawng tur a ni a, chutiang taka urhsun taka puanzar pekna chu tih a nih hma loh chuan, vantlang hmaah zar emaw tihlan emaw phal a ni lo.
    William Booth chuan he ‘Mei leh Thisen’ puanzar hi khawvel Chhandamtu Isua Krista thihna Kalvari tlangah a lo phun tawh a. Vansang lam mi John Young (Baptist Kohhran) chuan Apollo 16-na hmanga Thlaa an lawm tum khan, America Sorkar duh ang ngeiin a phun ngei a ni tih Major Henry Gariepy, General Secretary chuan lehkha ni 25, April 1979 khan Pu Buanlawma, CSM (R), Kawnpui khuaa mi hnenah America atangin a rawn thawnah tarlan a ni. Sr.Capt. Lalkaithanga chuan he ‘Hnehna Puanzar’ hi kum 1923 khan Tripura State-ah a lo phun tawh a; chuta tanga kum 58 naah he ramah hian Salvation Army chu din alo ni ta. Mizoramah Sipai Pawlin harsatna lian tak a tawh lai pawh khan, Pu Lalkaithanga (PG) chuan, “Sipai Pawl atang hian a duh duh chu bang ula, tumah Sipai Pawl ka hmuh loh hunah chuan, Mizoram tlang sang ber Phawngpui tlangah ka lawn ang am Puanzar ka phun anga, ka tawngtai hlum thak mai ang,” a lo ti tawh a ni.
 (Source - Kan danglamna te)

Chhandamna Sipai Pawl chu enge ni?

Chhandamna Sipai Pawl chu A tir tak chuan ‘Chrisian Mission’ tih a ni a, Thlarau Thianghlim in Methodist New Connexion Pastor, William Booth hmanga 1865 a a din kha a ni a, chutih lai chuan Rev. William Booth chu ‘Christian Mission Superintendent’ tih a ni. Bootha chuan ngun taka a ngaihtuahin “‘Volunteer’ kan ni ringawt lo, enge kan tihtur kan hre chianga, kan thawk reng bawk a” tiin ‘Volunteer’ aiah ‘Salvation’ tih a ziak ta a, May 1878 atang chuan ‘Salvation Army’ tih hming a lo pu hlen ta a ni.

    Hetih hun lai vel hi Railtona chuan a chanchinbu ‘Heathen of England’ ah chuan heti hian a ziaka, 1877 leh 1888 ah chuan “Krista tana mahni duhna ngeia thawk sipai rual kan ni e (We are a Corps of Volunteers for Christ)” tiin. 1879 ah chuan chu chu tidanglamin “Krista Sipaite kan ni (We are an Army of Christ)” tiin a ziak leh a. 1878 ah chuan “Kristian Mission chu piangthar taima rual, mahni duhna ngeia sipaia inpete” tiin a report bawk. Christian Mission chu “Piangtha taima rual (Converted Working People)” tia hriat a nih mek laiin “Chhandamna Sipai” tia dah a lo ni ta a ni.

    Chhandamna Sipai chuan a nihna dik tak chu a kawrnghawngah a tarlang a, ‘S’ pahnih ‘Saved to save’ - ‘Chhandam tawh, midangte chhandam tur ka ni e’ tiin. Chu chu Sipai Pawl member tinte nihna chu a ni.

    Chhandamna Sipai Pawl chu mite an thlarau lam leh tisa lam harsatna tanpuitu chu a ni. Churchilla chuan “Tanpui ngai an awmna apiangah Chhandamna Sipai Pawl an awm” a ti a. Billy Grahama chuan, “Sipai Pawlte chuan an kut dinglamin Bible an kenga, vei lamin tuisik no an keng” tiin a sawi. Japan lal pakhat chuan “Salvation Army te hi Kristian hmel an ni e” tiin a sawi bawk. William Bootha chuan “Riltam chungin an thlarau lam chaw kan pe thei lovang” a ti a.

“Tun anga hmeichhiate an tah chhung chuan KA DO ANG
Tun anga naupang riltam an awm chhung chuan KA DO ANG
Tun anga Lunginah tang lut leh chhuak an awm chhung chuan KA DO ANG
Kawtthlerah hmeichhe naupang vakvai an awm renga, Pathiang eng tellova Thlarau pakhat pawh an awm reng chhung chuan KA DO ANG a
A tawp thlengin KA DO ANG”
tiin

    Sipai Pawl chuan ‘Chhandamna Chanchin Tha’ Thlarau bote hnena hril chunga retheihna umbo hi a tum dan pawimawh ber pakhat chu a ni. William Bootha thuvawn chiah hi America President ropui tak John F. Kennedy khan a rawn man fuh chiah maia, a ram mipuite hnen, ‘Ramthar lak tur kan nei, hma thar bawh tur kan nei” a tih fo thin pawh kha, mirethei leh ram rethei zawkte chhawmdawl leh tanpui kha a ni.

    Salvation Army hi William Bootha siamchhuah nilovin, Pathianin a hmuhchhuah tir a ni zawk.
    William Booth chu Pathian tana thawk reng mai, zawi muanga che ngailo a ni a, darkar 24 chhungin darkar 48 hnathawhna hun neia sawi a ni.

    A nupui Catherine Booth thu tihtluk pawh hi a ropui hle. “Zurui mite leh misualte an inah leh kawtthlerah thu ka hrilh tur a ni” tih a ni.

    Heng mi pahnih Atana inpe zote hmang hian Pathian chuan “Chhandamna Sipai” chu a lo din ta a ni.


The Salvation Army Youth Rising Day
 
Kum1971 hmalam zawng khan Mizoram Sipai Pawl thalai hian hming hran an neilo a, ‘Thalaite’ tih emaw, ‘Thalai pawl’ tih emaw chu kan hmandan tlangpui niin kan thalai ten rawngbawlna an lo nei mai thin a, Thalai leader neiin mahni Corps theuh ah thiam ang angin rawngbawlna a kal mai thin. Mumal deuh taka hotu kokim deuh taka insiam a, thalai pawl din hmansa ni a ngaih theih chu Darlawn Corps ani mai thei. An ni hian Kum 1960 August thla atangin Thalai pawl invuah in, amawhphur tu bikim takin anlo tan a ni.
Thalai te tih ang chuan Corps dang pawhin rei tak atang khan rawngbawlna anlo kalpui a, kum 1954 ah phei chuan Division pum thalai inkhawmpui Saitual ah neih a ni. Calcutta atangin Territorial Young People Secretary Maj. Milton Ramd an a rawn hmanpuia, Aizawl atangin chutih laia D.C Brig. W. Merry leh DYPS Maj. Sapliana pawh an kal bawk. Palai 500 aia tam mah an kal a ni. A hnu ah kum 1960 khan Thalai inkhawmpui Darlawnah a awm leh a, palai an kal tam vak lo, mi 150 vel chu an kal. Corps 9 chauh huam inkhawmpui a ni a, kum1954 kha ‘Thalai te kum’ ti a puan a ni nghe nghe tawh a ni.
Salvation Army Thalai Pawl hming atan saprama an lo hman reng tawh Torch Bearer Group Movement (TGM) tih chu  kum 1971 April thla atang khan hman a ni ve ta a. TGM dan bu a awm a, chu chu mizo nunphung mil deuh tura siam tha in dan mumal tak hman a ni ta. TGM dan anga indin hmasa ber chu Chaltlang Corps hi a ni awm e, Bazar Corps pawhin dan hman atang chuan an din ve nghal deuh mai bawk. 
          TGM chu Eng (Meichher) Kengtu/ Chhitu Pawl tih a ni mai awm e. TGM ah chuan Sipai Pawl mi chauh nilo, TGM dan leh inkaihruaina tha ti leh zawmtute chu an tel thiang vek a ni. Thalai nun siamthat hi atum pakhat a nih avangin taksa vawn thianghlim leh hriselna lamte a ngaipawimawha, infiamna chi hrang hrang- indoor games leh major games te tih tel a ni. A tum pawimawh ber erawh chu Pathian thu, thlarau chhandamna a ni.
         TGM hming chu 1981 March thla atangin Saprama Thalai Pawl hming thar Young Crusaders (YC) ti a thlak a ni leh ta a. He hming hi Sipai Pawl rawngbawl dan nen pawh a in hmeh in a remchang hle. Sipai tih tak ah raldo tur kan ni a, Crusaders an tih te chu kum zabi 11-13 vela Kristian Pasaltha rammute hming invuah kha a ni a. Mosolman ho kut ata ram thianghlim Palestina la let tura Sipai Raldotute hming atana an lo hman a ni.
India Eastern Territory kan nih hnu kum 1994 Young Crusaders(YC)  Inkhawmpui, Kolasib ah YC tih chu Salvation Army Youth (SAY) tia thlak rel thluk a ni ta a, a kum leh 1995 atangin SAY tih hi Thalai Pawl hming alo ni leh ta a. 


Kan Danglamnate

Corps Chhunga Sipaite Tih Tur : Pathian Biak Inkhawmna a Kal

    Inkhawmnaa kal fo mite hian kal ve dangte an tichakin, thuhriltu an pui nasa a, ngun taka thusawite ngaithla thin mite phei chuan thuhriltu an tichak lehzual a ni. Chuvangin inkhawmna a kal thinte chu mahni tan leh kalve dangte tan leh thuhriltu tan leh Corps tan an tangkai em em a ni. Inkhawm thlahthlam hian mahni tan leh ringtu dangte tan leh Corps tana Kristian ta lakkhawmpui lovin, an tidarh zawk thin a ni.

    Inlama Sermon tha leh sakhaw lam chanchinbu lo chhiarte, thlarau lam chawmna thu tha lo sawite hi a tha viau a, mahse inkhawm thulh phahnana kan hman chuan sawt tlanna tur thil tih thulhin, mahni duhzawng kan um a ni. Paula zirtir dan a kalh a ni.
    Inkhawm lova len khawchhuahte, In lamah leh hmun danga awm nileng ta mai mai te hian chawlhni an bawhchhia a ni an ti thin. Natna avang a nih ngawt loh chuan inkhawm thulh thulh phahnana chhuanlam tha tawk hi a vang viau a ni. Thupek leh Thunun dan Bung 10, section 10 ah pawh hetiang hian kan hmu “Sipai chuan remchang a hmuh tam theih ang berin Corps inkhawm zawng zawng ah a tel vek tur a ni a, inkhawm thu ah hun a hmang dik tur a ni” tih hi.

“Thenkhat tih dan anga kan inkhawmte bansan lovin, infuih tawn zawk ang u; ni chu lo hnai telh telha in hriatin infuih tawn nasa lehzual sauh rawh u.”
Hebrai 10:25

Kan Danglamnate

Salvation Army in Hma a Hruai

RINNA A THIAMCHANNA:
Hei hi pawm har an ti em em thina, tunah chuan thlarau hriattirna dawngin, ‘thiltihin min chhandamlo’ tih tantu pawimawh tak tak an lo ni ta.

QUARTERS:
Thawktu In hi kohhranin tunhma chuan an nei hrang lova, tunah chuan Quarters tha tak tak neih an lo ching ta.

INNEIH SILHFEN:
Salvation Army chuan a tir atngin, form kawr hi tawkin an hria a, hemi hmang remchang theilote pawh, mawl tak, man  tlawm taka inthuam tura alo hrilh thin angin, tunah chuan kohhranten in zirtirnan an hmang ve ta.

VISITATION (Kan velna):
He rawngbawlna hi Sipai Pawl chuan a tir atangin, a Dan Bu ah a lo ziak diam tawha, tunah hian kohhrante hian a thatzia hria in, upa bialte insiamin, hlawhtling takin an kalpui ve ta a ni.

RIMAWI:
Kutkhuang, Darbenthek leh Guitar te hi Sipai Pawl chuan a tir atangin, Pathian chawimawinan a senglut nghala, a bikin Mizoramah Sipai Pawl chu Khuang hmanga Pathian chibai bukna nei hmasa ber niin a lang. Pu Vanhlira’n Rs. 80/- a Khuangpui a leisak hmanga Pu Kawlkhuma hovin Pathian an chawimawi chu, Pastor Chhuahkhaman a khap thu, Brig. Ngurliana chuan a ziak. Tunah chuan Biakin tinah Khuangpui leh Khuangte in Pathian an fak thei ta.

FLAG (Puanzar):
Puanzar hmanag rawngbawl hi miten min hmuhsit phah mahse tunah chuan pawlho tan a thatzia an hre ta a, kohhran thalai pawlte lamin an lo nei ve ta.

THIANGHLIMNA:
Sipai Pawl chuan Thianghlimna thu hi a zirtir uar em em a, tihthianghlimna famkim thute hi Sipai Pawl ang hian Kristian pawl dangte hian an zirtir tamlo hle a ni.

RAWNGBAWLTU INSAWN:
Sipai Pawl chuan hunbi tuk awm lovin a puithiamte a sawn thin. Kohhran hmasate khan hun bi tuk neiin awmhmun an bengbel lo tih hria in, tunah chuan kohhran puitling leh Thlarau rawngbawlna tuipui miten hunbi ruat neia rawngbawl hi a inpek zawh loh thlakin an lo hre tan ta.

MIPA LEH HMEICHHIA:
Dinhmunah te, chanvo ah te, mawhphurhna ah te, rawngbawlna kawngah inang renga hmangtu pawl awmchhun a ni.

WATCH NIGHT SERVICE:
Kumhlui leh kumthar inkarah Pathian hnena lawmthu sawi a, a hnena inhlanna inkhawm “Watch Night Servise” (Zanlai Inkhawm) Mizoramah a hmang hmasa bertu a ni.

FELLOWSHIP/ SPORTS & GAMES:
Mizoramah chuan Kristian huangchhunga thalaite zingah a lalut hmasatu a ni. Tisa riauva an hriat thin kha tunah chuan hmuh thlarau tan a lo ni ve ta.

THAWHLEHNA:
Isua thawhlehna hriatpuina leh chawimawina kawngah hma hruai bawk.

...................................
The High Council

    High Council hi General William Bootha’n kum 1904 ah General te an dinhmun atanga sawn/thlak an nih ve theihnana asiam a ni a, Salvation Army inkaihhruaina leh inrelbawlna  a an mit a tlung tawk lo emaw, damlohna/hrisellohna avanga General  thlak ngaia hriat anih chuan High Council an thukhawm a, a thlaktu tur an ngaihtuah thin. Amaherawh chu General William Booth khan General thlaktu tur chu General nilai mekin a ruat ang a ti a, mahse hetiang hian General pakhat chiah - General Bramwell Booth kha 1912 ah ruat a ni.
    Kum 1928 November thla khan General Bramwell Booth kha IHQ ah thla sarih lai hrisel lohna avangin a inlan thei lova, chumi tum chuan High Council koh a ni a, member 63 awmna, active commissioners leh territory hrang hrang a hruaitute chu lokal khawmin London khaw dai a Sunbury Court ah ni 8 Jan 1929 khan General Bramwell Booth, chutih lai kum 73 mi chu hriselna that loh avangin amah thlaktu tur an ruat ta a. Tichuan February 1929 atangin Councilin an thlan hmasak ber ni turin Commr. Edward Hoggins chu General alo ni ta a ni.
    Hun lo kal zelah Commissioners Conference chuan Salvation army Act 1931 chu Bristish Parliament kaltlangin dan pathum an lo duangchhuak a, chungte chu -
1. Generalin ama thu in a aiawh a ruat theihna dan titawpin General thlaktu tur chu High Councilin a ruat tawh ang.
2. General te kum zat a zira retire hun siam.
3. Salvation Army trustee company pawl thil neih leh sum leh pai vawngtu dinin, a hma a Generalin thuneihna pumhlum a neih thin tihtawp.
    High Council hi Chief of the Staff in a ko tlangpui thin a, UK chhungah khawi hmunah pawh an inhmukhawm thei a ni. Tuna Council memberte chu Commissioner tanglai zawng zawng te (General nupui tiam loin) leh Territorial Commander zawng zawngte an ni.

All The World

    India atanga Indonesia te, Ukraine atanga USA te, Salvation Army te hi Pathianin mi nun thlak danglam turin a hmang nasa em em a, thil thleng dik tak puanchhuahna leh thuhretu tha tak All The World - Salvation Army International Magazine hi i lo hre tawh ngai em?
    Kumkhatah vawili (4) tihchhuah a ni a, khawvel hmun hrang hranga Salvationist te, rawngbawlna chi hrang hrang emergency relief te, development leh Community hna hrang hrangte kimchang taka tarlan thin a ni a, eitur semna hmun a ni emaw, hnathawhna tur - inthar sak a ni emaw, rehabilitation scheme leh community programme hrang hrang te awmna hmunah All The World chanchinbu chu a awm a. He chanchinbu hmang hian Pathian hnathawh ropui tak - mi nun thlakthleng vek thei chanchin te leh Salvation Army member thahnemngai tak tak te thawhrimna leh inpekna puanchhuah thin a ni.
----------------------------------------------------

* 1882 kum khan India, Canada, Switzerland leh Sweden ramah te Salvation Army a ding.
* 1885 kum khan Salvation Army Thurin bu chhut a ni a, hemi kum vek hian Divisional Commander-te tan Orders and Regulations bu siam tan a ni.
* Mexico Territory ah khuan members 2106 chauh an awm a, Officers thawklai 117 leh Retire Officers 23 an awm a, employees 34 an awm bawk.
* Italy Command ah khuan members 326 chauh an awm a, Officers thawlai 24 leh Retire Officers 20 an awm. Bazar Corps zatve vel chauh an ni.
* Bazar CO Bial ah hian members 2400 vel kan awm a, CO te nupa, Officers 2 in min awp thung.
----------------------------------------------------

Sakramen
Mi tam takin chhang leh uain te leh tui hi Sakramen ah an ngai a, keini Salvation Army-te erawh chuan mita hmuh theih loh, Nun leh Thinlungin kan hmang.


SAY Rising Day
      Salvation Army rawngbawlna chu April 26 1917 atangin Mizoramah tan a ni a, hmasawn zelin, Kohhran dangte leh sawrkar hruaituten dodal thin mahse Lt. Kawlkhuma leh a sipai ten harsatna tam tak karah pawh Pathian an tih tlat a, A rawng an bawl tlat a, anmahni kaltlanga Thlarau Thianghlim hnathawh chu dan zawh rual a ni ta lo.  Mei kang ang maiin Thu leh Thlarauah, Pathian ah harhtharna chu a thleng ta zel a ni.  

    Thalai rawngbawlna Salvation Army-a alo intan dan hi  hriat theih tawh lo mahse thalai bila thiltih leh inkhawmna te chu kalpui a nih ngei a rinawm. Sipai Tlangau 1955 Jan a chhuakah ‘ Zoram Thalai Inkhawmpui Hmasa Ber’ tih hmanga Ni 8-11 Oct 1954-a Youth Congress Report chipchiar taka tarlan a nih avangin. Hetih lai hian eng hming nge Salvation Army thalaiten kan put hrethei lo mahila, Headquarters hriatpuina a inkhawmpui hmasa ber Corps 54 atanga palai 500 chuang kalkhawmna ni hi India Eastern Territory a Salvation Army thalai pawl din chhuah ni atan Territorial SAY General Council, Ni 24-25 Nov 2007-a Tuikual Corps a neih ah, ngun taka ngaihtuah a nih hnu ah ziaka chhinchiah felfai taka kan hmuh theih hlui ber anih avangin 8-Oct-1954 hi SAY Rising Day atan nemngheh a, pawm alo ni ta a ni. THQ pawhin Calendar of Events ah Ni Pawimawh bik te zingah min tarlan sak ta a ni.


Thalai rawngbawlna kum 55 na
    Hetiang hi S.A. huam chhunga thalai rawngbawlna hming in thlakthleng dan tlangpui chu a ni
1. Thalai :   8 October, 1954 (Saitual Youth Congress)
2. TGM    :21 April, 1971 (Bazar Corps, Aizawl)
3. YC       : 3 January 1981 (Aizawl)
4. SAY      :  January  1995 atanga hman tan turin ni 14 October 1994 a Youth Congress, Kolasib a neihah pawma a ni.Tuna kan hman lai mek Salvation Army Youth tih hi Bazar Corps Thalaite rawtchhuah a ni.
    Ni 8 October, 2009 hi Thalai Inkhawmpui hmasa ber atanga a kum 55 na chiah a ni.


Self Denial (Mahni Inphat)
(Source : Salvation Army Thu leh Hla. - Lt. Col. Lalramliana)

    Self Denial hi khawvel huapa Salvation Army rawngbawlna sumpui World Wide Ministry Fund a ni a, a pawimawh em em a ni. He mi atan hian corps tinin target kum tin an nei thin. Headquarters-in appeal letter a siamte semin intinah khawn thin a ni a, pawisa nei remchang lo te pawhin buhfai te, bapui te, mai te leh vaihlo fun chenin phal takin an neih ang ang an pe thin a, a hahthlak deuh tih mai lohah chuan a hlimawm hle. Phunnawina a nat tak deuh avangin Mahni Inphat thawhlawm pawn lama khawn thin chu 1985 vel atangin chhunzawm a ni ta lova, mahse Self-Denial thilpek chu a let tam takin a pung ta zawk a, a mak hle.

    1982 khan Dinthar Corps chuan pawnlamah khawn lovin an target an lo khum tawh a, Dinthar Corps hi mahnia target khum hmasa ber a ni. An Officer Capt. Lalramliana’n DHQ-a a han thehluh chuan Maj. Saidawla DC chuan, ‘Pawn lam khawn lova SD target tlin hmasa ber in ni’ tiin a lo hrilh a ni.

Self Denial lo intan dan : Salvation Army ngaineptu John Carleton-a chu Ireland hmar lama Salvation Army inkhawmnaah a farnuin a hruai avangin a tel ve a, hmusit taka, ‘Hmeichhe thuhriltute ka ngainep, Salvation Army ka ten, an zinga inkhawm ho te pawh mi a pui pui an ni’ tia tawngkam chehtu chu a vawihnih inkhawmnaah chuan a piangthar hlauh mai a. Salvation Army zawmin, officer-ah a tang ta ani. Lehkha thiam ni mah se hmeichhia tak ngial pawh a tluk lohzia inhre chhuakin hmeichhe thuhrilhtute chu a ngaisang ta hle mai a, Mahni Inphat rawngbawlna tan chhuaktu pawimawh tak niin, N. Ireland-ah 1880-ah Salvation Army a din ta a ni.

    John Carleton-a chuan a nitin chaw ‘Pudding’ ei ai chu pawisain a khawl ta a, kum khat chhunga a khawl shilling 50 chu Gen. William Booth-a hnenah a thawn ta a, General chu a lawm hle a, khawvel puma Self- Denial rawngbawlna chu tan a ni ta a ni.

    Self Denial Hapta an hmang tan ta a, Officer-te chuan an ‘pudding’ ei ai chu pawisain an pe tan ta bawk a, Gen. William Booth-a chuan Appeal Letter hmasa ber chu, ‘Chhandamna Indonaa ka thenrual thate u, Self-Denial Week chu kan tan dawn ta a, Sipaite lkeh thian thate chuan an kawr hakah te, incheina leh nawmchennah te an in sum tur a ni a, an taksain tuar lutuk lovin, an pawisa khawl chuan midang kan tanpui dawn a ni’ tiin a ziak.

    Mizoramah chuan 1920 khan khawn tan niin a lang. Brig. Ngurliana’n 1921-ah Ratu khuaa SD khawntute a zui ve thu leh 1925-ah Rs. 150.00 an khawn chhuah avanga hotupa Kawlkhuma pawh a lawm hle thu Ratu-a Sipai hmasa Thanchhinga’n a sawite chu chiang takin a sawi thei a ni. Hetih huna Rs. 150.00 lai han ngah chu a ni thei lova ngaihmai pawh a awl hle ang. Mahse, an lalpa Lalhleia Sailo pawh thlangra te tahin, a tang nasa hle thin a, lal ho meuha khawn an nih avangin, Rs. 150.00 tlin chu a harsa lo thei ang.

Self-Denial Pa : Presbyterian kohhran a mi, Self-Denial rawngbawlna nunpui a, ngaipawimawh em em tu, sipaia a tan laia a hlawh atanga sawma pakhat pe thin, a pension hnu pawh a pek chhunzawm a, self-denial bawma thlak tura chakai khawrh leh meihawl te rawh a pe thin, Self-Denial Pa tih hiala koh chu Pu Sapliantawna Darlawn a mi a ni. Kum 1987 Feb ni 9-a a boral tum pawhin a vuina hun chanve Salvation Army-in an hmang a, hun chanve dang Presbyterian ten an hmang a ni.





Comments on this page:
Comment posted by Dr K.Lalhruaitluanga( Hruaiteakyahoo.in ), 07/27/2011 at 2:49pm (UTC):
Tha tak ani, kudos Webmaster



Add comment to this page:
Your Name:
Your Email address:
Your message:


This website have 194453 visitors (571816 hits)
 


Zoram Sipai Pawl rawngbawl dan hi tha tawk i ti em?
Tha ka ti lutuk, a bak a awm thei lo
Aw, a tha tawk e
A tha ka ti lo
Ngaihdan ka nei lo

(View results)


 
=> Do you also want a homepage for free? Then click here! <=
SALVATIONIST (Bazar Corps S.A.Y. Newsletter) ================ EDITORIAL BOARD ================ Editor : ================ Jt. Editor: H. Lalhriatpuii ================ News Editor : H. Lalrinchhana, Reuben C. Zochamliana, Marina Lalrintluangi, Ngurnunpari ================ Cir.Manager: Lalrinchhana Lalrinpuia ================ Webmaster: Lalnghahchhana ================ Website: http://bazarcorps.page.tl & http://bazarcorps.blogspot.com ================ E-mail: bazarcorps@yahoo.com editorialboard07@yahoo.com, bazarcorps@gmail.com ================ Address: SAY, Bazar Corps, Dawrpui Jail Veng, Aizawl. Pincode: 796001. ================ Published by : Salvation Army Youth, Aizawl Bazar Corps, Jail Veng: Dawrpui. ================