Salvationist, Bazar Corps

Bazar Corps News leh Chhandamna Sipai Pawl News hrang hrang te ziahna a ni. Heng news-ah te hian comment pawh pek theih a ni e

SAY ACTION PLAN LEH BUDGET 2013

admin on 02/15/2013 at 10:09am (UTC)

January Ni 12, 2013 chawhnu dar 3:00 khan SAY Office ah kumina SAY Council vawikhatna leh Budget, Action Plan te siamin Council neih a ni.

He council hmasa berah hian Leader/Chairman Pu Robert V.L Thlamuana chuan thuhma tawite a siam hnuah Nl. Judy Lalfakzuali, Drama i/c chuan he council hi tawngtainain a hlan a, Council hmasaber chu tan a ni.

BUDGET 2013
Fin. Secretary, Tv.Emmanuel Lalhmunsanga chuan kum 2013 atana SAY Budget a siam chu sawifiahna a nei a, chumi hnuah ngun taka ngaihtuah anih hnuin Kum 2013 SAY Budget atana a rawn siam Rs. 3,84,500 (Cheng nuai thum sing riat sang li leh zanga) chu lungrual taka pawm a ni.

Incharge hrang hrang ten Action Plan leh Budget an rawn siam chu ngun taka sawiho a ni.

EVANGELISM
Nl. R.Lalremtluangi, Evangelism i/c chuan kum 2013 atana Action Plan leh Budget a rawn siam chu hetiang hian pawmpui a ni -

Evangelism Budget atan Rs.40,000/- (Sing li) chu pawm a ni.

Ni 19 January 2013 ah Retreat neih nise. Speaker atan Pu Lalthanzama Hrahsel, TEM Speaker chu biak nise.

Inkhawm chungchang:
1) Worship Service : Praise & Worship neih nise, Programme Sub-Committee kutah awm se.
2) Bible chhiar kaihhruaitu ruat ni se.
3) Thawhlawm hlantu ruat leh ni se.
4) Tawngtai rual kaihruaitu - Hei hi council member ten a inchhawka tih ni se.
5) Zan chanve/A rem chen chen tawngtai rual.
6) Crusade
7) Best Brigade thlan

Tawngtai subject bik ziahna: Evangelism i/c in lo buatsaih se tih a ni a, hei hi SAY Inkhawm ah sem thin ni se.

SOCIAL & COMMUNITY
Nl. H.Lalhriatpuii, i/c Social & Community chuan kumina Action Plan a siamte sawifiahna a nei a, ngun taka ngaihtuah anih hnuin hetiang hian pawm a ni -

1) Sensitisation on Salvation Army Social Issues: Hemi pual hian thusawi tur emaw (resource person) sawm nise.
2) Task force din: Hei hi Council lehpekah ngaihtuah leh nise.
3) Mi harsa te tanpuina atana bawm hun: Hemi sum hmang hian chhawmdawlna pek ni se. A remchan hun tur incharge in lo ngaihtuah se.
4) Free Clinic: A theih chuan tum khat mamawhtu te tan neih ni se.

Social & Community Budget atan Rs.30,000/- (Sing thum) pawm a ni.

GAMES & SPORTS
Tv. K.Lalrosanga, Asst. Games & Sports i/c in kum 2013 a Action Plan a siamte chhiar chhuakin a sawifiah a, hetiang hian pawm a ni -

1) Joint Sports - Tuikual Corps nen hun remchang hmasaberah neih nise. Charity Sports a hman ni se.
2) Brigade Sports neih ni se, items tur chu Sports dawnah ngaihtuah ni se.
3) Basketball/Volleyball jersey lei ni se.
4) Jersey dahna tur bag emaw thingrem/suitcase lei ni se.
5) Donor zawn ni se.

Budget atan Rs.20,000/- (Sing hnih) pawm a ni.

DRAMA
Nl. Judy Lalfakzuali, Drama i/c in kum 2013-a Action Plan a duan te chu chhiarchhuakin a sawifiah a, kum 2013 a Drama Action Plan chu hetiang hian pawm a ni -

1) Seminar/Worship - Performing Arts - August 2013
2) Project - Studio emaw Creative Art bik atan buatsaih ni se.
3) Costume/UV Light changtlung zawka neih ni se.

Drama Budget atan Rs. 17,000/- (Sing khat sang sarih) chu lungrual taka pawm a ni.

LITERATURE
Tv. Lallawmzuala, Literature i/c in kumina Action Plan a rawn siamte chu chhiarchhuakin a sawifiah a, hetiang hian pawm a ni -

1) Salvationist chhuah chhunzawm -
Senso atan Rs.16,000/-

Sponsorship tih leh ni se, a pangai Rs.300/- ni se Editorial Board atan heng mite hi ruat an ni.
Lallawmzuala - Chief Editor
Reuben Lalremruata - Asst. Editor
Malsawmdawngzuala - Jt. Editor
Victor M.S Dawngliana - Jt. Editor
Romel Rose Reia - News Editor
Oliver Zothanpuia - News Editor

2) Seminar/Workshop on Literature neih ni se.
3) Article writing competition neih ni se.
4) Literature Nite hman ni se.
5) Library tihnun leh ni se.
6) Council member, bial neitu ten a man hi a rang lama khawn ni se, receipt hi Literature i/c leh Editorial Board ten lo siam se.

Literature Budget atan Rs.24,000/- pawm a ni.

MUSIC
Tv. Malsawmdawngzuala, i/c Music chuan kum 2013 Action Plan a rawn siam te chu chhiarchhuakin a sawifiah a, hetiang hian Action Plan chu lungrual taka pawm a ni -

1) Worship Service : Tan hma leh tan hnu Minute 10 tal Worship Service neih ni se.
2) Hlabu : Worshipna-a hman tur Mizo & English hlabu siam ni se.
3) Zaipawl - Kalpui ngei ni se, ni bik leh hun bik ah te zai ziah ni se, Member inpekna siam ni se.
4) Brigade Songster Competition neih ni se.

Budget atan Rs. 5,500 (Sang nga za nga) pawm a ni.

PROJECT:
1) Acoustic Guitar leh pickup Rs. 15,000/- a rang thei anga lei ni se.
2) Music zirtur sponsor ni se, dilna hun hawn ni se.

BIAL THEN CHUNGCHANG:
Ngun taka sawiho a nih hnuin hetiang hian SAY Council members ten Bial kan insiam a ni -

1) Dawrpui South & Tuikual
i) Robert V.L Thlamuana, Leader
ii) Judy Lalfakzuali, Drama i/c
iii) K.Lalrosanga, Asst. Games & Sports i/c

2) Dawrpui West
i) Nelson Lalthanpuia, Asst. Leader
ii) Lalruatdiki, C/m

3) Dawrpui Jail Veng
i) Ellen Lalengzuali, Asst. Secy.
ii) Freddy Lalramnghaka, Asst. Evangelism i/c
iii) K.Lalrindika, Asst. Drama i/c

4) Zarkawt
i) Peter Lalthasiama, Games & Sports i/c
ii) Emmanuel Lalhmunsanga, Fin. Secy.
iii) Vanlalchampuii, C/m

5) Chhinga Veng/New Market/ Electric Veng
i) R.Lalremtluangi, Evangelism i/c
ii) Reuben Lalremruata,
Asst. Litt. i/c
iii) Philip V.L Rinpuia,
Asst. Music i/c

6) Saron Veng
i) H.Lalhriatpuii, Social & Com. i/c
ii) M.S Dawngzuala, Music i/c
iii) Lallawmzuala, Litt. i/c
iv) Oliver Zothanpuia, C/m

7) Upper Bazar/Med. Qtrs/Thana Tlang
i) Dr. K.Lalhruaitluanga, Secretary
ii) Lalsangbera, C/m

8) Dinthar/Tuikual D
i) Zulvelin V.L Rosangi, Treasurer
ii) C.Lalthlamuana, C/m
iii) Amanda Lalhlupuii, C/m
iv) Lianhmingthanga, Asst. Social & Community i/c

BRIGADE CHUNGCHANG:
Kumin chhung atan heng mite hi Brigade Leaders atan Council chuan lungrual takin a pawm -

1) Reuben Lalremruata Sailo -
Maj. P.C Thansanga Brigade
2) Freddy Lalramnghaka -
Maj. Sangzuala Brigade
3) K.Lalrindika -
Maj. Lalthansanga Brigade

Brigade Leaders te hian an Brigade Members atangin mahni Brigade a Secretary tur leh Brigade Council Member tur te ruat ni se tih a ni bawk.

S.A.Y. OFFICE:
SAY Office carpet phah ni se, a lo buaipui turin Pu Robert V.L Thlamuana, Leader leh Nl. Ellen Lalengzuali, Asst. Secretary te ruat an ni.

SUB COMMITTEE:
Kumin chhungin heng a hnuaia Sub-Committee hrang hrangte hi kalpui ni se tih a ni -
1) Program Sub-Committee
2) Refreshment Sub-Committee
3) Ushering Sub-Committee
4) Music Sub-Committee
5) Fund Rising Sub-Committee
6) Magazine/Souvenir Sub-Committee

Heng Sub-Committee hrang hrangah te hian Chairman leh Secretary tur te ruat an ni a, anni in anmahni Sub-Committee members turte an ruat ang.

SOUND SYSTEM PUAL:
Sound System Pual Special Fund chu lakkhawm leh ngei ni se, lakkhawm hun atan February Ni 10, 2013, Thianghlimna Inkhawm ni se tih a ni.

CHHIATNI THATNI:
Kan kaldan pangngai hi a tha kan ti a, Inneihna thilpek tihpun ni se, Rs.1,000/- hu thilpek ni se tih a ni.

Nl. Judy Lalfakzuali, Drama i/ cin a sawma pakhat Retreat Ni a hman turin a thawh a, a chungah SAY chu kan lawm hle a ni. Tin, Nl. Ellen Lalengzuali, Asst. Secretary in chawhmeh tur a tum dawn bawk a, Pu Robert V.L Thlamuana, Leader in chhung thingpui leh a hmeh a tum dawn bawk a, an chungah kan lawm hle a ni.

Council Minute chhiarchhuahna Secretary in a nei a, siamthat ngai te siamthat a nih hnu ah tawngtairualin Council chu dar 10:45PM ah tin a ni.

CAMBODIA AH SALVATION ARMY

admin on 11/26/2012 at 7:30am (UTC)

General Linda Bond chuan Salvation Army rawngbawlna chu Kingdom of Cambodia ah Ni 22.11.2012 (Ningani) atang khan tan anih thu a puang. Cambodia a Salvation Army rawngbawlna tan anih hian khawvel ram hrang hrang ram 126 ah Salvation Army chuan rawng a bawl ta a ni.

Cambodia a Salvation Army in rawng a bawl theih dan tur hi International Headquarters, London ah kum 2008 atang daih tawh khan ngaihtuah a ni tawh a, hemi tum hian Korea Territory chuan a ram en thlithlaina (Mission Outreach) neih an tum thu an sawi nghal a, kum 2009 khan mi tlemte in rawngbawlna lian tham lo te chu an lo tan tawh a ni. Hemi tuma kal zing ami YPMS Kim Hong-Soo chu Korea a an haw hnu atanga hun rei vaklo ah Cambodia ah hian kal lehin Phnom Penh hmuna University zirlai te hnenah rawngbawlna neiin an ni ho nen hian rawngbawlna an lo kalpui tawh bawk a ni.

Korea Territory a Seoul Division chhunga Corps pakhat Hyun Corps in an Corps kum 95 tlin lawmna an neih tumin Rawngbawlna Hmathlirna hun neih a ni a, hemi tum a an thurel pakhatah chuan Cambodia a Corps din an tum a ni.

Rawngbawlna liam tham vak lo kalpui a nih hnu ah thil chi hrang hrang buaipui a ni a, harsatna hrang hrang te pawh tawk mahse a tawpah Kingdom of Cambodia ah chuan Salvation Army te chuan hnathawh phalna an hlawh chhuak ta a ni.

Cambodia a Salvation Army rawngbawlna puanna ni ah hian Commissioners Park, Man-hee lehKim, Keum-nyeo (Territorial leaders, Korea Territory) te chuan inkhawm hruaina Phnom Penh hmunah Ni 22.12.2012 (Ningani) khan an nei a ni. Korea Territory atangin Salvation Army Officers 45 laiin an tawiawm a, Sipai thahnem tak an kalkhawm bawk a ni. He rawngbawlna hmun thar a awm tur hian Captain Shin, Jin-kyun leh Captain Lim, Hyang te chu ruat an ni nghal a ni.

He Inkhawm pawimawh tak hi ram hruaitu thenkhat te pawhin an tel pui a, chung zingah chuan Republic of Korea’s Ambassador to the Kingdom of Cambodia te pawh telin, Cambodia rama kohhran hrang hrang hruaitu leh mi challang tak tak te an tel nual a ni.

CENTRAL NORTH DIVISION S.A.Y RALLY REPORT

Asst. Secretary, S.A.Y on 11/26/2012 at 7:08am (UTC)

Bazar Corps SAY te chu Ni 12.10.2012 (Zirtawpni) zing dar 6:30AM ah RM Hall kawt atangin Tuidam lam pan turin kan chhuak a, kan chhuah dawn hian Maj. Saitluanga, In-charge Old Age Home chuan tawngtainain min thlah a ni.
Dar 9:00AM ah Rawpuichhip kan thleng a, hemi hmunah hian tukthuan kan ei a. Tukthuan eikham veleh hian Tuidam lam panin kan chhuak a. Kal lam hi Corps thenkhat an tluan loh avangin leh leimin leh kawngchhia avangin darkar 15 vel lai mai kan thang a, Tuidam chu zan dar 9:30PM ah kan thleng a ni.
Kan Corps atangin Rally ah hian mi 36 kan kal a, a pumpui ang chuan mi 1500 vel palai kan kalkhawm a ni.
Inrinni chawhma ah Bazar Corps Band te chuan Item neiin zanah Creative Art entir a ni bawk a, Pathianni chawhma Thianghlimna Inkhawmah Bazar C.O Bial SAY Zaipawlpui chuan Halleluiah Chorus remin Chawhnu Fakna Kutpui ah Candidate Vanlaldiki Sailo chu compere a ni a, zan Chhandamna Inkhawmah SAY Bial Zaipawl ten hun an hmang a ni.
Pathianni zing ah Bazar Corps Band te chuan Mual Inkhawm neiin vengchhung mipui te leh Rally Palai ten an hlut hle a ni. Hetih lai hian SAY te chuan mi harsa tanpui ngaite chhungkaw 9 tanpuina an lo nei a, heng an mi tanpui te hi rualbanlo leh damlo te an ni hlawm.
Ni 15.10.2012 (Thawhtanni) zing dar 9:00AM ah Tuidam atangin kan chhuak a, kan chhuah dawn hian Pu Robert VL Thlamuana, SAY Leader chuan tawngtaina a hmang a ni. Aizawl zan dar 8:00PM ah kan thleng a ni.
Dam taka kan khawmpui chhung zawng min hruaia min enkawl tu Pathian chungah lawmthu kan sawi mawlh mawlh a ni. Tin, khawmpui chhung hian Pu R.Thangkunga (Thantea) te chhungkua chuan hneh takin min lo thleng a. Vawk leh ui te min lo talhsakin thlenna hmun nuam tak mai min lo buatsaih sak a, an chungah SAY te kan lawm hle a ni.

Gospel Camping Nei

admin on 11/26/2012 at 7:06am (UTC)

Ni 01.11.2012 (Ningani) zan atang khan Corps pum huap Gospel Camping chu neih a ni a, a hlawhtlingin Campers mi 55 lai mai an riak lut a, heng zingah hian Kohhran dang unaute atangin mi 7 an tel a ni. Tin, Bethesda Team member 7 an rawn thawkchhuak bawk a ni. Ni 01.11.2012 zanah hian dar 7:30PM ah Inkhawmna neih niin Team ten Campers zawng zawng te hriakthih rawngbawlna neihsak in hun bul tan a ni a, Camping a sermon hmasa ber Team Speaker Evan. Lalthanzama Hrahsel hnen atangin ngaihthlak a ni.

Campers te zing dar 5:00AM ah thovin thingpui inna te neih anih hnu dar 6:00AM ah Team kaihhruaina in insawizawina leh Devotion hun te hman a ni a, nikhatah sermon vawi 4 te ngaihthlak a ni a, zan dar 9:00PM thleng hun hman thin a ni bawk a ni.

Camping neih chhung hian hun chi hrang hrang hman a ni a. Devotion, Group Discussion, Mass Councelling, Praise & Worship leh Tawngtaina hun te Team kaihhruaina hnuaiah hlim takin an hmang a ni.

Camping chhung hian eirawngbawl tura ngen Festival Committee te, Camping neih chhung zawngah Campers te leh Team te tana lo tawngtai thin Tawngtai Khawl te leh chanvo hrang hrang nei tura ruat ten tlawmngaih chhuah a mahni chanvo theuh tha tak leh felfai taka an tih hlawhtlin vek avang an chungah SAY leh Corps chuan lawmthu an sawi a ni.

CAMPING HLAWHTLING TAK NEIH A NI

admin on 11/26/2012 at 7:06am (UTC)

Kan hriat theuh angin kar kalta Ni 01.11.2012 (Ningani) atanga Ni 03.11.2012 (Inrinni) chhung khan Gospel Camping hlawhtling tak Bethesda Team kaltlang in neih a ni a, campers mi 55 awmin Thlarau Thianghlim awmpuina duhawm tak changin Ni 03.11.2012 (Inrinni) zan Tawngtai Inkhawm banah campers te chu an chhuak a ni.

Ni 04.11.2012 (Pathianni) atangin Camping follow-up neih chhunzawm a ni a, Pathian Thlarau Thianghlim awmpuina nasa Inkhawm ten changin inkhawm hlimawm leh hlawkthlak tak neih a ni a. Ni 05.11.2012 (Thawhtanni) zan thleng follow-up hlawhtling tak mai neih a ni a, Pathian Thlarau Thianghlim inpuanna a ropui in Hriatpuina sawi te an tam thei hle a, Pathian chibai bukna (Worship) hlawkthlak tak mai te neih niin Sermon ropui tak tak, chona siam tak tak te ngaihthlak thin a ni.

Camping boruak a nuam in Corps chhunga Sipai te tawngtaina chhanin a awm a, Camping chhawng hnihna neih leh duhna thinlungah a lian hle a, chung boruak te leh mi thahnem ngai te tawngtaina chu chhanin a awm a Senior Corps inhawnna avangin Ni 07.11.2012 (Nilaini) zan atangin Camping chhawng hnihna chu tan a lo ni leh ta a, zan dar 6:00-6:30PM thleng luhna hun siam a ni leh a, Campers mi 70 lai mai chu hming ziak in an inpu lut a, lang a chhim turin mi 12 laiin hming an ziak lut bawk a ni. Campers te hi mipa leh hmeichhia inzat chiahin 35 ve ve an ni.

Camping chhawng hnihna tan zan hian dar 7:00 ah Inkhawm hmasa ber tan a ni a, Sermon ropui tak mai Bethesda Team Speaker Evan. Lalthanzama Hrahsel hnen atangin ngaihthlak a ni.

Camping chhawng hnihna ah hian Corps chhunga Local Officers leh nu leh pa tam tak in Campers thalai zawk te an telpui thei a, Camping an ti phuisui in an ti hlu hle a ni.

Nizan dar 9:15PM khan Hnehna Kawngzawh Campers zawng zawng te leh Team ten neiin Millenium Centre kawtah Hnehna puanna leh Tawngtai rualna te, Pathian Fak Hla sak hona te neih a ni a, chumi zawhah Bazar Bungkawnah va kual in Biak In thleng hnehna puangin kawng zawhna neih chhunzawm a, Pathian hnathawh a lang zel a ni.

Camping chhawng hnihna hi ruahmann ang chuan zanin hian chhuah tur a ni dawn a, naktuk Pathianni Thianghlimna Inkhawm atanga Ni 12.11.2012 (Thawhtanni) zan thleng follow-up neih leh tur a ni dawn a, Camping a lut lo te pawh follow-up programme ah hian inkhawm turin kan insawm vek a ni.

Camping chhawng hnih lai mai hmang thei leh hun tha min pe tu Pathian chungah a hmasa berin lawmthu awm se la, tin, Senior Corps ten inhawng taka Corps chhunga Sipai te thlarau veina tak tak thinlung nen a Camping an buatsaih hi Senior Corps te chungah pawh Corps mipui te chuan lawmthu an sawi bawk a ni.

Tin, chanvo hrang hrang a ruat - Festival Committee te bakah fatu tura ruat te, Security tura ruat te, Camping hlawhtling tak kan neih theihna tura chum lo chat lova Pathian hma a ding thin Tawngtai Khawl te, Medical Duty tura ruat te, Sound In-charge tura ruat te leh chanvo hrang hrang chelh tura ruat ten hlawhtling taka mahni chanvo theuh kan tih avangin Corps chuan in chungah lawmthu a sawi a ni. Heng bakah hian Camping chhunga thilpek chi hrang hrang pe tu te chungah pawh Corps chuan thinlung takin lawmthu a sawi a, Pathian malsawmna a dilsak bawk a ni.

SIPAI KHAWMPUI VAWI 11-NA

admin on 11/26/2012 at 7:05am (UTC)

Bazar C.O Bial Sipai inkhawmpui Vawi 11-na chu ni 24th - 25th November, 2012 chhung hian kan Corps, R.M Hall ah nghah a ni. Inrinni chhun atangin hun hman a ni dawn a, dar 11:00AM ah Rorel Inkhawm leh Hruaitu thar te hlanna neih a ni dawn a ni. He Rorel Inkhawm a Recording Secretary atan Pu F.Lalrinliana, CLS leh Pu Lalruatdika, CCG te chu ruat an ni.

Sipai Khawmpui ah hian Palai Lawmna Inkhawm zanin a neih turah kan Corps SAY Zaipawl neih tur a ni dawn a, ‘Aw Ropui Ber’ tih hla bu no.1na chu Band nen sak tur a ni a, SAY Member te a tam thei ang ber he zaipawl ah hian tel tur a ni. Tin, Bazar Corps Band te chuan naktuk chawhnu Fakna Inkhawm ah item an nei bawk ang.

Sipai Khawmpui lo awm tur atan heng mi te hi Ushers tura ruat an ni:
1. K. Lalhmangaihzuali
2. Lalchhuanawmi
3. K. Lalnunmawii
3. Lalrinzami
4. K. Lalrinkimi
5. Lalnunsangi
6. K. Lalnunsanga
7. K. Lalrinfela
8. Abel Lalbiakhlua

Heng Ushers tura ruat te hi a hma thei ang bera kal tura ngen kan ni a, dar hmasa rik hma a Biak Ina kim theuh kan tum dawn nia.

Bial Sipai Khawmpui chhung hian Musician turin Tv. Philip V.L Rinpuia, Tv. Freddy Lalramnghaka leh Tv. Erick V.L Ngaihsaka te ruat an ni a, zai hruaitu atan Candidate Vanlaldiki Sailo leh Tv. Lallawmzuala te ruat an ni a, Khuangpu atan Pu C.Lalbiakmawia, Col. Srgt. leh Pu Ngursailova te chu ngen an ni.

He Sipai Khawmpui ah hian Pathianni tlaiah Senior Corps chuan palai te tan ruai a buatsaih sak dawn a ni.

<- Back

1 2 3 4 5 6 7 8 ... 12

Continue ->