Bazar Corps News leh Chhandamna Sipai Pawl News hrang hrang te ziahna a ni. Heng news-ah te hian comment pawh pek theih a ni e

---

Worship Dance Competition Neih a Ni Vanlaldiki Sailo, Drama i/c on 09/06/2010 at 3:55am (UTC)

Action Plana awm angin ni 30 August, 2010 (Thawntan) zan khan Bazar Corps SAY te chuan Brigade Worship Dance Competition kan nei a. Hemi zan hian hun hlimawm tak kan hmang a, inkhawm pawh kan thahnem in nu leh pa lam pawh in min tawiawm tha hle a ni. He inkhawm hi Tv.Lalsangbera Asst. Drama i/c in a kaihruai a. Nl Ellen Lalengzuali Secy in thu puanna a nei a. Hemi zawh hian Pu C.Lalthlamuana Asst.Leader, hemi zana kan host in hun a rawn hmang zui a. Hneh takin Competition a rawn kaihruai a. Intihsiakna tan nghal a ni. English hla a intihsiakna neih hmasak a ni a. Major Lalthansanga Brigade ten bul rawn tanin Major Sangzuala Brigade ten an dawta, Major PC Thansanga Brigade in hnung an rawn dawl a. Sap hla bika Intihsiakna a zawh hnu hian Nl.Lalrindiki’n zaiin min awi a. Mizo hla a intihsiakna neih chhunzawm leh nghal a ni. Mizo hla ah hi chuan Major PC Thansanga Brigade ten bul an rawn tan ve thunga, Major Sangzuala Brigade in an dawta a hnuhnung berah Major Lalthansanga Brigade an rawn lam ve thung a ni. Intihsiakna neih zawh hnu hian Bazar Corps Beat group ten zai mawi takin min awi a, mipui lam thawm pawh a tha hle. Judge pali ten uluk taka an endik a, point an pek hnu in result puanna neih a ni a. A hnuai kan han tarlan te hi Brigade te lawmman lak dan a ni. Mizo 1st - Maj Lalthansanga Brigade 2nd - Maj P.C.Thansanga Brigade 3rd - Maj Sangzuala Brigade English 1st - Maj P.C.Thansanga Brigade 2nd - Maj Sangzuala Brigade 3rd - Maj Lalthansanga Brigade. Best Dancer (Female) Marina Lalrintluangi (Maj.P.C.Thansanga Brigade) Best Dancer (Male) Erick Vanlalngaihsaka (Maj.Sangzuala Brigade) Most Promising Dancer Lalruatdiki (Maj Lalthansanga Brigade) Tin, overall a champion chu Maj. P.C.Thansanga Brigade te an ni.Anni hian Rs.1500/- bakah Trophy mawi tak an la a, Lawmman pahnihna dawngtu Maj. Lalthansanga Brigade ten Rs.1000/- leh trophy an la bawk. Maj.Sangzuala Brigade ten lawmman pathumna la in, anni hian Rs.500/- leh Trophy an la bawk.Tin, Mimal lawmman dawngte pawhin Trophy mawi tak an dawng theuh a ni. Result puan zawh a ni hnu hian kan vai in ‘Zion Khawpui’ tih hla - Mizo hlathluk diktak mai mizo te lungkuai zawng tak mai hmangin Pathian faka lam hona ropui tak kan nei a, Vanlalhuma C.O. in tawngtaina in Worship Dance Competition chu kharna a nei ta a ni. Inkhawm ban hian Biakin chung zawlah thingpui tui tak inhona kan nei a, Worship Dance Competition chu khamlo takin kan tin ta a ni. Kan sawi hmaih hauh loh tur chu he Competition hi huphurh tak chunga buatsaih a nih laiin kan beisei phak aia nasa in Pathianin hna a thawka, thalaite ah inlungrualna leh inpawhna thuk zawk a rawn thlena, tin, nidanga lam ngai lemlo talent nei tha tak tak haichhuahnan hman a ni bawk a, kan hlawkpui takzet a ni. LALPA CHU FAKIN AWM RAWH SE!!

---

SAY SUNDAY, 2010 Report SAY Secy on 07/28/2010 at 9:16am (UTC)

13th June, 2010 SAY Sunday denchhen hian Crusade leh Social works neih a ni, hun thatak min petu Lalpa chu fakin awm se, tin, Corps Council ten hun hlutak min pek avangin lawmthu kan sawi nghal bawk a ni. 12th June, 2010 Saturday hian Mualpui Muanna Inah an thuamhnaw te suksakin hun kan zuk hmanga, Blanket 30 vel kan su a, ruahsur pawh pawisa lovin blanket hi kan su a, mi 19 lai kan kal a, kan hlim tlang hle. Home naupangte nen inkawmna hun rei vak lo hman a ni bawk .Thilpek hengte hi pek an ni Alu – 1bag, Dal 5Kgs leh Artui Case-1 hi SAY in kan pe a, tin, mimal Pu Robert V.L. Thlamuana SAY Leader in Vawksa – 5Kgs, Nl. Lalthanmawii – Artui 1Plate leh Tv. Ngurthanzama – Centre Fresh burkhat leh Sweet 1 packet. 12th June, 2010 Tawngtai inkhawm zan hi Tv. Nelson Lalthanpuia Sailo, Asst. Secy in hun kaihruai in Speaker Tv Zothansanga hnen atangin Pathian thu ngaihthlak a ni a, inkhawm pawh kan tha in SAY Zaipawl ten hlamawi tak an sa a, tawngtairualna neih a ni bawk. 13th June, 2010 Thianghlimna inkhawm hi Pu C. Lalthlamuana, SAY Asst. Leader in a kaihruaia, Speaker hnen atangin Pathian thuchah ropui tak ngaihthlak a ni. Hetah hian Activities Report Nl. Ellen Lalengzuali, SAY Secy in ape a, zaipawl leh band ngaihthlak a ni a. Inkhawm pawh kan thahnema, Pathian thuchah pawh kan ngaihthla tha hlawm hle a ni. Inkhawm banah hian refreshment tuihnai tak eiho a ni a, Ei leh In min siamsak tute Festival Committee te chungah pawh lawmthu kan sawi a ni. Tlai 3:00Pm ah Open Air Meeting Bawngkawn Traffic Point ah neih a ni a, Pu K. Zohmingthanga Adviser in hun a kaihruaia, item hrang hrang ngaihthlak leh enho a ni a, Nl. Vanlaldiki Sailo hnen atangin Pathian fakna hla ngaihtlakh a ni a, Band ten rimawi an rem a, Skit leh worship dance en leh ngaihthlak a ni bawk. Speaker Tv. Zothansanga hnen atangin short sermon ngaihthlak a ni. Mipui pawh tamtak an lo kalkhawm a, hun thatak hman a ni. Zan Chhandamna Inkhawm hi Pu Robert V.L. Thlamuana, SAY Leader in min kaihruaia, Speaker hnen atangin Pathian thuchah ropui tak ngaihthlak a ni. Sermon tawp lamah hriakthihna hun hman a ni a, Mi tamtak Pathian thlaraua damna chang an awm, tisa leh thlarauah damna chang te avangin Pathian hnenah lawmthu kan sawi tak meuh meuh a ni. Inkhawm banah counseling Class Speaker hian mi 4 lai a neihsak bawk a, Zaipawl ngaihthlak a ni a, Nl. Vanlaldiki Sailo hnen atangin fakna hla ngaihthlak a ni bawk. Kham lo takin Chhandamna inkhawm hun pawh hi hman a ni. Hemi zanah hian zirna a hlawhtlingte hnenah lawmpuina thilpek hlan na neih a ni bawk. 14th Jun, 2010 – SAY meeting hi Nl. Judy Lalfakzuali Evangelism i/c in a kaihruai a, Speaker hnen atangin Pathian thuchah ngaithlak a ni a, darkar 3 lai kan inkhawm a, zawhna leh chhanna hun te hman a ni a, inkhawm pawh kan tha a, nu leh pa min rawn tawiawm tute avangin lawmthu kan sawi. Tv. Lalthansanga hnen atangin zai ngaithlak a ni bawk. Inkhawm banah hian Speaker leh athian te leh SAY Council Member te thingpui inhona leh inkawm khawmna hun neih a ni a, Leader in tawngtaina in hun a khar a, tichuan SAY Sunday 2010 chu khamlo takin kan hmang zo ta a ni.

---

SAY COUNCIL - 8 na neih a ni. Admin on 07/28/2010 at 9:10am (UTC)

Leader/Chairman in thuhmahruaite leh SAY rawngbawlnate sawina a nei a, rawngbawlna leh thiltihna intawiawm that a ngaihthute sawina a neia, tawngtaina in council te Pathian hnenah hlanna a nei a tichuan Agenda sawiho nghal a ni. 1. SAY SUNDAY, 2010 REVIEW :- Kumina SAY Sunday hmandan review neih a ni a, Pathian kaihhruaina in rawngbawlna hrang hrang leh Crusade te hlawhtling taka neih a ni a. Mualpui Home a Social Works Blanket suk chungchangah memberte inpek na a ropui. Zaipawl pawh thataka neih theih a nih avangin a lawmawm hle a ni. SAY Sunday hman leh hunah chuan Zaihruaitu ruat tawh nise, Sunday bikah chuan programme duansa lo awm tawh bak ah programme dang lo telh tawh loh nise. Thalai hruaitute inpekna alawmawm hle a ni. Midang an lo inkhawm in lo chiau au hi nasa leh zuala tih nise tih a ni bawk. Bible chhiar tam leh hriat belh zual nan tan lak nise. (Phek 3 ah zawmna) 2. THENZAWL BAZAR CORPS TLAWH CHUNGCHANG :- Leader/Chairman in thuhmahruai te sawina a neia nguntaka sawi chhunzawm nghal a ni a, sum dinhmun report ngaihthlak a ni bawk. Kumin chhungah rawngbawlna tamtakah Sum leh pai hman hnem a nih tawh avangin leh tun dinhmunah han zinchhuahpui tham suma awm rihloh avangin leh July thla ah Bial Sports etc te a awm bawk si a, tin inbuatsaihna hun a awm loh avangin kal hun tura ruatsa Ni 26 June ah kal lovin Ni12 September ,2010 hmanga va kal zawk mai nise tih a ni. 3. BIAL SPORTS CHUNGCHANG :- Bial Sports neih tur Ni 2 &3 July, 2010 chhunga neih tur chungchang pawh ngun taka sawiho a ni a, Sports Sub Committee din nise, Members turin – 1) Tv. Victor M.S dawngliana, Games & Sports i/c 2) Pu C. Lalthlamuana, Asst. Leader 3) Tv. Nelson Lalthanpuia Sailo Asst. Secy 4) Nl. Judy Lalfakzuali, Evangelism i/c 5) Nl. V. Lalzamliani 6) Tv. Lalsangbera, Asst. Drama i/c 7) Pu Robert V.L. Thlamuana, Leader 8) Nl. Ellen Lalengzuali, Secy. Ni 19 June, 2010 zan inkhawm banah inhmuhkhawmna hmasaber hi neih nise A hmun atan SAY Office nise. AOB:- 1)Chanchinbu chungchang : Nl. C. Ramropuii Literature in charge in Editorial Board Member te chanchinbu chhutna ah an kal that loh thu sawina a nei a, nguntaka sawiho nghal a ni. Heng mite hi chanchinbu chhut lo pui tura ruatbelh an ni. Nl. Ellen Lalengzuali, Secy Tv. Nelson Lalthanpuia Sailo, Asst. Secy Nl. Judy Lalfakzuali, Evangelism i/c 2) Sound Training chungchang :- Tv. M.S Dawngzuala, Music in charge in sawina a nei a, nguntaka sawi a nih hnu in hun remchang hmasa berah training hi neih nise. Secretary in Minutes te chhiarchhuah na a nei , tawngtaina a neih hnu in council chu tihtawp a ni.

---

Secretary’s Report SAY Secretary on 07/23/2010 at 9:43am (UTC)

January : 2) 9th January – SAY Council hmasa ber neih a ni. Hetah hian kumin atana action plan leh budget te siam a ni a, nileng leh zan thlengin hun hman a ni. Kumin action plan te chu sawi vek sen a ni lova, SAY Office ah en theih reng in tarchhuah a ni. 3) 11th January – Kum 2010 atana Member inpek tharna neih a nia , hemi zanah hian mi 140 lai inpe in Maj. Saitluanga DYS in he hun hi min rawn hmanpui in Member te Pathian hnen a hlanna a nei nghal bawk a ni. 5) 25th – 26th January - Hemi chhung hian State Training Centre, Tanhrilah riaklutin Retreat neih a ni a, Speaker atan Maj. Saitluanga, DYS chu hman a ni a, member kal ten tisa leh thlarauah malsawmna kan dawng a mi 35 lai kan kal a ni. February 3) 26th – 28th February – Chhung hian Central North Home League Rally kan Corps in kan thleng a, SAY ten kan theihtawpin Rally hi kan tawiawm a, atul tul thawkin kan buai hle a ni. March 2) 8th March :- Action Plana kan lo neih tawh angin hemi zanah hian Fasting Prayer Council member ten neih a ni a, SAY meeting in a zui nghal a, inkhawm pawh kan hlim tlang hle a ni. 3) 19th March :- Blanket su a inhlawhna neih a ni a, member pawh kan kal tha hle. 4) 22nd March :- Action Plana kan lo neih tawh angin hemi zanah hian prayer walk Aizawl khawchhung - Chanmari atanga Vanapa Hall kawt thleng in neih a ni a, khawla ah ngawi renga kalin tawngtaina kan nei a ni. 5) 29th March :- Fresher’s Night hlimawm tak hman a ni a, brigade tin atangin items hlimawm tak2 ngaihthlakna neih a ni bawk. 6) Fatapukur tan Guitar pek a ni a, Tin Himalayan Division rawngbawlna atan Rs. 10,000.00 Maj, ST Dula hnenah hlan a ni bawk. April 1) 31st March – 5th April : Chhung hian Good Friday leh Easter Sunday Tripura Khumulwang bialah hman a ni a, member 27 lai kalin rawngbawlna hlawhtling tak neih a ni a, khawlaiah rawngbawlna neih thin a ni a, hetah hian Bible leh Gospel Tract te sem a ni. Tin kan luanchhuahna atan Khumulwang biala hman tur Guitar pek a ni a, Raimolsom biakin sakna atan Rs.15,000.00 pek a ni a, Tuinaisai Societyah Guitar pek a ni a, Evangelist Teachers 3 te pawh tanpuina pek an ni bawk. 2) 26th April – Zoram Sipai Pawl Ni denchhenin Thisen pek runpui TSAY hmalakna in neih a ni a, kan Corps tang pawhin mi 9 laiin thisen an pe a ni. Zan lam SAY inkhawm ni mahse Sr. Corps te nen inkhawm hona hlimawm tak neih a ni bawk. May 1) 3rd May, 2010 – Fasting Prayer SAY member a thei apiangin neih a ni a, zan lam ah Praise & Worship neih nghal a ni bawk. 3) 24th May :- Claiming the City (Aizawl khawpui tana tawngtaina) RIPANS Complex ah neih a ni a, member pawh 36 lai kan kal a subject hrang hrang hmangin tawngtaina hun hman a ni. 24th – 29th May :- chhung hian Music Camp R.M. Hall ah hian neih ani bawk member ten kan hlawkpui hle ani. 1) Kum in ah hian SAY Member 165 ( Mipa 93 + hmeichhia 72) kana wm a, active taka inhmang hi mi 40-50 vel kan ni 2) SAY Executive Council Member hi 19 kan awm a, OB 6 In charge 6 Asst. Incharge 2 leh Council member 7 kan awm mek a ni. Kuminah hian Councl 7 neih a ni a, OB Council hi vawi 2 neih a ni tawh bawk. 3) SAY hunruatna leh programme hrang hrangte duang turin Programme Sub Committee din a ni a, anni hian action plan zulzuiin rawngbawl dan tur an duang thin a ni. 4) Tunah hian SAY te hian Missionary 3 kan chawm mek. 5) Kan sum hmuhna pui ber chu Faith promise leh Special fund te a ni ber 6) Kumina kan budget chu Rs.1,81,648.00 a ni. 7) Kuminah hian Brigade thumah inthen a ni a, kan Senior Major te pathum hmingchawiin brigade hming pawh hi hman leh a ni. Brigade budget atan hian Rs. 3000.00 tuk a ni. Tin Monday zan inkhawm apiangin Brigade report hi pek ziah a ni bawk. 8) Monday zan apiang in SAY meeting neih a ni a, Sunday fellowship hi thla tin vawikhat neih a ni bawk, hengah te hian member pawh kan kal tha hle thin a ni. 9) Kan Chanchinbu Salvationist pawh tluang taka chhuah chhunzawm zel ala ni. 10) Young Salvationist hi Copy 10 Rangvamual Society ah thlatin thawn ziah a ni a, hei hi kan member Nl. V. Lalzamliani’n a rawn sponsora, achungah kan lawm hle a ni. 11) Kum danga kan la tih ngailoh kuminah hian SAY Music Council din a ni 12) Visitation pawh Council Member ten neih thin a ni a, tun ah hian la chhunzawm zel a ni.

---

Central North Division Local Officer Rally Zawh A Ni Ta Major R. Lalbiakliana , Divisional Secy on 04/12/2010 at 3:59am (UTC)

India Eastern Territory a Division lian ber, Central North Division Local Officers’ Rally hmasa ber chu Dinthar Corps-ah March ni 13 & 14, 2010 khan neih a ni a, Rally palai 350 vel an kal khawm a ni. Ni 14 zan khan tluang taka zawh fel a ni. ----------------------------------- Rally tan ni, ni 13.3.10 (Inrinni) kha Local Officer bik pual a ni a, he hunah hian mi pahnih hnen atanga paper present ngaihthlak leh sawiho a ni. Inkhawm hmasa zawk ah CSM L. Ramkinlova, President Division ACSAL hnen atangin “Local Officer leh Biak In chhung leh pawnlam Rawngbawlna” tih ngaihthlak a ni a, Chawhnu inkhawm ah CSM K. Lalluaia, Treasurer TACSAL hnen atangin “Local Officer leh Neitu Nihna” tih thupui hmanga a sawi chu ngaihthlak a ni ve thung a ni. Tlaiah ruaitheh nghal a ni bawk. Zan inkhawm hi mipui pual a nih tawh avangin Local Officer ni lem lo pawh tam tak an inkhawm bakah Kanan Corps Band,Dawrpui Vengthar Corps SAY Songster, K. Vanlallawma, Durtlang Corps leh Dinthar Corps SAY Songster ten hun tha tak an hmang bawk. Thianghlimna inkhawm chu Major F. Remthanga DYS-in hruaiin, Local Officer thar mi 22 te hnenah Commission Certificate leh Local Officer pathum hnenah retirement Certificate hlanna Major Sangchhunga DC in a nei a, ACSM PC Zoramsangliana, Dawrpui Vengthar Corps hnen atangin “Puitlin Lam I Pan ang u” tih thupui hmangin semon nung tak ngaihthlak a nih bakah Dinthar Corps Band, Catherine VL Hmangaihi, Dinthar Corps, Chaltlang Corps Band, Ramhlun Corps Band leh Division Songster ten hun an hmang bawk. Chawhnu inkhawmah hian CSM Rosangzuala, Secretary Division ACSAL hnen atangin “Local Officer Leh Chhiatni Thatni) tih thupui hmanga a thusawi chu ngaihthlak a ni a, Zan Chhandamna inkhawm ah Commr. Lalkiamlova IS in “Krista Taksa” tih hmanga sermon nung tak a sawi chu ngaihthlak a ni bawk. Bazar Corps Band, Chanmari ‘W’ Corps YP Songster, R. Lalruatfeli, Aizawl Bethel Corps lehAizawl Bethel Corps SAY Songster ten hun an hmang bawk. A bul atanga atawp thlengin inkhawm boruak a tha a, thlengtu Corps leh bialte inpekna a ropui em em a ni. Item reng reng a tha em em vek bawk a ni. Major Sangchhunga DC hova Organising Committee te hmalakna chak tak avangin Pathian khawngaihna azarah he rally hi a hlawhtling takzet a ni.Local Officer, anmahni pual bik khawmpui ah pawh a kallo te kan hlep nasa in akal te erawhchuan Malsawmna an dawng thar nasa takzet a ni.

---

CENTRAL NORTH DIV. SAY RALLY 2009 Admin on 10/23/2009 at 4:24am (UTC)

Central North Division SAY Rally 2009 chu tluang takin Pathian tanpuina zarah liau liau zawh fel a ni ta. He programme pawimawh tak mai hi kum hmasa lam atanga tawngtaina nen a lo ruahman tawh a ni a, kan Division siam danglam alo nih hnu hian neih ngei tumin Central North Division SAY Executive Council chuan hma nasa takin ala a, hun a chawpchilh avangin hmun hrang hrang Rally nghahna hmun tur atan en a ni a, kan Divisional Commander hmalakpuina in Ratu ah nghah alo ni ta a ni. Helam tlang dung hi kan sipai pawl tan chuan hmunhlu tak mai a ni a, chuvang chuan Rally hmasaber nghahna atan pawh inhmeh tak a ni. Pandal sakna turin bungrua chhawp chhoh a ni a, Ratu khawtlang inpekna hi khawtinte tan entawn tlak ava ni em! khawtlangin an lo tung ding a, Corps leh Society tinah tawngtaina in he hun hi nasa taka hlan anih bawk avangin he rally zet hi chu a pawimawh a ni. Palai thlen kim ni ah ruah nasa takin Ratu leh Aizawlah a sur a, hemi avang hian tam tak chuan an thulh leh a, accident thuthang leh ruahsurin a chelh din zawhloh thalai leh Officer-te chu hmalam panin an kal mup mup thung a ni. Pandal thli in a hlim leh a, Division hruaitute leh Ratu C.O. te chuan Biak In ah ngenngawl takin Pathian hnenah an tlulut a, mihring theihna a engmah a control theih tawhloh hnu ah Pathian Engkimtitheia chu a lo che ve ta, Rally tan dawn tlaiah chuan Ruah a banga, pandal chung pawh chih that a ni ta a, inkhawm hunah thataka inkhawm tan phat a ni. A tuk Inrinni ah pawh khawtha hnuaiah inkhawmna programme chu nung tak maiin Pathian tanpuina vang liau liauvin neih zawh leh ani ta a, zanlam ah praise & Worship chu Bazar C.O.Bial SAY-te chuan hneh tak maiin an kaihruaia, hei hian inkhawm a hnu leh zel tan pawh a ti nuam hle mai, Thlarau Thianghlim a che a ni. Inrinni zan hi mission night atana hman ani a, he hunah hian Pu PC Zoramsanglianan thusawiin, Division council hnenah sana 20 a hlan nghal bawk. Tin, heng sanate hi Corps leh society 20 hnenah hemi zan vek hian hlan ani. Sunday kan han thleng a, khawtha tak hnuaiah inkhawmna hun tha kan nei leh ta zel a, chawhnu inkhawm zawhah mual inkhawm nei turin kawng kan han zawh thla a, Puanzarin hma hruaiin Officer 20 rualin an zui a, an hnungah brass band hovin ring tak maiin tawtawrawt an han ham pap pap mai a, an hnungah mipui nawlpuiin an han zui leh a, a ropui ngei mai. Bazar kawn ah Divisional Commander ten lo nghakin mual inkhawm kan han tan a, Mass band ropui tak mai leh thusawi nung tak maiin kalkhawmte chuan Pathian fakhona kan nei a ni. He mual inkhawmna hi Pu P.C.Lalchhandama, Band Master IET Staff band hriatrengna atan hun hman a ni . Ama hla duh em em mai mass band in an ham lai hian mipuite chuan amah hriatrengnan leh Pathian chibai buk nan kan kutin vanlam kawkin rimawi rik chhung zawng zah takin salute kan pe a ni. Zanlam ah inkhawm hlimawm tak mai neih a ni a, he hunah hian Divisional commander in thuchah sawiin hun pum a Pathian rawngbawl duhte inhlanna hun a siam a, mi 16 an inhlan a, mipa 9 leh hmeichhia 7 an ni. Lalpa chu fakin awm rawh se..!! Tin, Pathian hma a inhlanthar mi 215 an awm bawk. Hei hi Rally hlawhtlinna pakhat chu a ni. Chhandamna inkhawmah hian Division SAY Council-te chuan TSAY hnen atangin thilpek Rs 2000 an dawng. Inkhawm banah hian Dinthar C.O.Bial SAY-te chuan Praise & Worship an kaihruai a, thalai leh Officer-te chu pandal khat tepin he hunah hian kan la awm thap mai a, mahni theih ang tawka lamin Pathian kan faka hlim takin Central North Division Rally hmasaber chu kham lo takin kan tin ta a ni. ================================================ Rally Thunawi ========================= * Division siksawi a nih hnu a Central North Division SAY Rally hmasa ber a ni. * Rally chhung hian inkhawm vawi sarih (7) leh Mual inkhawm vawi khat (1) neih a ni. * Rally na ah hian Sialhawk chhiattawk te tan leh Cachar Division tan thawhlawm lakkhawm a ni. * Rally chhung zawnga thawhlawm tlingkawm zawng zawng hi Cheng Singhnih chuang a ni a, Inrinni zan Mission Night inkhawma Cachar Division tang thawhlawm tlingkhawm chu Rs. 6305.00 a ni. * Hun puma Pathian rawngbawl tuna inpe, mi 16 an awm a, Mipa 9 leh hmeichhia 7 an ni. * Pu P.C. Zoramsangliana ACSM, Dawrpui Vengthar Corps chuan Central North Division SAY tan Sana (Wall Clock) 20 a pe a, heng sana te hi a mamawh Corps leh Society hnenah hlan nghal a ni. Tin, Pandal thiat hnatlangte eitur vawk lian tha tak a tumsak hawk. * Central North Division SAY Executive Council chuan Rally neih leh pun tur chu 2012 ah Tuidam Corps a neih leh turin a rel. * He Rally danglamna em em pakhat chu Kohhran bil awm lovin kawng engkimah an in tanpui nasa em em a ni. Tin, mikhual thlen chungchangah leh Rally Sub-Committee prang hrangah pawh an in thurual hle a ni. Bazar Corps SAY Thunawi ========================= * Tv. MS-a leh Tv. Nelson-a te chu an thlen niin an chaw eina ten zikhlum chhum, zikhlum kan, zikhlum buhchiar, zikhlum rawt, vawksa leh zikhlum chhum pawlh an lo hmeh pui a, vawksa ber a hmin hman silova, Tv.MS-an a ui ngang a niang, mut reh tawh lam zan dar 12 pelh ah pawh "Hmin hman se awwww" a la ti vang vang. * Chacha-i zing dar 4 ah a insil phar phar! ! * SAY Zaipawl chu Corps dangin an fak hle, a bikin Tv. Runremsanga telna Bass Part an fak nasa hle. * Gym a kal atanga puar thei ta1o, Tv. Malawma chuan thlenin te Cooker a chawikual ngun ber. Zin chhung zawng hian tumah erawh a char lo. * Bazar Corps tleirawl chawlhni chawhnu inkhawm hall tur ten kal paha salute an pek chu an pe over mah mah niin a lang. * U C.Ruala chu a haw ve lo lek lek. Kan chan thelh a ni. * Leader-te rawen thlen zan hian 'Thawh At' thupui hrnangin Pu Robert-an mut tawh hnu a sermon a thlak chu tleirawl ten an lawm hle, zing dar 2 ah pawh an la nui ham ham. * Tv. Reng-a worship zai hruai pawh a phur lutuk a, vai zai laiin 'kan vaiin aw' a la ti hram. * Nl. Mafaki pawh kum dang ang thovin a ngai tetein a haw leh. * Inkhawm ban apiangin dam lo leh ha tha lo pahnih khat tal Dr.Hruaite-an a en ziah.Abuaiin a indaih to khawp mai. * Tv. Asangtea a.k.a Thawma pawh nula hovin thla an lakpui nasa hle. Ama sawm nge an sawm. Ngaihtuah erawh a ngai.

---

<- Back

1 ...  5  6  7  8  9  10  11  12

Continue ->